Luke 1 - De Beebaa Dabu

Muna ange gi Theophilus

¹ Gu soa dangada ne hagatale de sisi taalanga o mee ne hai i omaadeu daha,

² bei de hai ne tala mai ai gi gimaadeu i daho dangada ne gidee de hai mee nei mai i taamada, go gilaadeu ne agoago ina muna nei.

³ Deenei ai, tangada aamua go Theophilus, au ne maanadu bolo se mee danuaa hogi dagu sisi adu mee nei gi de goe, go hiidinga gu lava donu i dogu hai hegau ange ma gu ssala gi iloo danuaa e au dagodo o mee nei mai i taamada,

⁴ gi iloo ai e goe de muna abodonu i mee gu lava i de tala adu gi de goe.

De hagailoo de haanau o John taane Babudaisi

⁵ De masavaa o Herod e hodooligi ai i Judea, gai e dahi daane haimeedabu i kilaa, dono ingoo go Zechariah. Ia se daane e dau i de hagabuulinga o Abijah, gai ia ne hai bodu ange gi dahi damaa hine mai i de aamuli o Aaron, dono ingoo go Elizabeth.

⁶ Gilaau ni dangada e heohi abodonu i mada luu mada o de Maadua, gai e honu delaau daudali i muna alodahi ma hainga a Tagi Maolunga gu hagasauaa.

⁷ Aagai e deai selaau dama, go hiidinga Elizabeth se hine dee hua, gai gilaau ngaadahi gu madumaatua.

⁸ Gai de masavaa a Zechariah e hai ai hegau a tangada haimeedabu i mada luu mada o de Maadua, i laangi o dono hagabuulinga e hai hegau ai,

⁹ gai gilaadeu ne hili ia i de dada, bei dagodo tahulinga a de gau haimeedabu, gai ia ga ulu ai gi lo te temple o Tagi Maolunga ga hai ai ssigidaumaha o mee maanongi.

¹⁰ Gai dangada soa e dalodalo i duaahaho i de masavaa e hai ai ssigidaumaha.

¹¹ Gai dahi dangada de langi o Tagi Maolunga ne hakide ange gi de ia, ga duu i de baasi madau o de mommee o ssigidaumaha o mee maanongi.

¹² Gai Zechariah gu manavasaa ono lodo aama de madagu mmao i de masavaa aana ne gide ai tangada de langi laa.

¹³ Gai tangada de langi laa ga hai ange gi de ia, “Zechariah, aude madagu! De Maadua gu langona au dalodalo, gai doo bodu go Elizabeth e haanau naa dahi dama daane, gai koe ga hagaingoo ange ia go John.

¹⁴ Ia e hai naa goe ga malangilangi ma de lodo danuaa; gai e soa naa dangada e malangilangi i hiidinga dono haanau,

¹⁵ go hiidinga ia e maolunga naa i mada luu mada o Tagi Maolunga, gai ia e dee alaange de unu uvaini ma mee mmahi, gai de Hagasaalunga Dabu e noho naa i ono daha, mai i de masavaa oona i lo te dinae ai o dono dinana.

¹⁶ Gai ia e hagaahe mai naa de gau Israel soa gi Tagi Maolunga delaadeu Maadua.

¹⁷ Gai ia e hano naa i mada i mua o Tagi Maolunga, i ssauaa o de hagasaalunga ma mahi o Elijah, ga hai gi daahuli mai denga damana gi alaadeu dama, ma de hai gilaadeu e dee hagallongo i muna, gi maua de heiangi o olaadeu e heohi — aama de hagadabena dahi huaadangada ange gi Tagi Maolunga.”

¹⁸ Gai Zechariah ga hai ange gi tangada de langi laa, “Dee hee dagu hai e iloo ai bolo mee nei ni muna abodonu? Go hiidinga au gu se daane madumadua, gai dogu bodu gu madumadua hogi.”

¹⁹ Gai tangada de langi ne hai ange gi de ia, “Go au go Gabriel, au e duu i mada luu mada o de Maadua. Au ne hai gi humai gi daalaa adu gi de goe de longo danuaa nei.

²⁰ Gai tilo, koe e lau naa doo alelo ga dee maua i de basa, ga dae ai gi de hagassula mee nei, go hiidinga koe tee hagadonusia agu muna. Gai mee nei e hagassula naa donu i de masavaa gu lava laa i de hagamodu.”

²¹ De masavaa olaau e pasa ai, gai dangada i duaahaho e tali ange Zechariah, gilaadeu gu dee iloo be gu aha gu mmule ai laa dono sao mai i lo te temple.

²² Gai de masavaa huu oona ne sao mai ai, gai ia gu dee maua i de basa ange gi dangada, gai gilaadeu gu iloo bolo ia gu gidee dahi midi hagaago ange i lo te temple. Aagai Zechariah ne hagatale de tala ange ana muna i luoono lima, ia gu dee maua i de basa.

²³ Gai de masavaa huu ne odi ange ai laangi o Zechariah e hai hegau ai, gai ia ga ahe gi dono hale.

