Luke 12 - De Beebaa Dabu

De hagakana ange i dagodo o denga Pharisee

¹ De masavaa huu ne kona ai de soa dangada ne hagabuni mai, gai gu dee oo dangada, gai ia ga daamada de hai ange gi ana dangada agoago, “Goodou dagidiiloo goodou i mee hagahua a denga Pharisee, go delaadeu daahanga dangada.

² Mee alodahi e hagammuni e hagaago mai naa donu, aagai mee alodahi e dee iloo e hai naa donu ga iloo.

³ Gai mee alodahi oodou gu tala i lo te gohu e tala naa ga langona i de maalama, gai mee alodahi oodou gu musumusu i de aabi i lodo e tala naa i tua denga hale.

Goai oodou e maatagu ai

⁴ “Ogu soa, au e hai adu gi goodou, goodou gi dee maatagu i gilaadeu e daia ga magau de angaanga, gai muli mai gu deai ange alaadeu mee e mau i de hai.

⁵ Aagai au e tala adu be goai e heohi doodou maatagu ai: goodou maatagu i de ia e maua i de daa gi maakau, gai muli mai e dahi ono sauaa e tili ange ai goodou gi lo te ahi. Au e hai adu gi goodou: goodou maatagu i de ia!

⁶ E dee lua laa donu huu sseene e hagao ai e lima sparrow? Gai de Maadua e dee ngalo donu dahi gilaadeu.

⁷ Ngaangaaulu alodahi i oodou biho gu odi i de dau. Deenei ai, goodou gi dee maatagu, i hiidinga goodou e hagamogomogo ange i denga sparrow lagolago!

De tala hagadonu Klisdo i madamada o dangada

⁸ “Au e hai adu gi goodou, be goai e daalaa bolo ia se dangada niiogu i madamada o dangada, gai Tama a Tangada e tala naa hogi bolo ia se dangada niiona i madamada o denga dangada de langi o de Maadua.

⁹ Aagai be goai e hagadee iloo ina au i madamada o dangada, gai au e hagadee iloo naa hogi ia i madamada o de gau de langi o de Maadua.

¹⁰ Gai be goai e hagangadi mee ina Tama a Tangada i ana muna, gai de Maadua e tala donu ono haisala. Aagai be goai e hagangadi mee ina de Hagasaalunga Dabu i ana muna, gai e dee tala donu ono haisala.

¹¹ Noo gilaadeu gu kave goodou gi synagogue e hagamodu ai oodou muna i mada i mua o denga dagi ma gilaadeu iai ssauaa, gai goodou aude manavasaa i doodou hai e pasa ange ai gi gilaadeu, aabe go oodou muna e tala ange gi gilaadeu.

¹² Go hiidinga de Hagasaalunga Dabu e gaavadu naa donu gi goodou mee e heohi doodou tala i de aoaa laa donu huu.”

De mee hagasengasenga o taane lava lodo senga

¹³ Dahi dangada i magavaa o dangada ne hai ange gi Iesu, “Tangada Agoago, hai ange gi dogu daina daane gi vaaea gimaau i mee a demaau damana.”

¹⁴ Iesu ne hai ange gi de ia, “Taane nei, goai ne haia ngau gi se dangada hagamodu muna aabe se dangada e vaaea ooluu mee ma doo daina?”

¹⁵ Gai ia ga hai ange gi dangada, “Goodou kana ange dagidiiloo gi dee nnoo hagamau mee goodou; go hiidinga de mouli o tangada e dee go goloa lagolago.”

¹⁶ Iesu ne tala ange hogi gi dangada dahi mee hagasengasenga, ga hai ange, “De alahenua o dahi daane lava ne lagolago mmao huamanu ne hagihagi ai.

¹⁷ Gai taane laa ne hagadaba i ono lodo, ‘Ni aha aagu ga hai, go hiidinga gu deai donu se mommee e doange ai agu huamanu?’

¹⁸ Gai ia ga hagadaba, ‘Deenei dagu mee e hai: au e oha naa ogu hale doange gai, gai au ga hagatuu age hanu gi kii ange de nnui, gai au ga doange ai agu huamanu aama agu mee alodahi.

¹⁹ Gai au ga basa iho donu huu gi de au, ga hai mai, “Gu lagolago mee ne doange e mouli ai goe i ngadau lagolago e loomai; koe gi noho baba, gaimee ma de unu ma de malangilangi.” ’

²⁰ Aagai de Maadua ga hai ange gi de ia, ‘Taane lodo senga! Aaboo nei gai au ga kave nei doo mouli, gai goai ai naa e hagadanuaa i mee aau gu hagadabena adu naa gi de goe?’

