Lamentations 4 - De Beebaa Dabu

De ui de hagaduasala o Zion

¹ Denga goolo gu dee malamalama, denga goolo danuaa gu dagodo gee! Denga hadu dabu gu tili saele, i dege o denga haiava alodahi.

² Denga dama hagamogomogo o Zion, nogo hagamogomogo laa bei denga goolo, gu bei denga gumedi e hai i bela pigi, a tangada hai gumedi e hai laa i luoono lima!

³ Denga jackal e hakaa unuunu donu hogi alaadeu dama, aagai ogu dangada e vaivai hai dangada, bei hegau a denga ostrich de vao.

⁴ De alelo ma de ngudu o de gaagaa gu mmasa gee i dono hieunu; denga gauligi vaaligiligi gu dangidangi i hanu gai, gai gu deai donu se dangada e haangai ina ange gilaadeu.

⁵ Dangada nogo gaimee danuaa laa gu maakau ma e daakodo i honga haiava. Gilaadeu nogo kahu laa i malo mmea, gu tolo saele i honga hagabuudungaa lehu.

⁶ De hagaduasala o ogu dangada gu kii ange i de hagaduasala o Sodom, go de aduhale ne moolau laa donu huu de oha, gai tee se dangada donu ne oohaa.

⁷ Olaadeu dagi e gilimalali ange i denga snow, ma de tea ange i denga vai uu; olaadeu angaanga e mmea ange i denga ruby, gai olaadeu hoolinga e bei denga sapphire.

⁸ Aagai iainei olaadeu gili gu uliuli ange i denga malala, gu deai dangada e madea gilaadeu i honga denga haiava. Gai gu tuu mai olaadeu ivi ma de too gili, aama de mmasa bei denga lahhie.

⁹ Dangada gu daia laa ma gu maakau i de gadilaasa e danuaa ange i gilaadeu e maakau laa i delaadeu saalohia; gilaadeu e kona de hiikai, gai gu panga, i hiidinga teai gai i honga denga veelenga.

¹⁰ Denga haahine e aaloha laa i alaadeu dama gu boale alaadeu dama ma gu hai ai alaadeu gai, i de masavaa ne hagaduasala ai tamaa hine a ogu dangada.

¹¹ Tagi Maolunga gu bole mmao, ia gu hagahai hegau dono lili, Ia gu dahu dahi ahi i Zion e dudu ai de aduhale alodahi.

¹² Denga hodooligi o henua i lalo tee hagadonusia, dangada e nnoho i henua i lalo tee hagadonusia hogi, bolo denga hagadaumee ma dangada e kino i Jerusalem e maua i de ulu i ono haitoga.

¹³ Aagai mee nei ne hai i hiidinga haisala o ono pelaabisi aama baubau o de gau haimeedabu, i delaadeu daa ga maakau de gau heohi i lo te aduhale laa.

¹⁴ Gilaadeu ne haahaa saele bei dagodo o tangada dee gide i honga denga haiava; Gilaadeu gu baalau i denga dodo, deelaa ai, gu deai donu dangada e llodo e poo ange gi olaadeu malo.

¹⁵ Dangada e oo ma e hai ange gi gilaadeu, “Goodou hulo gee donu! Goodou hulo gee donu! Goodou aude poo mai gi gilaadeu!” Deelaa ai, gilaadeu gu ni dangada e silivaahea saele; gai dangada o denga huaahenua e hagataba, “Gilaadeu e dee maua donu i de nnoho madali gidaadeu.”

¹⁶ Tagi Maolunga ne hai gi mavaevae saele gilaadeu, ia gu dee anga ange donu gi gilaadeu; de gau haimeedabu gu dee hagadubulia, gai dangada gu dee abodonu ange gi denga dagi.

¹⁷ Gimaadeu gu daalea i de tali, i teai donu se bale e humai; gimaadeu ne dagitilo mai i omaadeu hale hagaloosi maolunga be e dahi laa huaahenua e maua i de hagaola gimaadeu.

¹⁸ Gilaadeu e hagabaa gimaadeu, gimaadeu gu dee maua i de seesee i honga haiava. Gu baa mai de hagaodi o omaadeu mouli; omaadeu laangi gu sogoisi, go hiidinga gu odi donu omaadeu laangi.

¹⁹ Dangada e dolohia gimaadeu e kemo ange i denga igele i lo te langi i lunga; gilaadeu e doolohi gimaadeu i honga denga mounga, ma de mmuni e tali ai gimaadeu i lodo henua.

²⁰ De ia a Tagi Maolunga gu hagadabu i de lolo, go de ia omaadeu e mouli ai, gu too ange gi lodo geelonga. Gai gimaadeu ne maanadu bolo gimaadeu e nnoho i lalo dono malu, i demaadeu nnoho i magavaa o denga huaahenua.

²¹ De gau Edom, goodou malangilangi ma de llodo danuaa, go goodou e nnoho i de henua go Uz. Aagai de ubu o de hagaduasala e gaavadu naa hogi goodou gi unu ai; gai goodou e unu naa ga ssenga ga hagaui oodou malo.

²² Tamaa hine o Zion, gu lava doo hagaduasala, i hiidinga oo baubau; ia e dee tili donu goe i denga henua gee. Aagai goodou de gau Edom, ia e hagaduasala naa goodou i hiidinga o oodou baubau, ma de hagaago mai oodou haisala.