²⁴ Dua laangi laa, gai dono bodu go Elizabeth ne hai dama, gai ia ne noho donu huu tee hano saele i e lima malama; ia ne hagadaba,

²⁵ “Tagi Maolunga ne hai mai de hegau nei gi de au, i de masavaa oona ne abodonu mai ai gi de au, ga kave gee ai dogu hagadogaa mai magavaa o dangada.”

De hagailoo de haanau o Iesu

²⁶ De ono malama huu ⌊o Elizabeth⌋, gai Maadua ne hai hogi gi humai tangada de langi go Gabriel gi dahi aduhale o Galilee, e hagaingoo ange laa go Nazareth,

²⁷ gi daho dahi bua moe gu hagababa ange laa gi taane dono ingoo laa go Joseph, se hagadiilinga niio David. De ingoo o de bua moe laa go Mary.

²⁸ Gai tangada de langi laa ne humai gi Mary, ga hai ange, “De baba gi dagodo i oo daha. Tagi Maolunga e madali goe, ma de abodonu adu gi de goe!”

²⁹ Aagai Mary gu madagu mmao i hiidinga o ana muna, gai ia ne hagasaele be se hagaboo bee hee deelaa.

³⁰ Gai tangada de langi laa ga hai ange gi de ia, “Mary, aude madagu, de Maadua gu abodonu adu gi de goe.

³¹ Gai tilo, koe e hai dama naa ga haanau dahi dama daane, gai koe ga hagahi ange dono ingoo go Iesu.

³² Ia e sula naa ga maolunga, gai e hagabinga naa go Tama Daane a de Ia Maolunga Mmao laa. Gai Tagi Maolunga de Maadua e gaavange naa gi de ia de nohoanga hodooligi o dono dubuna go David,

³³ gai ia e dagi naa dangada o Jacob ga hano ai; gai dono nohoanga hodooligi e deai naa donu se odi.”

³⁴ Gai Mary ne ssili ange gi tangada de langi laa, “Au se bua moe, gai dee hee de hai e maua ai i de hai mee nei i ogu daha?”

³⁵ Tangada de langi laa ne hai ange gi de ia, “De Hagasaalunga Dabu e humai naa gi oo elunga, gai ssauaa o de Ia Maolunga Mmao laa e haoli naa goe. Deelaa ai, Tama e haanau mai i oo daha e hagabinga naa bolo e dabu, go Tama Daane a de Maadua.

³⁶ Gai tilo, doo dangada go Elizabeth gu hai dama hogi i dahi dama daane i dono masavaa gu madumadua ai nei, gai deenei de ono malama o de hine e hagabinga laa bolo se hine dee hua.

³⁷ Gai e deai donu se mee daudahi e dee maua i de hai i daho de Maadua.”

³⁸ Gai Mary ne hai ange, “Tilo, au se hine hai hegau niio Tagi Maolunga; haia gi bei au muna alodahi gu tala mai gi de au.” Gai tangada de langi laa gu hano gee ai loo mai i ono daha.

De hano o Mary gi daho Elizabeth

³⁹ Laangi laa gai Mary ne hagamoolau ga hano gi daho Elizabeth i dahi aduhale o Judea i de mommee iai duuduu,

⁴⁰ gai ia ne hano ga ulu i de hale o Zechariah ga hagaboo ange gi Elizabeth.

⁴¹ Aagai de masavaa huu a Elizabeth ne langona ai de hagaboo a Mary, gai de gaagaa i lo tono dinae laa gu ngalue. Gai Elizabeth gu honu i de Hagasaalunga Dabu,

⁴² gai ia ga basa i de leo mmahi ga hai ange, “Koe gu manuuia ange i denga haahine alodahi, gai e manuuia tama gu hagadili naa i lo too dinae!

⁴³ Gai gu aha gu maua ai nei e au de manuuia laumalie nei, go de humai o tinana o dogu Dagi Maolunga gi ogu daha?

⁴⁴ Tilo, de masavaa aagu ne langona ai dau hagaboo, gai de gaagaa i lo togu dinae gu ngalue i hiidinga dono malangilangi.

⁴⁵ E manuuia de hine gu hagadonusia bolo Tagi Maolunga e hagassula naa donu ana muna gu tala ange gi de ia!”

Taahili tuhi a Mary

⁴⁶ Gai Mary ga hagadaba, “Ogu lodo e tuhi Tagi Maolunga;

⁴⁷ gai dogu hagasaalunga gu malangilangi i de Maadua dogu Ia Hagaola,

⁴⁸ go hiidinga ia gu gidee dagodo de maolalo o dono hahine hai hegau! Tilo, dua iainei gai denga atangada alodahi e hagataba naa bolo au se hine manuuia.

⁴⁹ Go hiidinga de Ia Mmahi Mmao laa gu hai mai gi de au dahi mee hagalele mouli, gai dono ingoo e dabu.

⁵⁰ Gai ia e degi ange gi gilaadeu e maatagu i de ia, mai i dahi atangada ma dahi atangada.

⁵¹ Ia gu hagaago mai ssauaa mmahi o dono lima, ia gu hagamavaevae saele gilaadeu e maanadu hagamaolunga i olaadeu lodo.

