Luke 21 - De Beebaa Dabu

Ssigidaumaha a de hine gu magau dono bodu

¹ Iesu ne gidee de gau lava e hhao alaadeu mee ngadi gaavange gi lo te ngavesi o ssigidaumaha.

² Gai ia ne gidee hogi dahi hahine hagaau aloha gu magau dono bodu e hhao ange e lua sseene mmea vaaligiligi.

³ Aagai ia ga hagadaba, “Ni muna abodonu aagu e hai adu nei gi goodou, de hine hagaau aloha laa e kii ange de lagolago ana mee ne gaavange i de gau ange laa alodahi.

⁴ Dangada alodahi ne hhao ange sseene lanea mai alaadeu mee lagolago, aagai ia se hine hagaau aloha gai ne hhao ange mee alodahi oona e mouli ai.”

De tala a Iesu de oha o de temple

⁵ Hanu ana dangada agoago ne pasa i dagodo o de temple, ma denga hadu danuaa e hagalaagii ai laa ma denga sigidaumaha e gaavange laa gi de Maadua, gai ia ga hai ange,

⁶ “Dagodo o mee alodahi oodou e gidee nei, e tae mai naa donu laangi e deai ai se hadu daudahi e dagodo i honga dahi hadu; gu odi alodahi i de tili iho.”

Denga hai ngadaa ma vaivai haia

⁷ Gilaadeu ne ssili ange gi de Iesu ga hai ange, “Tangada Agoago, dee hee de masavaa e hai ai mee nei? Gai dee hee de hagailonga e hagaagona mai bolo gu dai hai mee nei?”

⁸ Iesu ne hai ange gi gilaadeu, “Goodou dagidiiloo gi dee hagasengalia goodou. E soa naa dangada e loomai i dogu ingoo ga hagataba, ‘Go au go ia!’, gai ‘Gu baa mai de masavaa laa!’ Gai goodou gi dee daudali ange i gilaadeu.

⁹ Gai de masavaa naa huu oodou e langona ai de hai denga hebagi ma de hellumi o dangada, gai goodou gi dee maatagu; mee nei e hai naa donu i mua, aagai tigi dae mai de hagaodi.”

¹⁰ Gai ia ga hai ange gi gilaadeu, “Denga huaahenua e hagadau hebagi naa; denga nohoanga hodooligi e hagadau hai baasi naa hogi.

¹¹ Gai e hagangalungalue naa de henua, gai de onge ma denga mee hagamaakau e hai naa i denga mommee. Gai e hai naa hogi denga mee hagamaatagu ma hagailonga hagalele mouli i lo te langi.

¹² Aagai i mua de tae mai o mee nei alodahi, gai dangada e booboo naa goodou ga vaivai hai. Gilaadeu e kave naa goodou ga hagamodu oodou muna i denga synagogue, ma de hhao gi lodo hale pono, ma de kave goodou gi mada i mua o denga hodooligi ma denga goobenaa i hiidinga o dogu ingoo.

¹³ Gai deelaa naa doodou masavaa e tala hagadonu ai ogu dagodo.

¹⁴ Deenei ai, goodou haia gi paba oodou maanadu i mua nei bolo goodou e dee manavasaa i oodou muna e pasa ange ai.

¹⁵ Go hiidinga au e gaavadu naa donu gi goodou muna ma de heiangi e pasa ange ai gi oodou hagadaumee, gai gilaadeu e dee maua naa donu i de hagahadu muna aabe go de pasa adu gi oodou muna.

¹⁶ Oodou maadua, ma oodou dama, ma oodou dangada, aama oodou soa e gaavange naa goodou gi de hainga; gai hanu goodou e daa naa ga maakau,

¹⁷ gai dangada alodahi e kino naa i goodou i hiidinga o dogu ingoo.

¹⁸ Gai e deai naa donu se ngaangaaulu daudahi e doo mai i oodou biho.

