Luke 11 - De Beebaa Dabu

De agoago i dagodo o talodalo

¹ Dahi laangi gai Iesu e dalodalo i dahi mommee, gai ga lava huu ono dalodalo, gai dahi ana dangada agoago ne hai ange gi de ia, “Tagi Maolunga, agoagona mai gimaadeu i de hai omaadeu e dalodalo ai, bei de hai a John gu agoago ange ai laa hogi ana dangada agoago.”

² Iesu ne hai ange gi gilaadeu, “De masavaa naa huu oodou e dalodalo ai, gai goodou ga hai ange: ‘Tamana, gi dabu doo ingoo; gi humai doo nohoanga hodooligi.

³ Gaamai gi gimaadeu gai e danuaa mai gi gimaadeu i dahi laangi ma dahi laangi.

⁴ Gai daalaa omaadeu haisala, bei demaadeu tala haisala olaadeu e haisala mai gi gimaadeu. Gai gi dee dagina ange gimaadeu gi de hagatale.’ ”

⁵ Gai ia ga hai ange gi gilaadeu, “Noo dahi goodou e dahi ono soa, gai dono soa ga hano gi ono daha i lo te boo, ga hai ange, ‘Dogu soa, gaamai e dolu duudangaa pelaoaa maagu,

⁶ go hiidinga dahi ogu soa gu humai gi ogu daha, gai au e deai donu agu gai e gaavange gi de ia.’

⁷ Gai tangada i lo te hale ga basa ange naa i lodo, ga hai ange, ‘Aude hakoso ina ngau iainei! Dogu haitoga gu hagamakaga, gai agu dama e sseni madali au i omaadeu moenga. Au e dee maua i de hidi age e gaavadu gi de goe hanu mee.’

⁸ Au e hai adu gi goodou: noo tangada i lo te hale e dee hidi age e gaavange hanu mee gi de ia i hiidinga gilaau se hai soa, aagai ia e hidi age naa donu ga gaavange mee alodahi oona e lodo ai, i hiidinga dono soa tee helui dono hagammahi ga dangidangi.

⁹ Gai au e hai adu gi goodou: dangidangi gai e gaavadu naa donu gi goodou; saalaa gai goodou ga gidee; dugidugi gai e hhuge adu naa donu gi goodou.

¹⁰ Gai tangada e dangidangi e maua naa ana mee, tangada e saalaa e gidee ana mee, gai tangada e dugidugi e hhuge ange donu gi de ia.

¹¹ Gai goai tamana i oodou magavaa e gaavange gi dana dama dahi labodo, noo ia e dangidangi ange i hanu mamu?

¹² Aabe dana dama e dangidangi ange i dahi ngago, gai ia ga gaavange gi de ia dahi manu manga lua?

¹³ Goodou ni dangada baubau, gai goodou e iloo de hai e gaavange ai mee danuaa gi oodou dama. Aagai doodou Damana i de langi, e kii ange donu dono lodo e gaavange de Hagasaalunga Dabu gi gilaadeu e dangidangi ange ai gi de ia!”

Iesu ma Beelzebul

¹⁴ Iesu ne hai gi hano gee dahi hagasaalunga baubau, mai i daho dahi dangada e dee maua laa i de basa; gai ga hano gee huu de hagasaalunga baubau laa i ono daha, gai taane laa gu maua i de basa. Gai dangada gu llele mouli,

¹⁵ gai hanu dangada ne hagataba, “Ia e hai gi hulo gee hagasaalunga baubau i ssauaa o Beelzebul, tagi o denga hagasaalunga baubau.”

¹⁶ E hanu hogi dangada i kilaa e llodo e hagatale Iesu; gilaadeu ne llodo ia gi hagaagona ange dahi hagailonga mai i de langi.

¹⁷ Aagai ia e iloo alaadeu maanadu, ga hai ange gi gilaadeu, “De nohoanga hodooligi e hagadau hai baasi, e dee maua donu gi sula; de huaabodu e hagadau hai baasi, e dee maua hogi gi hagadagadaga age.

¹⁸ Gai noo Satan e hai baasi ange donu huu gi de ia, gai dee hee de hai e maua ai gi duu dono nohoanga hodooligi? Go hiidinga goodou e hagataba bolo au e hai gi hulo gee denga hagasaalunga baubau i ssauaa o Beelzebul.

