Leviticus 12 - De Beebaa Dabu

De hagagilimalali o de hine gu haanau

¹ Gai Tagi Maolunga ne hai ange gi Moses,

² “Basa ange gi de gau Israel, hai ange, ‘Noo de hahine gu haanau dahi dama daane, gai ia e dee gilimalali i e hidu laangi, bei dono hai ne dee gilimalali ai laa i de masavaa e hai ai ono magi haahine.

³ Gai de valu laangi naa huu o de gauligi daane, gai ia e tuu dagaholiage.

⁴ Gai de hine laa gi noho ange i e matolu ma dolu laangi, ga dae ai gi dono gilimalali mai i ono dodo. Gai ia e dee poo ange gi denga mee dabu, ia e dee ulu hogi gi lo te mommee dabu, ga dae ai gi de odi ange laangi e hagagilimalali ai.

⁵ Aagai noo ia e haanau dahi gauligi hahine, gai e lua uvigi oona e dee gilimalali ai, bei dono hai e dee gilimalali ai laa i de masavaa e hai ai ono magi haahine. Gai ia gi noho ange i e madaono ma ono laangi, ga dae ai gi de odi ange laangi e hagagilimalali.

⁶ Gai de masavaa naa huu e odi ange ai ono laangi e hai ai gi gilimalali, i dua dana gauligi daane be go dana gauligi hine, gai ia gi gaamai gi tangada haimeedabu i de haitoga o de hale malo hagabuni dahi ssiibi daane gu dahi ono ngadau e hai ai ssigidaumaha dudu, ma dahi pigeon aabe se manu kono e hai ai ssigidaumaha o haisala.

⁷ Gai tangada haimeedabu ga hai ai ssigidaumaha i mada luu mada o Tagi Maolunga, e tala ai ono haisala; gai ia gu gilimalali mai i ono dodo. Aanei hainga ange gi de hine e hanaua laa dahi gauligi daane aabe se gauligi hahine.

⁸ Gai noo ia e dee maua i de gaamai dahi ssiibi, gai ia gi gaamai e lua manu kono, aabe e lua pigeon, dahi e hai ai ssigidaumaha dudu, gai de manu ange laa e hai ai ssigidaumaha o haisala. Gai tangada haimeedabu ga hai ai ssigidaumaha e tala ai ono haisala, gai ia gu gilimalali.’ ”