Luke 17 - De Beebaa Dabu

Denga hagatale e haia ga haisala dangada

¹ Iesu ne hai ange gi ana dangada agoago, “E tae mai naa donu denga hagatale e haia ga haisala dangada, aagai e vakaa naa tangada e haia ga loomai mee nei!

² E danuaa donu i de nnoa ange dahi hadu mmili laumalie gi dono ua ga tili ai ia gi lo te moana gelo, i dana hai ga haisala dahi dangada maolalo bee nei.

³ Goodou kana ange dagidiiloo iho goodou! Noo dahi oo daina gu haisala adu gi de goe, gai koe hagaseegina ia; noo ia gu dahuli ono lodo, gai koe degi ange.

⁴ Gai ga haisala adu naa donu ia gi goe i e hidu hanonga i de laangi, gai noo ia e ahe mai i e hidu hanonga, ga hai adu, ‘Au gu haisala,’ gai koe degi ange gi de ia.”

De hai gi kii ange de nnui omaadeu kai

⁵ De gau tala ne hai ange gi Tagi Maolunga, “Haia gi kii ange de nnui omaadeu kai.”

⁶ Gai Tagi Maolunga ne hai ange, “Gai ga vaaligiligi naa donu oodou kai bei de golee o de mustard, gai goodou e maua i de hai ange gi de manu somo go de mulberry, ‘Ngalue gee mai i doo duulanga ga tili gi de moana,’ gai e hai naa donu ga bei oodou muna.

Hegau a tangada hai hegau

⁷ “Goai de goodou e dahi laa ono dangada hai hegau e hai hegau i dana veelenga, aabe e hagaloosia ange au ssiibi, gai koe e hai ange gi de ia i de masavaa oona e ahe mai ai i de veelenga, ‘Humai noho gaimee i mua’?

⁸ E deai! Gai ia e hai ange naa gi de ia, ‘Hagadabena ina ogu mee e gaimee ai, mage gahu i oo malo ga gaamai agu mee e gai ma de unu, gai muli mai gai koe ga gaimee ai ma de unu.’

⁹ Tangada aamua e hagaahe ange laa de abodonu gi tangada hai hegau, i hiidinga ia gu hai ana mee gu tala ange ia gi haia?

¹⁰ E bei ai hogi oodou dagodo; noo gu haia e goodou mee alodahi gu hai adu goodou gi haia, aagai goodou hagataba, ‘Gimaadeu ni dangada hai hegau e deai omaadeu haigamaiana; gimaadeu gu hai donu huu mee e heohi demaadeu hai.’ ”

De hagaieiangi o tinoangahulu daane lebelaa

¹¹ Gai ga seesee huu Iesu e hano gi Jerusalem, gai ia ne hano laa magavaa o Samaria ma Galilee.

¹² Gai de masavaa o Iesu ne ulu ai i dahi aduhale, gai ia gu gidee e dinoangahulu daane lebelaa e tuu i dahi mommee mmao,

¹³ gai gilaadeu e oo mai ma e hai ange, “Tangada Aamua go Iesu! Lodo aloha mai gi gimaadeu!”

¹⁴ Gai ga gidee huu e Iesu gilaadeu gai ia ga hai ange, “Goodou hulo hagaagona ange goodou gi de gau haimeedabu.” Gai de masavaa olaadeu e seesee ai e hulo, gai gilaadeu gu ieiangi.

¹⁵ Gai de masavaa huu a dahi i olaadeu magavaa ne gidee ai bolo ia gu ieiangi, gai ia ne aahe mai ga tuhi de Maadua i de leo laumalie.

¹⁶ Gai ia ne ino gi lalo i gaogao luu vae o Iesu ga hagaahe ange de abodonu gi de ia. Gai taane nei se dangada Samaria.

¹⁷ Aagai Iesu ga ssili ange, “E dinoangahulu ne ieiangi; gai i hee ai de gau dogosiva ange laa?

¹⁸ Teai ange laa donu se gilaadeu ne lodo e ahe mai e hagamahamaha ina de Maadua, go tangada henua gee nei donu huu?”

¹⁹ Gai Iesu ga hai ange gi taane laa, “Hidi age hannoo; doo gai gu hagaieiangi goe.”

De dae mai o de nohoanga hodooligi o de Maadua

²⁰ Denga Pharisee ne ssili ange gi de ia be dee hee de masavaa e dae mai ai de nohoanga hodooligi o de Maadua, gai ia ne hai ange, “De nohoanga hodooligi o de Maadua e dee humai bei dagodo o denga hagailonga oodou e tilo naa,

²¹ e deai naa hogi dangada e hagataba, ‘Goodou kalo ange diiloo, deenei i kinei!’, aabe hagataba, ‘Deelaa i kilaa!’ Gai de nohoanga hodooligi o de Maadua e dagodo donu i oodou lodo.”

²² Gai ia ne hai ange gi ana dangada agoago, “E tae mai naa laangi oodou e llodo ai gi gidee e goodou dahi laangi o Tama a Tangada, gai goodou e dee maua gi gidee.

²³ Gai dangada e hai adu naa gi goodou, ‘Goodou diiloo i kilaa!’, aabe ‘Goodou diiloo i kinei!’ Gai goodou aude hulo gi daudali ange i gilaadeu.

²⁴ Tama a Tangada e humai naa i de laangi laa, bei dagodo o de uila e laba mai laa i dahi luu bido o de langi, ga hano ga dae gi de bido ange laa.

²⁵ Aagai ia e hagaduasala naa ma de hagangadi mee ina i mua i daho de atangada nei.

²⁶ Gai laangi o Tama a Tangada e bei naa dagodo o de masavaa o Noah.

²⁷ Dangada ne gaimee ma de unu, gai gilaadeu ne hai bodu aama de gaavange gi hai bodu, ga dae ai gi de laangi o Noah ne ulu ai i de vaga hale, gai tolona ga humai ga daa gilaadeu alodahi gu maakau.

²⁸ Gai e bei hogi denga laangi o Lot. Dangada ne gaimee ma de unu, ma de hagao mee ma de hagao gi daha, ma de doo mee aama de hagatuu,

²⁹ aagai de laangi huu o Lot ne hano gee mai ai i Sodom, gai de ahi ma denga maga ahi ga too iho i de langi ga daa gu maakau gilaadeu alodahi.

³⁰ Deenei naa hogi tagodo o Tama a Tangada i dono masavaa e ahe mai ai.

³¹ Be goai e noho i tua de hale i de laangi laa, gai ia gi dee iho gi gaavee ono goloa i lo te hale; gai tangada i de veelenga gi dee ahe mai hogi gi de hale.

³² Goodou manadua dagodo o de bodu o Lot.

³³ Be goai e hagamogomogo ina dono mouli gai e tili donu, aagai be goai e hagangadi mee ina dono mouli gai e hagaola donu dono mouli.

³⁴ Au e hai adu gi goodou, e dogolua naa dangada e daakodo i honga de moenga i de boo laa; gai dahi e gaavee gee naa gai dahi e deai.

³⁵ E dogolua naa hogi haahine e mmili alaau wheat, gai dahi e gaavee gee naa gai dahi e deai. [

³⁶ E dogolua naa hogi dangada e nnoho i de mommee iai veelenga; gai dahi e gaavee gee naa, gai dahi e deai.]”

³⁷ Gilaadeu ne ssili ange gi de ia, “Tagi Maolunga, go hee e hai ai mee nei?” Iesu ne hai ange gi gilaadeu, “De mommee iai dahi angaanga magau, gai go kilaa hogi e hagabuni ai denga vulture.”