¹⁹ Gai noo au e hai gi hulo gee denga hagasaalunga baubau i ssauaa o Beelzebul, gai niioai ai ssauaa a oodou dangada agoago e hai ai gi hulo gee denga hagasaalunga baubau? Deenei ai, go oodou dangada agoago e hagamodu ina oodou muna.

²⁰ Gai noo au e hai gi hulo gee denga hagasaalunga baubau i ssauaa o de Maadua, gai de nohoanga hodooligi o de Maadua gu dae mai donu gi oodou daha.

²¹ De masavaa o taane mmahi e hagauda ai ono goloa hebagi ga hagaloosi ai dono hale, gai ono goloa e daakodo danuaa.

²² Aagai de masavaa naa huu o dahi e mmahi ange laa i de ia e humai ai ga hebagi ange ga hagadee kii ia, gai ia ga kave goloa hebagi a taane laa e tali hagalodolodo ange laa aagena, ga duha ana goloa ne hai gi de mahi.

²³ Be goai e dee noho madali au e hai baasi mai donu gi de au; gai be goai e dee hagabudu madali au e hagassiia saele.

De aahe mai o denga hagasaalunga baubau

²⁴ “De masavaa naa huu o de hagasaalunga baubau e sao ai ga hano gee mai i daho tangada, gai ia ga hano laa mommee e deai vai iai e ssala ai dono mommee e hagamabu ai. Gai ga dee gidee huu e ia dahi mommee, gai ia ga hagadaba, ‘Au ga ahe nei gi de hale oogu ne humai ai nei.’

²⁵ Gai de masavaa huu oona ne ahe mai ai, gai ia gu gidee bolo de mommee laa gu lava i de hagagilimalali ma gu hagadanuaa.

²⁶ Gai ia ga hano ga ssala mai ange e dogohidu hagasaalunga e baubau ange i de ia, gai gilaadeu ga ulu i kilaa ga nnoho ai. Gai dagodo o tangada laa i muli mai gu kii ange de baubau i taamada age.”

De manuuia abodonu

²⁷ De masavaa a Iesu ne tala ai mee laa, gai dahi hahine i magavaa o dangada ne hagaleo laumalie ga hai ange gi de ia, “E manuuia de hine ne hanaua goe ma de hakaa unuunu goe!”

²⁸ Iesu ne hai ange gi de ia, “Gai e kii ange donu de manuuia o dangada e hagalaangona muna a de Maadua ga daudali ai!”

De hagailonga o Jonah

²⁹ Gai ga hagadaga ange huu de soa dangada, aagai Iesu ga daamada de basa ga hai ange, “De atangada nei se atangada baubau! Gilaadeu e ssala dahi hagailonga, gai e deai ange donu se hagailonga e hagaago ange gi gilaadeu, go de hagailonga donu huu o Jonah.

³⁰ Jonah se hagailonga ange gi dangada o Nineveh, aagai Tama a Tangada se hagailonga ange gi dangada o de atangada nei.

³¹ De hine hodooligi mai i Ngaage e hidi age naa i de laangi hagamodu muna ga hagabaubau dangada o de atangada nei, go hiidinga ia ne humai i de bido laa o henua i lalo e hagallongo dagodo de heiangi o Solomon, gai tilo, dahi e maolunga ange i Solomon gu i kinei.

³² Dangada o Nineveh e hiihidi age naa ga hagabaubau de atangada nei i de laangi hagamodu muna, go hiidinga gilaadeu ne daahuli olaadeu lodo i agoago a Jonah, gai tilo, dahi e maolunga ange i Jonah gu i kinei!

De laama o de angaanga

³³ “E deai se dangada e haulasia de laama ga dugu i de mommee lilo aabe go lalo dahi bagede; aagai e gaavange gi honga de mommee dugu laama, gi gidee ai e dangada e ulu i de hale de maalama.

³⁴ De ganomada go de laama o de angaanga; ga danuaa naa huu doo ganomada gai doo angaanga alodahi gu maalama; aagai ga magi naa huu doo ganomada gai doo angaanga alodahi e gohu.

³⁵ Gai goodou dagidiiloo gi dee hagagohu de maalama i oodou lodo.

