Luke 13 - De Beebaa Dabu

Dahuli oo lodo gi dee magau ai goe

¹ De masavaa laa gai e hanu i magavaa o dangada ne tala ange gi Iesu dagodo o de gau Galilee a Pilate ne daa laa ga maakau, ga hilo ange olaadeu dodo gi alaadeu sigidaumaha.

² Iesu ne hai ange, “Goodou e hagataba bolo de gau Galilee laa e baubau ange i dangada i Galilee alodahi, go hiidinga gilaadeu ne hagaduasala ai?

³ Au e hai adu gi goodou, e deai! Aagai noo goodou e dee daahuli oodou lodo, gai goodou alodahi e odi naa donu hogi i de maakau.

⁴ Gai dangada e tinoangahulu ma dogovalu ne baguu iho laa de hale maolunga i Siloam ga daa gu maakau, goodou e maanadu bolo gilaadeu e baubau ange i dangada alodahi nogo nnoho laa i Jerusalem?

⁵ Au e hai adu gi goodou, e deai! Gai noo goodou e dee daahuli oodou lodo, gai goodou alodahi e odi donu i de maakau bei olaadeu dagodo.”

De mee hagasengasenga o de fig

⁶ Iesu ne tala ange hogi gi dangada de mee hagasengasenga nei: “E dahi daane ne doo dahi fig i dana veelenga. Gai ia ne hano e sala hua i de manu laa gai teai ana mee ne gide ai.

⁷ Aagai ia ne hai ange gi tangada e diiloo ange de veelengaa grape, ‘Gu dolu ngadau oogu ne aheahe mai ai e sala hanu hua i de fig nei, gai au tee gidee hanu. Selea iho! Gu aha gu dugu ai de manu naa e hagamuimui ai de gelegele nei?’

⁸ Aagai tangada boli laa ne hai ange gi de ia, ‘Tangada aamua, dugua mai de fig nei i de ngadau nei; gai au ga geli luu baasi e boli ange i mee e hagassomo ai manu.

⁹ Aagai noo e hua i de ngadau e humai nei, gai gu danuaa; aagai noo e deai, gai koe ga sele iho.’ ”

De hagaieiangi a Iesu de hine gogo gi mua

¹⁰ Dahi laangi o Sabbath gai Iesu e agoago i dahi synagogue.

¹¹ Aagai e dahi hahine i kilaa gu iai de hagasaalunga baubau i e madaangahulu ma valu ngadau, gai ia e gogo gi mua gu dee maua i de duu gi soe gi lunga.

¹² Gai de masavaa huu a Iesu ne gidee ai ia, gai ia ga hagahi ia ga hai ange, “De hine nei, koe gu ieiangi mai i doo magi!”

¹³ Aagai Iesu ga dugu ange luoono lima gi ono elunga, gai de hine laa gu maua i de duu gi soe gi lunga, aagai ia ga tuhi de Maadua.

¹⁴ Aagai tagi o synagogue gu lili go hiidinga Iesu gu hagaieiangi magi i de laangi o Sabbath. Gai taane nei ga hai ange gi dangada, “E ono laangi e heohi ai de hai oodou hegau; deenei ai goodou loomai i laangi laa ga hagaieiangi oodou magi, gai goodou gi dee loomai i de laangi o Sabbath!”

¹⁵ Tagi Maolunga ne hai ange gi de ia, “Goodou ni dangada e daahanga ina dangada! Dahi ma dahi i goodou e dee tala laa dana kaau aabe go dana donkey ga dagi gee mai i lo tono buibui ga kave e hagaunu i de laangi o Sabbath?

¹⁶ Gai de hine nei se dama donu nii Abraham gai ne noodia e Satan i e madaangahulu ma valu ngadau; gai e dee kii ange laa de heohi de hai gi ilaage de hine nei mai i dono magi i de laangi o Sabbath?”

¹⁷ Gai ga basa ange huu Iesu bee nei gi ono hagadaumee, gai gilaadeu gu dookaa, gai dangada alodahi gu malangilangi i mee hagalele mouli alodahi aana gu hai.