²¹ E bei ai hogi dagodo o tangada e hagabudu ina laa ga doange goloa lagolago, gai e dee lava i mee o de Maadua.”

Goodou aude manavasaa

²² Iesu ne hai ange gi ana dangada agoago, “Deenei ai, au e hai adu gi goodou, goodou aude manavasaa i oodou mouli, ma oodou mee e gai, aabe gi manavasaa i oodou angaanga, i mee oodou e kahu ai.

²³ De mouli o tangada e hagamogomogo ange i denga gai, gai de angaanga e hagamogomogo ange i mee e kahu ai.

²⁴ Goodou kalo ange diiloo denga raven: gilaadeu e dee doo, be hagihagi; e deai hogi olaadeu hale doange aabe ni mommee doange gai; gai de Maadua e haangai ange gilaadeu. Gai goodou e hagamogomogo ange i denga raven!

²⁵ Gai goai i oodou magavaa e maua i de hagapuni ange dahi ange aoaa e looloa ai dono mouli, i dana maanadu ga manavasaa ai?

²⁶ Noo goodou e dee maua i de hai de mee damaa mee nei, gai gu aha gu manavasaa ai naa oodou lodo i mee ange laa?

²⁷ Goodou kalo ange diiloo denga lilii: gilaadeu e dee hai hegau aabe e llanga olaadeu malo. Aagai au e hai adu gi goodou: Solomon, i dono mahamaha alodahi tee gahu hagadanuaa donu bei dagodo o dahi lilii nei.

²⁸ Aagai noo de Maadua e hakahu denga helii, e mouli laa ailaa nei i lo te duu malaelae, gai daiao gu tili ange gi lo te ahi, gai dee hee maa naa de kii ange dana lodo e hakahu goodou — goodou e vaaligiligi oodou kai!

²⁹ Gai goodou gi dee saalaa donu oodou mee e gai ma de unu, aabe gi manavasaa oodou lodo i mee nei.

³⁰ Gai denga huaahenua alodahi e hagadee saohia ange gi mee nei alodahi, gai doodou Damana e iloo donu e ia bolo goodou e duasala i mee nei.

³¹ Aagai goodou saalaa i mua de nohoanga hodooligi o de Maadua, gai mee nei e odi naa donu hogi i de gaavadu gi goodou.

De lava i de langi

³² “Dagu hagabuulingaa ssiibi damaa mee, goodou gi dee maatagu, go hiidinga doodou Damana e malangilangi donu i de gaavadu gi goodou de nohoanga hodooligi.

³³ Hagao ina oodou goloa gi daha, ga gaavange sseene gi de gau hagaau aloha. Haia gi hanu oodou mee hhao sseene e dee maua laa gi pobo, go goloa hagamogomogo i de langi e dee maua laa gi odi, go de mommee a tangada gaiaa e dee humai aagena gai de goa e dee maua i de oohaa.

³⁴ Go hiidinga be go hee naa huu iai oodou goloa hagamogomogo, gai go kilaa hogi iai oodou lodo.

De gau hai hegau e kana ange ma e dagitilo

³⁵ “Goodou kahu hagadaabena ange e hai hegau ma de haula oodou laama.

³⁶ Goodou gi bei dagodo o de gau hai hegau e daalia laa delaadeu dangada aamua gi ahe mai i taonga hagahai bodu, gi maua ai e gilaadeu i de hhuge ange de haitoga gi de ia i de masavaa oona e humai ai ga dugidugi.

³⁷ E manuuia de gau hai hegau a tangada aamua e humai ga gidee bolo gilaadeu e dagitilo, i de masavaa oona e dae mai ai. Ni muna abodonu aagu e hai adu nei gi goodou, ia e gahu naa ga hagadabena ga hai gilaadeu gi hakaogao i teebele gi gaimee ai, gai ia ga gaavange alaadeu gai.

³⁸ E manuuia de gau hai hegau e nnoho laa ga dagitilo, ga dae ai gi de ahe mai o delaadeu dangada aamua, noo ia e dae mai i de lua aabe go tolu masavaa dagitilo.

³⁹ Goodou gi iloo de mee nei: noo tangada niiona de hale e iloo de masavaa o tangada gaiaa e humai ai, aagai ia e dagitilo naa ga buibui gi dee oohaa dono hale.

⁴⁰ Goodou gi haia gi paba goodou, go hiidinga Tama a Tangada e humai naa i de masavaa oodou e dee maanadu ai bolo ia e dae mai.”

