Luke 15 - De Beebaa Dabu

De mee hagasengasenga o ssiibi gu dee maleva laa

¹ Dahi laangi gai de gau hagabudu taagisese ma de gau haisala ne loomai e hagallongo ana agoago.

² Aagai denga Pharisee ma de gau sisi ne nnanu ga hagataba, “Tangada nei e abodonu ange gi de gau haisala ma de gaimee madali gilaadeu!”

³ Gai Iesu ga tala ange de mee hagasengasenga nei gi gilaadeu, ga hai ange,

⁴ “Goai de goodou e lau ana ssiibi gai dahi gu dee maleva. Gai e aha, ia e dee dugu naa de massiva ma siva i lodo henua, gai ia ga hano ga ssala gi gidee ssiibi gu dee maleva laa?

⁵ Gai de masavaa naa huu aana e gidee ai dana ssiibi, gai ia e hagauda ange naa gi honga dono eu gu lodo malangilangi,

⁶ ga ahe gi dono hale. Gai ia e hagabuni mai naa ono soa ma gilaadeu e paa ange gi de ia ga hai ange, ‘Goodou malangilangi madali au, dagu ssiibi nei ne dee maleva gai gu gidee ange hogi!’

⁷ Au e hai adu gi goodou bolo e bei ai hogi, e kii ange de laumalie de malangilangi i de langi i de dahuli lodo o dahi dangada haisala i dangada heohi e dinosiva ma dogosiva gu lava laa i de daahuli.

De mee hagasengasenga o tibaa selevaa gu dee maleva laa

⁸ “Gai goai de hine e madaangahulu ana dibaa selevaa, gai noo dahi gu dee maleva, ia e dee haula naa de laama ga tahi de hale ga hagaduu ngae ga ssala ga dae ai gi dana gidee?

⁹ Gai de masavaa naa huu aana e gidee ai tibaa selevaa laa, gai ia ga hagabuni ono soa ma gilaadeu e paa ange gi de ia, ga hai ange, ‘Goodou malangilangi madali au, au gu gidee tibaa selevaa aagu gu dee maleva laa!’

¹⁰ Au e hai adu gi goodou, de gau de langi a de Maadua e malangilangi donu hogi i de dahuli lodo o dahi dangada haisala.”

De mee hagasengasenga o tama daane gu dee maleva laa

¹¹ Iesu ne hai ange hogi gi dangada, “E dahi daane e dogolua ana dama daane.

¹² Tama gauligi ne hai ange gi dono damana, ‘Dogu damana, gaamai dogu duuhanga i au mee alodahi.’ Aagai dono damana ga vvae ange ana mee alodahi gi luaana dama daane.

¹³ Dua hanu laangi gai tama gauligi ga hagabudu ana mee alodahi ga hano ai gi dahi henua mmao, gai ia ga hai moumou ana mee i de hai denga dahulinga dee heohi.

¹⁴ Gai ga odi huu ana mee, gai gu hai de onge laumalie i de henua laa, gai ia gu duasala i hiidinga gu deai ana mee.

¹⁵ Gai ia ga hano ga hai hegau ange gi dahi dangada o de henua laa, gai taane laa ne hai ia gi hano gi hangaina ana biigi i de mommee iai helii.

¹⁶ Gai tama daane nei ne lodo mmao e gai gai a denga biigi, gai e deai hogi se dangada e gaavange gi de ia dahi mee e gai ia.

¹⁷ Aagai ga gidee iho huu e ia ono dagodo, gai ia ga hagadaba, ‘De gau hai hegau soa o dogu damana e lagolago mmao alaadeu gai, gai au e magau i de hiigai i kinei!

¹⁸ Au ga hidi age nei e ahe gi daho dogu damana, gai au ga hai ange gi de ia: Dogu damana, au gu haisala ange gi de Maadua aama adu gi de goe.

¹⁹ Gu dee heohi dogu hagabinga bolo se dama niiau, gai koe haia ngau gi se dangada hai hegau niiou.’

²⁰ Gai tama daane laa ga hidi age ga ahe mai gi daho dono damana. Gai de masavaa huu a dono damana ne gidee adu ai ia i de mommee mmao, gai ia gu lodo aloha i de ia, gai ia ga savini ga hano ga buuludi ange ia ma de oso.

²¹ Gai dana dama ga hai ange gi de ia, ‘Dogu damana, au gu haisala ange gi de Maadua aama adu gi de goe. Gu dee heohi dogu hagabinga bolo se dama niiau.’

²² Gai tamana ga hai ange gi ono dangada hai hegau, ‘Goodou hagamoolau gaamai de malo danuaa hakahu ina ange ai ia. Gai ulumagina ange de buulei gi dono lima aama mee vae gi luoono vae.

²³ Gaamai hogi de kaau gauligi gu haangai ma gu bedi e daa, gai gidaadeu ga gaimee ma de malangilangi!

²⁴ Go hiidinga dagu dama daane nei gu magau, aagai gu mouli age ange hogi. Ia gu dee maleva, gai gu gidee ange hogi.’ Aagai gilaadeu ga daamada de gaimee ma de lodo danuaa.

²⁵ De masavaa laa gai tama madua gu hano gi de mommee iai denga veelenga; gai ga ahe mai huu ia ga baa mai gi de hale, gai ia gu langona dangada e hagadangidangi i madila ma de aanu.

²⁶ Gai ia ga hagahi dahi dangada hai hegau ga ssili ange be ni aha gu hai laa.

²⁷ Gai tangada hai hegau laa ga hai ange gi de ia, ‘Doo daina daane gu ahe mai, gai dooluu damana gu daa de kaau gauligi gu haangai laa ma gu bedi, go hiidinga dana dama daane gu mouli ma gu ahe mai.’

²⁸ Aagai tama madua gu dee lodo e ulu gi lodo, i hiidinga ia gu lili mmao. Aagai dono damana ga sao mai ga hagahi ia gi ulu gi lodo.

²⁹ Aagai tama madua ga hai ange gi dono damana, ‘Gu lagolago ngadau oogu ne hai hegau adu ai gi de goe, gai au tee oha donu dahi au hainga daudahi. Aagai koe tigi gaamai donu dahi guudi e gaimee ai au ga lodo danuaa madali ogu soa.

³⁰ Gai ga humai donu huu dau dama daane ne gaavee naa au mee ga hai moumou i daho denga haahine hai be se manu, gai koe ga daa ange gi de ia de kaau gauligi gu haangai laa ma gu bedi!’

³¹ Gai dono damana ga hai ange gi de ia, ‘Dagu dama, koe e noho i ogu daha i masavaa alodahi, gai agu mee alodahi niiau.

³² Gai e danuaa taadeu gaimee ga lodo danuaa ma de malangilangi, go hiidinga doo daina daane gu magau, aagai gu mouli age ange hogi; ia gu dee maleva, gai gu gidee ange hogi.’ ”