Luke 20 - De Beebaa Dabu

De ssili a denga dagi dagodo ssauaa o Iesu

¹ Dahi laangi i de masavaa o Iesu e agoago ange ai dangada i de temple aama de tala ange gi gilaadeu de longo danuaa, aagai de gau haimeedabu maolunga, ma de gau sisi, aama dagi ne loomai

² ga hai ange gi de ia, “Daalaa mai be se ssauaa mai i hee aau e hai ai nei mee nei. Gai goai ne gaavadu gi de goe ssauaa nei?”

³ Iesu ne hai ange gi gilaadeu, “Au e ssili adu hogi gi goodou dahi mee. Goodou daalaa mai gi de au:

⁴ ssauaa o John e babudaisi ai laa, se mee mai i de langi, aabe mai i daho dangada?”

⁵ Gai gilaadeu ne pasa i olaadeu magavaa ga hagataba, “Noo gidaadeu e hai ange, ‘Se mee mai i de langi,’ gai ia e ssili mai naa, ‘Gai gu aha goodou gu dee hagadonu ai naa agu muna?’

⁶ Aagai noo gidaadeu e hai ange, ‘Se mee mai i daho dangada,’ gai dangada alodahi e maga naa gidaadeu i hadu, go hiidinga gilaadeu e hagataba bolo a John se pelaabisi.”

⁷ Gai gilaadeu ga hai ange gi Iesu, “Gimaadeu e dee iloo be go hee ne humai ai.”

⁸ Iesu ne hai ange gi gilaadeu, “Au e dee tala adu hogi gi goodou be go hee ne humai ai ssauaa aagu e hai ai nei mee nei.”

De gau e diiloo ange de veelengaa grape

⁹ Iesu ne tala ange hogi gi dangada dahi mee hagasengasenga ga hai ange, “Dahi daane ne doo dahi veelengaa grape ga dugu ange gi hanu dangada gi diiloo ange, gai ia ga hano gi dahi henua gee i dahi masavaa daulooloa.

¹⁰ Aagai de masavaa huu o de hagihagi, gai ia ga hai dahi ono dangada hai hegau gi hano gi gaamai dana diba i hua o de veelenga laa. Aagai de gau laa ga daa tangada hai hegau laa ga hai ia gi ngadi ahe, teai donu mee ne gaavange gi de ia.

¹¹ Gai taane laa ga hai ange hogi gi hano dahi ono dangada hai hegau; gai gilaadeu ga hagailiili ma de vaivai hai ia ga hai ia gi ngadi hano, teai donu mee ne gaavange gi de ia.

¹² Gai ia ga hai ange hogi gi hano dahi ono dangada hai hegau i tolu hanonga. Gai gilaadeu ga hagalagolagohia ia ga tili ia gi tua de veelenga.

¹³ Gai taane niiana de veelenga laa ga hagadaba, ‘Se aha ange naa aagu ga hai? Au ga hai nei gi hano dagu dama daane hagamogomogo gi olaadeu daha, agu made gilaadeu e hagadubu naa ia!’

¹⁴ Gai de masavaa huu a de gau hegau laa ne gidee ai dana dama daane, gai gilaadeu ga hagataba i olaadeu magavaa, ‘Deenei tama e bolo ange aagena de mommee nei. Gidaadeu ga daa ia gi magau gai gidaadeu ga kave dono boolonga!’

¹⁵ Gai gilaadeu ga tili ia gi tua de veelenga ga daa ai ia gu magau. Deenei ai, ni aha naa a tangada niiana de veelengaa grape e hai ange gi gilaadeu?

¹⁶ Ia e humai naa ga daa gilaadeu gi maakau, gai ga gaavange de veelenga laa gi hanu dangada gee.” De masavaa a dangada ne langona ai de mee nei, gai gilaadeu ga hagataba, “E dee maua donu gi hai mee nei!”

¹⁷ Aagai Iesu ga haaina gilaadeu, ga hai ange, “Dee hee de hagadoonunga o muna gu sisi laa: ‘De hadu a de gau hagatuu hale ne hagangadi mee gu hai go de hadu i tege’?

¹⁸ Be goai e doo ange gi honga de hadu laa e maoha dono angaanga, aagai noo de hadu laa e doo ange gi honga o tangada gai ia gu balaginagina donu.”

De hagao ange taagisese gi Caesar

¹⁹ De gau sisi ma de gau haimeedabu maolunga ne ssala de hai e poo ai Iesu i de masavaa laa, go hiidinga gilaadeu e iloo bolo ia ne tala de mee hagasengasenga laa e hagaago ange ai olaadeu dagodo; aagai gilaadeu e maatagu i dangada.

²⁰ Gai gilaadeu ne dagitilo Iesu ma de hai gi hulo de gau mulidagi gi ono daha, gilaadeu ne hagassee bolo e hai hegau i de muna abodonu. Gai gilaadeu ne hagallongo ana muna e tilo be e hanu alaadeu mee e gaavange ai ia e hagamodu ono muna i de hainga ma ssauaa o de goobenaa.