³⁶ Gai noo doo angaanga alodahi e maalama, e deai se mommee gohu iai, gai gu maalama alodahi, bei de masavaa o de laama e hagamaalama ai laa goe.”

Iesu e hagabaubau denga Pharisee ma de gau agoago o de hainga

³⁷ De masavaa o Iesu e agoago ai, gai dahi Pharisee ne ssala ange ia gi hanadu e gaimee i dono hale; aagai Iesu ne hano ga ulu i kilaa ga noho e gaimee.

³⁸ Gai de Pharisee laa ne lele ono mouli i dana gide bolo Iesu tee hhui luoono lima i mua dono gaimee.

³⁹ Aagai Tagi Maolunga ga hai ange gi de ia, “Goodou denga Pharisee e hagagilimalali laa daha o de ubu ma de gumedi, gai oodou lodo e hoohonu i de nnoo hagamau mee ma de baubau.

⁴⁰ Goodou ni dangada llodo ssenga! E dee go de Maadua ne haia ngaadahi oodou lodo ma oodou angaanga?

⁴¹ Aagai goodou ngadi gaavange mee i lodo oodou ubu gi de gau hagaau aloha, gai tilo, mee alodahi e odi naa i de gilimalali adu gi goodou.

⁴² E vakaa naa goodou e denga Pharisee! Goodou e gaavange dahi diba i diba e madaangahulu o oodou mint ma rue aama mee mai i denga manu ssomo, gai e hagangadi mee de hagamodu muna heohi ma de aloha o de Maadua. E heohi donu doodou hai mee nei, gai e dee tili mee ange laa.

⁴³ E vakaa naa goodou e denga Pharisee! Goodou e llodo e nnoho i duulanga danuaa i lodo synagogue, ma de hagaboo adu o dangada gi goodou i denga mommee hagao mee.

⁴⁴ E vakaa naa goodou! Go hiidinga goodou e bei dagodo o denga daanunga e dee gidee laa e dangada, gai dangada e dee iloo bolo gilaadeu e seesee i olaadeu elunga.”

⁴⁵ Dahi dangada agoago o de hainga ne hai ange hogi gi de ia, “Tangada Agoago, koe e hagadookaa donu hogi gimaadeu i au muna!”

⁴⁶ Iesu ne hai ange gi de ia, “E vakaa naa hogi goodou e de gau agoago o de hainga! Goodou e hagauda ange mee daemaha gi honga o dangada, gai goodou e dee hagauda donu mee nei i dahi oodou madannia daudahi.

⁴⁷ E vakaa naa goodou! Goodou e hagatuu denga daanunga o denga pelaabisi a oodou dubuna madagidagi ne daa laa ga maakau.

⁴⁸ Gai goodou e tala hagadonu ma de hagabuni ange gi hegau a oodou dubuna madagidagi ne hai; gilaadeu ne daa ga maakau denga pelaabisi, gai goodou ne hagatuu olaadeu daanunga.

⁴⁹ Deenei ai, de Maadua e hagadaba i dono heiangi, ‘Au e hai naa gi hulo gi olaadeu daha denga pelaabisi ma gau tala, gai gilaadeu e daa naa hanu ga maakau gai ga vaivai hai hanu.’

⁵⁰ Deenei ai, de atangada nei e hagaduasala naa hogi i hiidinga delaadeu daa ga maakau denga pelaabisi alodahi mai i taamada age de hai o henua i lalo,

⁵¹ mai i dodo o Abel ga dae ai gi dodo o Zechariah, ne daa ga magau i magavaa de mommee o ssigidaumaha ma de Aabi Dabu. Ni muna abodonu aagu e hai adu nei gi goodou: de atangada nei e hagaduasala naa donu i hiidinga dodo nei.

⁵² E vakaa naa goodou e de gau agoago o de hainga! Go hiidinga goodou gu kave gee de gii o de iloo mee; goodou tee ulu i de nohoanga hodooligi, gai goodou e buibui hogi dangada e llodo e ulu ai!”

⁵³ De masavaa o Iesu ne sao ai e hano gee i kilaa, gai de gau sisi ma denga Pharisee ga usuusu ange ia, ma de ssili ange hanu muna lagolago e hagatale ai ia,

⁵⁴ gai gilaadeu ga hagabaubau ai ia.