De mee hagasengasenga o de golee o de mustard

¹⁸ Iesu ne ssili ange, “Dee hee tagodo o de nohoanga hodooligi o de Maadua? Aagai se aha aagu e hagadagodo ange aagena?

¹⁹ E bei dagodo o de golee o de mustard a dahi dangada ne kave laa ga doo i dana veelenga. Gai de manu laa gu somo ga laumalie, aagai denga manu llele ga loomai ga hai olaadeu hoohanga i honga ono laa.”

De mee hagasengasenga o mee hagahua

²⁰ Iesu ne hai ange hogi, “Se aha ange aagu e hagadagodo ange aagena de nohoanga hodooligi o de Maadua?

²¹ E bei mee hagahua a dahi hahine e kave laa ga hhao ange gi lodo e dolu hagabaaunga pelaoaa mada, ga dae ai gi de hhua mee laa alodahi.”

De haitoga mada damaa mee

²² Ia ne hano e hagadaga i denga aduhale ma mommee nnoho hugadoo e agoago ai, ga hano ai gi Jerusalem.

²³ Gai dahi dangada ne ssili ange gi de ia, “Tagi Maolunga, e sogoisi naa donu huu dangada e hagamouli?” Iesu ne hai ange gi dangada,

²⁴ “Goodou hagaduu ngae gi ulu goodou i de haitoga mada damaa mee; go hiidinga e soa naa dangada e hagatale de ulu ai gai e dee maua e gilaadeu.

²⁵ De masavaa naa huu o tangada niiona de hale e pono ai de haitoga, gai goodou e tuu naa i duaahaho ga dugidugi ai de haitoga, ga hai ange, ‘Tagi Maolunga, huugea mai de haitoga e ulu adu ai gimaadeu!’ Gai ia e hai adu naa gi goodou, ‘Au e dee iloo donu be go hee oodou ne loomai ai!’

²⁶ Gai goodou e hai ange naa gi de ia, ‘Gimaadeu ne gaimee ma de unu madali goe, gai koe ne agoago i lodo omaadeu aduhale!’

²⁷ Gai ia e hai adu naa gi goodou, ‘Au e dee iloo donu goodou, goodou ni dangada mai i hee. Goodou hulo gee mai i ogu daha, goodou alodahi ni dangada e haia mee dee heohi!’

²⁸ Gai goodou e tangi naa ma de hagaida oodou gauvae, i doodou gide Abraham, ma Isaac, ma Jacob, aama denga pelaabisi alodahi e nnoho i de nohoanga hodooligi o de Maadua, gai goodou gu tili gi duaahaho!

²⁹ Dangada e loomai naa i dua ma dai, ma ngaiho ma ngaage ga noho i teebele i de nohoanga hodooligi o de Maadua.

³⁰ Gai tilo, hanu gilaadeu e hagaodia mai e hai naa go gilaadeu i mua, gai hanu gilaadeu i mua e hai naa go gilaadeu e hagaodia.”

De dangi o Iesu i hiidinga o Jerusalem

³¹ De masavaa laa gai denga Pharisee ne loomai ga hai ange gi de ia, “Hano gee mai i kinei, go hiidinga Herod e lodo e daa goe gi magau.”

³² Iesu ne hai ange gi gilaadeu, “Goodou hulo hai ange gi de gaaduu de vao naa, ‘Au e hai gi hulo gee hagasaalunga baubau ma de hagaieiangi magi ailaa nei ma daiao, gai au e hagalava naa agu hegau i de laangi adu laa naa.’

³³ Gai e heohi dogu hano ailaa nei ma daiao, aama de laangi adu ange laa; gai e dee heohi de daa gi magau o dahi pelaabisi i dahi mommee gee ange ma Jerusalem.

³⁴ Jerusalem, Jerusalem, de aduhale ne daia ga maakau denga pelaabisi ma de maga i hadu gilaadeu ne hai gi loomai gi de aduhale! Gu dee modu dogu lodo e hagabudu au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

³⁵ Deenei ai, doodou hale daumaha gu tili adu gi goodou. Ni muna abodonu aagu e tala adu nei gi goodou, goodou e dee gidee ange naa ngau ga dae ai gi doodou hagataba, ‘E manuuia tangada e humai i de ingoo o Tagi Maolunga!’ ”