Luke 18 - De Beebaa Dabu

De mee hagasengasenga o de hine gu magau dono bodu

¹ Iesu ne tala ange hogi dahi mee hagasengasenga gi ana dangada agoago, e hagammahi ange ai gilaadeu gi dalodalo i masavaa alodahi gai gi dee baageaa olaadeu lodo.

² Ia ne hai ange, “E dahi dangada hagamodu muna e noho i dahi aduhale. Ia e dee madagu i de Maadua aabe e hagadubu dahi dangada.

³ Gai e dahi hahine i de aduhale laa gu magau dono bodu, gai ia e aheahe mai ma e dangidangi ange gi taane laa, ga hai ange, ‘Hagamodu ina ogu muna i de heohi e hai baasi ange ai gi dogu hagadaumee.’

⁴ Gai ia tee bale ange de hine laa i dahi masavaa daulooloa, aagai muli mai huu gai ia ga hagadaba, ‘Au e dee madagu i de Maadua aabe e hagadubu dahi dangada daudahi,

⁵ aagai au e bale ange donu de hine nei gi dee aheahe mai ai ia gi hakoso.’ ”

⁶ Gai Tagi Maolunga ga hai ange, “Goodou hagalaangona muna a tangada hagamodu muna baubau laa.

⁷ E aha, de Maadua e dee bale ange ana dangada gu hili, i delaadeu tangi ange gi de ia i de laangi ma de boo? E aha, ia e hai naa gilaadeu gi daalia i dahi masavaa daulooloa?

⁸ Au e hai adu gi goodou, e deai, ia e hagamoolau naa donu ga bale ange gilaadeu. Gai e aha, e maua naa e Tama a Tangada i de gidee hanu e kai i henua i lalo, i dono masavaa e ahe mai ai?”

De Pharisee ma taane hagabudu taagisese

⁹ Iesu ne tala ange hogi de mee hagasengasenga nei gi hanu gilaadeu e hagataba laa bolo gilaadeu ni dangada e heohi, gai e hagangadi mee dangada ange laa:

¹⁰ “E dogolua daane ne loage e hulo e dalodalo i de temple; dahi gilaau se Pharisee, gai dahi se daane hagabudu taagisese.

¹¹ De Pharisee laa ne vvae gee ia ma dangada gai ia ga duu ga dalodalo, ga hai ange, ‘De Maadua, au e hagaahe adu de abodonu gi de goe, go hiidinga au e dee bei dagodo o dangada ange laa. Gilaadeu ni dangada gaiaa, ma de hai mee dee heohi aama de dagodo haisala, au e dee bei hogi dagodo o taane hagabudu taagisese.

¹² Au e hagahiigai i e lua hanonga i denga uvigi alodahi, au e gaavadu gi de goe dahi diba i diba e madaangahulu o agu mee alodahi.’

¹³ Aagai taane e hagabudulia laa taagisese ne duu i dahi mommee mmao, gai ia tee galo age donu hogi gi de langi, gai ia ne hagailiili ono hadahada, ga hai ange, ‘De Maadua, degi mai gi de au, au se dangada e haisala!’

¹⁴ Au e hai adu gi goodou, taane nei ne ahe gi dono hale gu hagaheohi, aagai taane ange laa teai. Be goai e hagamaolunga e hai naa ga maolalo, gai be goai e hagamaolalo e hai naa ga maolunga.”

De hagamanuuia a Iesu denga gauligi

¹⁵ Gai dangada ne gaamai alaadeu gaagaa gi Iesu gi dugua ange dono lima gi olaadeu elunga. Gai ga gidee huu e ana dangada agoago gai gilaadeu ga hagasee gilaadeu.

¹⁶ Aagai Iesu ga hagahi denga gauligi vaaligiligi gi loomai gi ono daha, gai ia ga hai ange, “Dugua denga gauligi vaaligiligi gi loomai gi ogu daha, goodou aude buibuia gilaadeu, i hiidinga niiolaadeu donu de nohoanga hodooligi o de Maadua.

¹⁷ Ni muna abodonu aagu e hai adu nei gi goodou, tangada e dee gaavee de nohoanga hodooligi o de Maadua bei dagodo o tamaa gauligi e dee maua donu i de ulu ai.”

Taane lava

¹⁸ Gai dahi dagi ne ssili ange gi de ia, “Tangada Agoago danuaa, se aha aagu e hai gi maua ai e au de mouli e dee ngado mai?”

¹⁹ Iesu ne hai ange gi de ia, “Gu aha gu hagadaba mai ai naa goe bolo au e danuaa? E deai donu e danuaa, go de Maadua donu huu.