¹⁹ Noo goodou e hagaduu ngae i de golomagi lodo, gai goodou e maua donu de mouli.

De tala a Iesu de oha o Jerusalem

²⁰ “De masavaa naa huu oodou e gidee ai Jerusalem gu duuli ina i denga hagabuulinga hebagi, aagai goodou gi iloo bolo gu dai oha de aduhale.

²¹ Dangada e nnoho i Judea gi saavini gi hulo gi denga mounga; dangada e nnoho i lo te aduhale gi ssao gi hulo gee, gai dangada e nnoho i tua de aduhale gi dee ulu gi lodo.

²² Gai aanei laangi o de hagaduasala e hagassula ai mee alodahi gu lava laa i de sisi.

²³ Gai e vakaa naa denga haahine hai tama, ma gilaadeu e haau alaadeu gaagaa i laangi laa! Gai de hai ngadaa laumalie e dae mai gi honga henua i lalo ma de bole e hai baasi ange ai gi de huaadangada nei.

²⁴ Hanu gilaadeu e daia naa ga maakau i de gadilaasa, hanu e gaavee naa gi denga henua gee; aagai denga Gentile e dagadagahi naa Jerusalem gi lalo olaadeu vae, ga dae ai gi de odi delaadeu masavaa.

De ahe mai o Tama a Tangada

²⁵ “Gai e hai naa denga hagailonga i lo te laa ma lo te maasina aama denga heduu. Gai e hai ngadaa naa ma teai se tali a denga huaahenua i henua i lalo, i de masavaa e haganngolo ai de moana ma de beabeau o de moana.

²⁶ Dangada e ssili mada naa i delaadeu maatagu ma de manavasaa i mee gu dai loomai gi henua i lalo, go hiidinga mee mmahi i lo te langi e hagangaalue naa.

²⁷ De masavaa laa gai dangada e gidee naa Tama a Tangada e humai i honga giliiga i ssauaa aama de mahamaha laumalie.

²⁸ Gai de masavaa naa huu e daamada ai de hai mee nei, aagai goodou tuu mage daangage age oodou biho, go hiidinga gu baa mai donu doodou hagamouli.”

Agoago mai i dagodo o de fig

²⁹ Iesu ne tala ange hogi dahi mee hagasengasenga gi gilaadeu ga hai ange, “Goodou kalo ange diiloo dagodo o de fig ma manu ange laa.

³⁰ De masavaa naa huu e matili age ai olaadeu lau manu, gai goodou gu gidee aama de iloo bolo gu baa mai de masavaa mahanahana.

³¹ Gai e bei ai hogi, noo gu gidee e goodou de hai mee nei, aagai goodou gu iloo bolo gu baa mai donu de nohoanga hodooligi o de Maadua.

³² Ni muna abodonu aagu e hai adu nei gi goodou, de atangada nei e dee lilo naa donu gai gu hai mee nei hugadoo.

³³ De langi ma henua i lalo e llilo naa donu, gai agu muna e dee llilo donu.

Goodou dagitilo ma de dalodalo

³⁴ “Goodou dagidiiloo gi dee hakoso oodou lodo i doodou dee saohia i de hai daonga ma de unu ga ssenga aama denga mee hagamanavasaa o de mouli nei, gai de laangi laa e daa hagalele de dae mai gi goodou bei dagodo o ssele.

³⁵ Gai e dae mai naa donu gi honga o dangada alodahi i henua i lalo.

³⁶ Aagai goodou dagitilo ma de dalodalo i masavaa alodahi gi mmahi ai goodou i de saavini e hulo gee i mee alodahi e loomai, ma de tuu i mada luu mada o Tama a Tangada.”

³⁷ Laangi laa gai ia e agoago i de temple, gai de boo naa huu gai ia ga hano ga noho i honga de mounga e hagaingoo ange laa go de Mounga o denga Olive.

³⁸ Gai denga daiao alodahi gai dangada e loomai gi de temple e hagallongo ai ana agoago.