Leviticus 1 - De Beebaa Dabu

Denga sigidaumaha dudu

¹ Gai Tagi Maolunga ne hagahi Moses, ga basa ange gi de ia mai i de hale malo hagabuni, ga hai ange,

² “Basa ange gi de gau Israel, hai ange gi gilaadeu: ‘De masavaa naa huu a tangada e gaamai ai dana sigidaumaha gi Tagi Maolunga, gai ia gi gaamai dahi ana kaau, aabe go dahi ana ssiibi.

³ Gai noo ia e hai dana sigidaumaha dudu i dahi manu mai i dana hagabuulingaa manu haangai, gai ia gi gaamai dahi manu daane e deai laa mee baubau i dono angaanga, ga hai ai dana sigidaumaha i de haitoga o de hale malo hagabuni, gi malangilangi ai Tagi Maolunga.

⁴ Gai ia ga dugua ange dono lima gi honga de biho o de manu e hai ai laa dana sigidaumaha dudu, gi malangilangi ai Tagi Maolunga gai gi maatala ai ono haisala.

⁵ Gai ia ne daa gi magau de kaau daane laa i mada luu mada o Tagi Maolunga; gai denga dama daane a Aaron go de gau haimeedabu gi gaavee ono dodo gi dabudabui ange gi luu baasi de mommee o ssigidaumaha i gaogao de haitoga o de hale malo hagabuni.

⁶ Gai tangada niiana ssigidaumaha, gi hoolea de gili o de manu e hai ai laa ssigidaumaha dudu, ga duuduu gi too dagidagi ono aalanga.

⁷ Gai denga dama daane a Aaron, tangada haimeedabu, gi dahua de ahi i honga de mommee o ssigidaumaha ga hagatau ange denga lahhie gi honga de ahi.

⁸ Gai dama daane a Aaron gi dugua ange denga aalanga, ma de biho, aama denga mee moomuna gi honga lahhie e hai ai laa de ahi, i honga de mommee o ssigidaumaha.

⁹ Gai ia gi huuia denga dae ma denga vae i vai. Gai tangada haimeedabu gi duungia de manu laa alodahi i honga de mommee o ssigidaumaha; se sigidaumaha dudu, e nnamu kala e hai i de ahi ange gi Tagi Maolunga.

¹⁰ Gai noo tangada e gaamai dahi ssiibi be se guudi e hai ai dana sigidaumaha, gai ia gi hilia mai dahi manu daane e deai laa mee baubau i dono angaanga.

¹¹ Gai ia ga daa gi magau de manu laa, i baasi i ngaiho de mommee o ssigidaumaha, i mada luu mada o Tagi Maolunga, gai dama daane a Aaron gi dabudabuia ange dodo o de manu laa, gi luu baasi o de mommee o ssigidaumaha.

¹² Gai tangada laa gi duuduudia denga aalanga gi too dagidahi, ma de biho ma denga mee moomuna, gai tangada haimeedabu gi hagataulia ange mee nei gi honga denga lahhie e hai ai laa de ahi i honga de mommee o ssigidaumaha.

¹³ Gai ia gi huuia denga dae ma denga vae i vai. Gai tangada haimeedabu gi duungia de manu laa alodahi i honga de mommee o ssigidaumaha; se ssigidaumaha dudu, e nnamu kala e hai i de ahi ange gi Tagi Maolunga.

¹⁴ Gai noo tangada e hai dana sigidaumaha dudu ange gi Tagi Maolunga i hanu manu llele, gai ia gi gaamai dahi manu kono be se pigeon e hai ai dana sigidaumaha.

¹⁵ Gai tangada haimeedabu gi gaavee de manu lele laa gi mommee o ssigidaumaha ga milo gi doo de biho, ga dudu i honga de mommee o ssigidaumaha, gai ono dodo gi hagassali iho i de baasi o de mommee o ssigidaumaha.

¹⁶ Gai ia gi aaua de mee hhao gai ma denga hulu manu ga tili gi de baasi i dua de mommee o ssigidaumaha, i de mommee iai denga lehu;

¹⁷ ga lava gai ia gi boogia luu bakau gi daangia gi mahanga lua ai de angaanga o de manu laa, gai e dee hai gi too dagidahi. Gai tangada haimeedabu ga dudu de manu lele laa alodahi i honga denga lahhie i honga de mommee o ssigidaumaha; se sigidaumaha dudu, e nnamu kala e hai i de ahi ange gi Tagi Maolunga.