Tangada e hai hegau i de mee abodonu ma tangada e deai

⁴¹ Peter ne ssili ange gi de ia, “Tagi Maolunga, koe ne tala mai naa donu huu de mee hagasengasenga naa gi gimaadeu aabe ange gi dangada alodahi?”

⁴² Gai Tagi Maolunga ne basa ange ga hai ange, “Gai goai naa huu tangada e hai hegau i de mee abodonu gai se dagi e heiangi, go ia a dono dangada aamua e dugu ange mee alodahi i dono hale ia gi diiloo ange, gai ia ga gaavange ai gi de gau hai hegau alaadeu gai i de masavaa heohi?

⁴³ E manuuia tangada hai hegau a dono dangada aamua e gidee bolo ia gu hagassula ana muna i dono masavaa e humai ai!

⁴⁴ Ni muna abodonu aagu e hai adu nei gi goodou, tangada aamua e hai naa ia go tagi o ana mee alodahi.

⁴⁵ Aagai noo tangada hai hegau laa e hagadaba i ono lodo, ‘Dogu dangada aamua e mmule naa donu de ahe mai,’ gai ia ga daamada de daa denga daane ma haahine hai hegau ma de gaimee ga unu gu senga,

⁴⁶ gai tangada aamua o tangada hai hegau laa e humai naa i de laangi aana e dee maanadu ai bolo ia e humai, ma de aoaa aana e dee iloo laa. Gai ia e hagaduasala naa ia ga hai ia gi noho madali gilaadeu e dee hagadonusia.

⁴⁷ Tangada hai hegau e iloo laa e ia mee o dono dangada aamua e lodo ai, aagai ia e dee hagadabena ange aagena aabe e hai gi bei lodo o dono dangada aamua e hagailiili naa donu i hanonga lagolago.

⁴⁸ Aagai tangada e dee iloo, gai ia ga hai mee e heohi ai dono hagailiilia, e dee kona naa donu dono hagailiili. Gai be goai ne gaavange aagena mee lagolago, aagai e hai naa hogi ia gi gaavange mee lagolago. Gai tangada ne lanea mee ne gaavange gi de ia, e kii ange naa hogi de lanea mee e hai ia gi gaavange.

Iesu e vvae magavaa o dangada

⁴⁹ “Au ne humai e tili ange de ahi gi honga henua i lalo, gai mee naa de ahi gu lava donu i de haula!

⁵⁰ E dahi babudaisi oogu gu baba ange e babudaisi ai, gai au e daemaha ogu lodo ga dae ai gi de hagalava!

⁵¹ Goodou e maanadu bolo au ne humai e gaamai de baba gi henua i lalo? E deai, au e hai adu gi goodou, au ne humai e vvae magavaa o dangada.

⁵² Dua iainei gai e hagadaumee naa e dogolima dangada i dahi hale, e dogodolu e hai baasi ange naa gi e dogolua gai e dogolua ange gi e dogodolu.

⁵³ Tamana gi hai baasi ange gi dana dama daane, gai tama daane ange gi dono damana; tinana gi hai baasi ange gi dana damaa hine, gai tamaa hine ange gi dono dinana; tinana o tama daane gi hai baasi ange gi dono saulaba, gai dono saulaba gi hai baasi ange gi de ia.”

De tonu ange gi dagodo o de masavaa

⁵⁴ Iesu ne hai ange gi dangada soa, “De masavaa oodou e gidee ai de hagausinga gu hanage i dai, gai goodou e hagataba, ‘Gu dai pala de langi,’ gai e bei donu oodou muna.

⁵⁵ Aagai de masavaa oodou e gidee ai de madangi e ssau mai i ngaage gai goodou e hagataba, ‘E hagavvela naa de mee,’ gai e bei donu oodou muna.

⁵⁶ Goodou ni dangada e daahangadia dangada! Goodou e tonu ange gi dagodo mee o henua i lalo ma de langi, aagai goodou e dee tonu ange gi dagodo o de masavaa go iainei?

Hagaheloongoi ina ooluu magavaa ma doo hagadaumee

⁵⁷ “Gu aha goodou gu dee iloo ai i de hagamodu be se aha e heohi i de hai?

⁵⁸ Noo gu seesee gooluu ma doo hagadaumee e hulo gi de mommee hagamodu muna, gai koe hagamoolau hagaheloongoi ina ooluu magavaa i mua dooluu tae gi de mommee hagamodu muna, kana gaavange naa e ia goe gi de ia hagamodu muna, gai tangada hagamodu muna ga hai tangada hagaloosi gi dilia ange goe gi lo te hale pono.

⁵⁹ Au e hai adu gi de goe, koe e dee sao mai naa donu ga dae ai gi dau hagao ga odi au muli.”