Jonah 2 - De Beebaa Dabu

Talodalo a Jonah

¹ Gai Jonah ne dangidangi ange gi Tagi Maolunga dono Maadua i dono noho i lo te dinae o de mamu laa,

² ga hai ange, “Au ne dangidangi ange gi Tagi Maolunga i dogu hai ngadaa, gai ia ne basa mai gi dagu dangidangi; au ne hagahi ange ia mai i tagelo o de mommee o de gau maakau, gai koe ne hagallongo dagu dangidangi.

³ Koe ne maga ange au gi lo te moana gelo, ma lo te dagelo o denga lausedi, gai denga lausedi ne duuli au. Gai au beau alodahi ma de mee mmilo gu hadihadi iho gi ogu elunga.

⁴ Gai au ne hagadaba, ‘Au gu aau gee mai i mada luoo mada; aagai au e ahe ange naa ga gidee doo temple dabu.’

⁵ Denga lausedi gu loomosi au ma gu dai malemo; au gu abulu gi lo te moana gelo, denga helii lausedi gu pigi mai gi dogu biho.

⁶ Au ne abulu ga baa i de tagelo o denga mounga, gelegele i tagelo o de moana gu daohi au ga hano ai; gai koe, Tagi Maolunga dogu Maadua, ne hagaola dogu mouli mai i de mommee o de magau.

⁷ Dogu masavaa ne dai magau ai, gai au gu manadua goe, Tagi Maolunga. Au ne dalodalo adu gi de goe i doo temple dabu.

⁸ Gilaadeu e daumaha ange gi denga ngadi diinonga e daahuli gee doo abodonu ange gi gilaadeu.

⁹ Aagai au e hagaahe adu donu de abodonu ma de ssigidaumaha adu gi de goe. Au e hai naa donu gi bei agu mee gu hagatoo donu ai. De hagaola se mee mai i daho Tagi Maolunga.”

¹⁰ Gai Tagi Maolunga ga basa ange gi de mamu laa, gai de mamu laa ga busi age Jonah gi honga de henua.