²⁰ Koe e iloo denga hainga: ‘Aude dagodo haisala, aude daia tangada gi magau, aude gaiaa, aude hagabaubau ina dahi i de muna hadu, gai hagadubulia doo damana ma doo dinana.’ ”

²¹ Taane laa ne hai ange gi de ia, “Mee nei alodahi gu odi i dogu daudali ai mai i dogu gauligi.”

²² Gai ga langona huu e Iesu ana muna, gai ia ga hai ange gi de ia, “E dahi donu huu mee tigi dohu i oo daha: hannoo hagao ina gi daha oo goloa alodahi gaavange sseene gi de gau hagaau aloha, gi hanu ai au mee i de langi. Gai koe ga humai ga daudali mai i de au.”

²³ Gai ga langona huu e taane laa muna laa, gai ia gu lodo baubau mmao, go hiidinga ia se daane lava mmao.

²⁴ Iesu ne galo ange ga tilo ia, ga hai ange, “E hai ngadaa mmao de ulu o de gau lava i de nohoanga hodooligi o de Maadua!

²⁵ Gai e hai ngaohie ange de ulu o de gamelo i de haonga o de niila, i de ulu o tangada lava i de nohoanga hodooligi o de Maadua.”

²⁶ Dangada ne langona e gilaadeu muna nei ne hagataba, “Gai goai ai naa e maua gi hagamouli?”

²⁷ Iesu ne hai ange gi gilaadeu, “Mee e dee maua i de hai i daho dangada e maua donu i daho de Maadua.”

²⁸ Peter ne hai ange gi de ia, “Gimaadeu gu dugu amaadeu mee hugadoo gai ga daudali adu i de goe.”

²⁹ Iesu ne hai ange gi gilaadeu, “Ni muna abodonu aagu e hai adu nei gi goodou, e deai donu se dangada e dugua dono hale, be go dono bodu, be go ono daina, be go luoono maadua, aabe go ana dama i hiidinga o de nohoanga hodooligi o de Maadua,

³⁰ e dee kave mee e kii ange de lagolago i mee nei i de mouli nei, gai de masavaa e humai go de mouli e dee ngado mai.”

De tala a Iesu dono magau i tolu hanonga

³¹ Iesu ne hagahi hogi tinoangahulu ma dogolua, ga hai ange gi gilaadeu, “Tilo, gidaadeu ga hulo gi Jerusalem, gai mee alodahi gu sisi laa i daho denga pelaabisi i dagodo o Tama a Tangada e hagassula naa donu.

³² Ia e gaavange naa gi denga Gentile gai gilaadeu ga doo ai mee, ma de vaivai hai ia ma de savasavale ange gi de ia.

³³ Gai gilaadeu e hagailiili naa hogi ia ga daa ga magau. Gai de hagadolu laangi huu gai ia gu mouli age.”

³⁴ Gai ana dangada agoago tee tonu ange gi muna laa; de hagadoonunga o muna nei e hagammuni i gilaadeu, gai gilaadeu tee tonu ange gi muna a Iesu ne tala ange.

De hagaieiangi o dahi daane dee gide

³⁵ Gai ga dai paa ange huu gilaadeu gi Jericho, gai dahi daane dee gide e noho i gaogao de haiava ma e dangidangi ai.

³⁶ Gai ia ne langona dangada soa e seesee mai laa ono gaogao, gai ia ga ssili be ni aha gu hai laa.

³⁷ Aagai dangada ne hai ange gi de ia, “Iesu, taane Nazareth gu seesee mai laa kinei.”

³⁸ Aagai taane laa ga oo ga hai ange, “Iesu, Tama a David, lodo aloha mai gi de au!”

³⁹ Gai dangada e seesee i mada i mua ga hagasee ia gi dee hagalongaa. Aagai ia ga kii ange donu de oo ga hai ange, “Tama a David, lodo aloha mai gi de au!”

⁴⁰ Gai Iesu ga duu ga hai gi gaamai taane laa gi ono daha. Gai ga humai huu ia gi daho Iesu, gai ia ga ssili ange,

⁴¹ “Se aha aau e lodo au gi haia adu maau?” Taane laa ne hai ange, “Tagi Maolunga, au e lodo gi gide au.”

⁴² Iesu ne hai ange gi de ia, “Koe gi gide! Doo gai gu hagaieiangi goe.”

⁴³ De masavaa laa donu huu gai taane laa gu gide, gai ia ga daudali ange i Iesu, ga tuhi ai de Maadua. Gai ga gidee huu e dangada alodahi de hegau laa, gai gilaadeu ga tuhi de Maadua.