Joshua 12 - De Beebaa Dabu

Denga hodooligi a Moses ne hagadee kii

¹ Aanei denga hodooligi o de henua a de gau Israel ne hagadee kii, ga kave olaadeu henua, i baasi i dua o Jordan, go de mommee e sobo age ai de laa, mai i de geelonga go Arnon ga hano ai gi de mounga go Hermon, aama baasi dua alodahi o Arabah:

² Go Sihon de hodooligi o de gau Amor, e hodooligi laa i Heshbon. Gai dono nohoanga hodooligi e daamada mai i Aroer i de hiihii o de geelonga go Arnon — ma mai i lo te ungaalodo o de geelonga laa — ga hano ai gi ssaalingaa vai go Jabbok, go de ngaadonga o de henua o de gau Ammon, aama dahi luu baasi o Gilead.

³ Ia ne hodooligi hogi i denga mommee i baasi dua o Arabah, mai i de Vai go Kinnereth i baasi dua, i de haiava e hano laa gi Beth Jeshimoth, gai e hano ga dae gi Tai o Arabah, (e bei go Tai Soolo), ma de hano ga dae gi ngaage, i lalo denga madadaagodo o de mounga go Pisgah.

⁴ Gilaadeu ne kave hogi mommee o Og, de hodooligi o Bashan, ia go dahi dangada e doe i de gau Repha, gai e noho i Ashtaroth ma Edrei.

⁵ Gai ia e hodooligi i de mounga go Hermon, ma Salecah, ma Bashan alodahi, ga dae ai gi de ngaadonga o de henua o de gau Geshur ma de gau Maacah, aama dahi baasi o Gilead ga dae ai gi de ngaadonga o de henua o Sihon, de hodooligi o Heshbon.

⁶ Gai Moses, tangada hai hegau o Tagi Maolunga, ma de gau Israel ne daa gilaadeu ga maakau. Gai Moses, tangada hai hegau o Tagi Maolunga, ne gaavange delaadeu henua gi de aamuli o Reuben, ma de aamuli o Gad, aama dahi luu baasi de aamuli o Manasseh.

Denga hodooligi a Joshua ne hagadee kii

⁷ Gai aanei denga hodooligi o de henua a Joshua ma de gau Israel ne hagadee kii i baasi i dai o Jordan; mai i Baal Gad e duu laa i lo te geelonga go Lebanon, ga dae ai gi de mounga go Halak e duu age laa i Seir. Gai Joshua ne gaavange olaadeu henua gi denga aamuli o Israel gi vaevae ai —

⁸ go de mommee iai mounga, ma mommee iai duuduu paa i lalo, ma de Arabah, ma madadaagodo o denga mounga, ma de vao, aama de Negev — de henua o de gau Heth, ma de gau Amor, ma de gau Canaan, ma de gau Perez, ma de gau Hiv aama de gau Jebus:

⁹ go de hodooligi o Jericho, ma de hodooligi o Ai, i gaogao Bethel,

¹⁰ ma de hodooligi o Jerusalem, ma de hodooligi o Hebron,

¹¹ ma de hodooligi o Jarmuth, ma de hodooligi o Lachish,

¹² ma de hodooligi o Eglon, ma de hodooligi o Gezer,

¹³ ma de hodooligi o Debir, ma de hodooligi o Geder,

¹⁴ ma de hodooligi o Hormah, ma de hodooligi o Arad,

¹⁵ ma de hodooligi o Libnah, ma de hodooligi o Adullam,

¹⁶ ma de hodooligi o Makkedah, ma de hodooligi o Bethel,

¹⁷ ma de hodooligi o Tappuah, ma de hodooligi o Hepher,

¹⁸ ma de hodooligi o Aphek, ma de hodooligi o Lasharon,

¹⁹ ma de hodooligi o Madon, ma de hodooligi o Hazor,

²⁰ ma de hodooligi o Shimron Meron, ma de hodooligi o Acshaph,

²¹ ma de hodooligi o Taanak, ma de hodooligi o Megiddo,

²² ma de hodooligi o Kedesh, ma de hodooligi o Jokneam i Carmel,

²³ ma de hodooligi o Dor i tagudai, ma de hodooligi o Goiim i Galilee,

²⁴ aama de hodooligi o Tirzah; e dinodolu ma dogodahi hodooligi nei.