Lamentations 5 - De Beebaa Dabu

Tangidangi ia gi abodonu mai

¹ Tagi Maolunga, aude ngalo mee gu hai mai gi gimaadeu; galo mai ma gi diiloo, gimaadeu gu hagangadi mee ina!

² Demaadeu henua gu gaavange gi de gau henua gee, omaadeu hale gu gaavee e de gau mai moni.

³ Gimaadeu gu bei denga gauligi gu deai laa olaadeu damana; omaadeu dinana gu maakau olaadeu bodu.

⁴ Gimaadeu e hagao amaadeu vai unu, gai amaadeu lahhie e dahi hogi olaadeu hagaoanga.

⁵ Dangada e dolohia gimaadeu gu dae mai gimaadeu; gimaadeu gu daalea gai gu dee maua i de hagammabu.

⁶ Gimaadeu ne dugu ange gimaadeu gi Egypt ma Assyria, gi hanu ai amaadeu gai.

⁷ Omaadeu dubuna ne haisala, gilaadeu gu dee mouli iainei; gai gimaadeu gu hagaduasala i hiidinga o olaadeu baubau.

⁸ Gai gu ni dangada hai hegau e dagina gimaadeu; gu deai hogi dangada e hagaola ina mai gimaadeu i olaadeu daha.

⁹ Gimaadeu e hai hegau ange gi amaadeu mee gai, ma de manavasaa i omaadeu mouli, i hiidinga o de gadilaasa i lodo henua.

¹⁰ Omaadeu gili gu vvela bei de mommee dao gai, gai gu mahanahana i demaadeu hiikai.

¹¹ Denga haahine o Zion gu haia gi de mahi, aama denga bua mmoe i aduhale o Judah.

¹² Denga dagi gu daudau age i olaadeu lima; denga daane maatua gu dee hagadubulia.

¹³ Denga dama daane gu hagahai hegau ina, i de mommee e mmili ai denga grain; denga gauligi daane e hagauda denga noodangaa laagau daemaha.

¹⁴ Denga daane maatua gu dee hagabuni i ma te haitoga o de aduhale; denga dama daane gu dee hagadangidangi.

¹⁵ Gu deai donu se malangilangi i omaadeu lodo; gimaadeu gu dee aanu, gai gu hinangalosaa.

¹⁶ De hau i honga omaadeu biho gu doo. Gu vakaa loo gimaadeu, i hiidinga gimaadeu gu haisala!

¹⁷ Gimaadeu gu mmae omaadeu lodo i hiidinga o de mee nei, omaadeu ganomada gu dee kide i hiidinga o mee nei.

¹⁸ De mounga go Zion gu ngadi dagodo, denga jackal gu nnoho i kilaa.

¹⁹ Aagai koe, e Tagi Maolunga, e hodooligi ga hano ai; doo nohoanga hodooligi e dagodo naa donu huu i denga atangada alodahi.

²⁰ Gu aha goe gu ngalo ai naa gimaadeu i masavaa alodahi? Gai gu aha gu daulooloa ai naa dau tili gimaadeu?

²¹ Tagi Maolunga, hagaahea mai gimaadeu gi oo daha, gi maua ai e gimaadeu i de aahe mai. Hagahoou ina omaadeu laangi, bei omaadeu dagodo madagidagi —

²² aabe koe gu tili naa donu gimaadeu, ma de kona donu doo lili i gimaadeu.