²¹ Gai de gau mulidagi ne loomai ga ssili ange gi de ia, “Tangada Agoago, gimaadeu e iloo bolo koe e basa ma de agoago i de heohi, koe e dee vae dangada, aagai e agoago de haiava o de Maadua i de muna abodonu.

²² E alaange demaadeu hagao ange taagisese gi Caesar be deai?”

²³ Gai ia e iloo alaadeu maanadu vaivai daakodo, gai ia ga hai ange gi gilaadeu,

²⁴ “Hagaagona mai gi de au dahi denarius. Niioai de ada ma de hagailonga iainei?” Gilaadeu ga hai ange, “Niio Caesar.”

²⁵ Gai ia ga hai ange gi gilaadeu, “Deelaa ai, gaavange gi Caesar mee a Caesar, gai gaavange gi de Maadua mee a de Maadua.”

²⁶ Gai gilaadeu gu dee maua i de hagabaubau ia i ana muna i magavaa o dangada. Gilaadeu gu llele mouli i ana muna ne basa ange ai, gai gilaadeu gu dee mmuu.

De ssili dagodo o de mouli age

²⁷ Hanu Sadducee ne loomai hogi gi ono daha, aanei gilaadeu e hagataba laa bolo e deai donu se mouli age;

²⁸ gai gilaadeu ne ssili ange gi de ia, “Tangada Agoago, Moses ne sisi ga hai mai bolo noo gu magau taina daane o dahi, gai teai alaau dama ma dono bodu, aagai dono daina daane gi hai bodu ange gi dono maa, e hai ai dahi hagadiilinga moo dono daina daane.

²⁹ E dogohidu hai daina daane; tama madua ne hai bodu, gai ia ne magau teai ana dama.

³⁰ Gai togolua

³¹ ma togodolu ne hai bodu ange hogi gi de hine laa; denga daane dogohidu laa alodahi ne maakau hogi teai donu alaadeu dama.

³² Muli mai gai de hine laa ne magau hogi.

³³ Gai niioai ai naa de bodu go de hine laa i de masavaa o de mouli age? Go hiidinga gilaadeu alodahi ne hai bodu ange gi de ia.”

³⁴ Gai Iesu ga hai ange gi gilaadeu, “Dangada iainei e hai bodu ma de hagahai bodu,

³⁵ aagai dangada e heohi ange gi de mouli age ma de masavaa e humai e dee hai bodu aabe e hai gi hai bodu.

³⁶ Gilaadeu nei e bei naa donu dagodo o de gau de langi, gilaadeu e dee maakau ange. Gai gilaadeu go dama donu a de Maadua, i hiidinga gilaadeu gu mouli age mai i de magau.

³⁷ Aagai dagodo de mouli age o de gau maakau, Moses gu hagaago mai i de mommee e sisi ai laa dagodo o de manu somo e ula laa, gai ia ne hagahi ange ai Tagi Maolunga go de Maadua o Abraham, ma de Maadua o Isaac, aama de Maadua o Jacob.

³⁸ Ia e dee se Maadua niio de gau maakau, aagai se Maadua niio dangada e mouli; gai alodahi e mouli ange gi de ia.”

³⁹ Hanu dangada sisi ne hai ange hogi gi de ia, “Tangada Agoago, e heohi au muna!”

⁴⁰ Gai gilaadeu tee ahe ange e ssili ange hanu mee gi de ia.

De ssili be niiai tama go de Klisdo

⁴¹ Aagai ia ne ssili ange gi dangada, “Gu aha gu hagataba ai laa dangada bolo de Klisdo se dama nii David?

⁴² Gai David gu hagadaba i de beebaa o denga Psalm, ‘Tagi Maolunga ne hai ange gi dogu Ia Aamua: Noho i dogu baasi madau

⁴³ ga dae ai gi dagu hai oo hagadaumee go de mommee e dugu ange aagena luoo vae.’

⁴⁴ David ne hagahi ange ‘de Ia Aamua’ gi de ia; gai dee hee dono hai se dama niiana?”

De hagakana ange i dagodo o de gau sisi

⁴⁵ Iesu ne hai ange gi ana dangada agoago i madamada o dangada,

⁴⁶ “Goodou kana ange dagidiiloo goodou i de gau sisi, gilaadeu e llodo e kahu i malo lloa e hulo saele ai, ma de llodo dangada gi hagaboo ange gi gilaadeu i mommee hagao mee, ma denga duulanga maolunga i lodo synagogue aama duulanga hagadubu i denga daonga;

⁴⁷ gilaadeu e gaiaa mee a denga haahine gu maakau olaadeu bodu, ma de hai gi lloa alaadeu dalodalo gi gidee ai e dangada. Gilaadeu e kona naa donu de hagaduasala!”