⁵² Ia gu aau gee gilaadeu e mmahi mai i olaadeu duulanga maolunga, aagai gu hagaamua gilaadeu e maolalo.

⁵³ Ia gu haangai gilaadeu e hiikai i mee danuaa, gai gu hai gi ngadi hulo gilaadeu e lava teai alaadeu mee.

⁵⁴ Ia gu bale ange dono dangada hai hegau go Israel, i dana maanadu dono lodo aloha,

⁵⁵ bei dana hai gu hagatoo donu ange ai laa gi odaadeu damana madagidagi, ange gi Abraham aama dono aamuli ga hano ai!”

⁵⁶ Gai Mary ne noho i daho Elizabeth i e dolu malama, muli mai gai ia ne ahe gi dono hale.

De haanau o John

⁵⁷ Aagai ga dae mai huu de masavaa o Elizabeth e haanau ai, gai ia ne haanau dahi dama daane.

⁵⁸ Gai dangada e paa ange gi de ia aama dangada i dono huaabodu gu langona bolo Tagi Maolunga gu lodo aloha ange gi de ia, gai gilaadeu gu malangilangi madali ia.

⁵⁹ Gai ga valu huu laangi o tamaa gauligi, gai dangada gu loomai e tuu dagaholiage ia, gai gilaadeu ne llodo e hagaingoo ange ia go Zechariah, go de ingoo o dono damana.

⁶⁰ Gai dono dinana ga hai ange gi gilaadeu, “E deai; e dee deenaa dono ingoo, gai dono ingoo go John.”

⁶¹ Aagai gilaadeu ga hai ange gi de ia, “E deai donu se dangada i doo huaabodu gu hagahi ange aagena de ingoo naa!”

⁶² Gai gilaadeu ga hai hanu hagailonga ga ssili ange ai gi dono damana be dee hee de ingoo aana e lodo e hagahi ange gi tama laa.

⁶³ Gai ia ne dangidangi ange gi gilaadeu i dahi baabaa sisi mee, gai ia ga sisi ga hai ange, “Dono ingoo go John.” Gai gilaadeu alodahi i kilaa gu llele mouli.

⁶⁴ De masavaa laa donu huu gai de alelo o Zechariah gu dee lau, gai ia gu maua i de basa ga tuhi de Maadua.

⁶⁵ Gai dangada alodahi e paa ange laa gi gilaadeu gu maatagu mmao. Gai de longo laa gu dele i de mommee iai denga duuduu i de henua o Judea.

⁶⁶ Gai dangada alodahi ne langona mee laa ne maanadu dagodo o mee laa, ga hagataba, “Aahee naa dagodo o tamaa gauligi nei i muli mai?” Gai Tagi Maolunga ne noho i daho John.

Muna pelaabisi a Zechariah

⁶⁷ Gai Zechariah tamana o John gu hhao ga honu i de Hagasaalunga Dabu. Gai ia ga basa pelaabisi, ga hagadaba,

⁶⁸ “Duuhia Tagi Maolunga, de Maadua o Israel. Ia gu humai ma gu hagaola ono dangada,

⁶⁹ ia gu gaamai gi gidaadeu dahi Ia Hagaola mmahi, mai i de aamuli o dono dangada hai hegau go David,

⁷⁰ bei dana hai gu hagatoo donu ai laa i daho denga pelaabisi dabu madagidagi,

⁷¹ bolo ia e hagaola naa gidaadeu mai i daho odaadeu hagadaumee, aama mai i ssauaa olaadeu alodahi e kino i gidaadeu,

⁷² ma de hagasula dono lodo aloha gu hagatoo donu ange laa gi odaadeu dubuna madagidagi, aama de hagamaanadu dana hagatoo donu hagaheloongoi dabu,

⁷³ go de hagatoo donu soe aana ne hai ange gi taadeu dubuna go Abraham:

⁷⁴ bolo ia e hagaola gidaadeu mai i odaadeu hagadaumee, gi maua ai e gidaadeu i de hai hegau ange gi de ia i tee maatagu

⁷⁵ ma de dabu aama de heohi i mada luoono mada i taulooloa odaadeu mouli.

⁷⁶ Gai koe, dagu gaagaa, e hagabinga naa bolo se pelaabisi niio de Ia Maolunga Mmao laa; gai koe e hano naa i mada i mua o Tagi Maolunga e hagadabena ai ono haiava;

⁷⁷ ma de hai gi iloo e ono dangada dagodo o de hagaola, i hiidinga dono degi ange gi olaadeu haisala,

⁷⁸ ma hiidinga de lodo aloha o taadeu Maadua, e haia laa ga humai de maalama o de langi gi odaadeu daha,

⁷⁹ e hagamaalama ai gilaadeu e nnoho i lo te gohu aama lalo de malu o de magau, e dagi ange ai gidaadeu gi de haiava o de baba.”

⁸⁰ Aagai tama gauligi laa ne madua age gu se dangada e mmahi i de baasi gi de hagasaalunga. Gai ia ne noho i lodo henua ga dae ai gi de laangi ne daamada ai ana hegau i madamada o de gau Israel.