John 8 - De Beebaa Dabu

De boogia mai o de hine hai be se manu

¹ Iesu ne hano hogi gi de Mounga o denga Olive.

² Gai boo taiao donu huu gai ia ne ahe gi de temple. Gai dangada alodahi gu loomai gi ono daha, gai ia ga noho i kilaa ga agoago ange ai gilaadeu.

³ Gai de gau sisi ma denga Pharisee ne gaamai dahi haahine ne gidee mai gu dagodo haisala. Gai gilaadeu ga hagaduu ia i madamada o dangada,

⁴ gai gilaadeu ga hai ange gi Iesu, “Tangada Agoago, de hine nei ne boogia mai i dono dagodo haisala.

⁵ Gai de hainga a Moses ne tala mai bolo gidaadeu gi magaa denga haahine bee nei i hadu. Gai dee hee dau maanadu?”

⁶ Gilaadeu ne ssili ange muna nei e hagatale ai ia, gi hanu ai alaadeu mee e hagabaubau ai ia. Gai Iesu ga ino iho ga daamada de sisi honga de gelegele i dono madannia.

⁷ Gai ga usuusuhia anga huu e gilaadeu ia, gai ia ga hidi age ga hai ange gi gilaadeu, “Goai naa huu i oodou magavaa e deai ono haisala, gai ia gi daamada ina de maga ia i hadu.”

⁸ Gai ia ga ahe ange ga ino iho ga sisi honga de gelegele.

⁹ Gai ga langona huu e gilaadeu muna laa, gai gilaadeu ga daamada de hulo gee mai i kilaa, mai i de gau maatua ga hano iho ai, gai go Iesu donu huu e duu madali de hine laa i kilaa.

¹⁰ Gai Iesu ga hidi age ga ssili ange gi de ia, “De hine, i hee iai gilaadeu? E aha, teai laa donu dangada ne hagabaubau ina goe?”

¹¹ Gai de hine laa ne hai ange, “Tangada aamua, teai donu.” Iesu ne hai ange gi de ia, “Au e dee buu adu hogi ssala gi de goe. Hannoo, gai koe aude ahe ange gi haisala.”]

Iesu de maalama o henua i lalo

¹² Gai Iesu ga ahe ange ga basa ange gi gilaadeu, ga hai ange, “Go au de maalama o henua i lalo. Tangada e daudali mai i de au e dee seesee i de gohu, gai ia e hagamaalama i de maalama o de mouli.”

¹³ Gai denga Pharisee ga hai ange gi de ia, “Koe e tala hagadonu donu huu oo dagodo; gai au muna e tala e dee ni muna abodonu.”

¹⁴ Iesu ne hai ange gi gilaadeu, “Gai daalaa hagadonu naa donu e au ogu dagodo, gai agu muna ni muna abodonu; go hiidinga au e iloo be go hee oogu ne humai ai, gai go hee oogu e hano aagena. Gai goodou e dee iloo be go hee oogu ne humai ai, aabe go hee oogu e hano aagena.

¹⁵ Goodou e hagamodu muna bei dagodo lodo o dangada, gai au e dee hagamodu donu muna o dahi dangada.

¹⁶ Aagai noo au e hagamodu muna o dangada, gai agu hagamodu e heohi, go hiidinga e dee go au donu huu. Gai au e hai mee nei madali dogu Damana, ne haia laa ngau gi humai.

¹⁷ Gai gu sisi i lodo oodou hainga bolo noo e buni e dogolua dangada i delaau tala hagadonu, gai alaau muna se muna abodonu.

¹⁸ Au e tala hagadonu ogu dagodo, gai Tamana ne haia nei au gi humai e tala hagadonu hogi ogu dagodo.”

¹⁹ Gai gilaadeu ga ssili ange gi de ia, “I hee iai doo Damana?” Iesu ne hai ange, “Goodou e dee iloo donu au aabe go dogu Damana. Noo goodou e iloo au, gai goodou e iloo hogi dogu Damana.”

²⁰ Iesu ne tala muna nei i de masavaa oona e agoago ai i de temple i gaogao de mommee e dugu ai denga sigidaumaha. Aagai teai donu se dangada ne boogia ia, go hiidinga tigi dae mai dono masavaa.

Goodou e dee maua i de hulo gi dogu mommee e hano aagena

²¹ Iesu ne ahe ange hogi ga hai ange gi gilaadeu, “Au gu dai hano gee mai i kinei, gai goodou ga ssala naa au, gai goodou e maakau i lodo oodou baubau. Gai de mommee oogu e hano gi aagena, gai goodou e dee maua i de loadu aagena.”

²² Gai de gau Ssuu ne hai ange, “E aha, ia ga daa nei donu huu ia gi magau? Deenei aana e hai mai ai nei, ‘De mommee oogu e hano gi aagena, gai goodou e dee maua i de hulo aagena’?”

²³ Gai ia ga hai ange gi gilaadeu, “Goodou ni dangada mai i lalo, gai au se dangada mai i lunga. Goodou ni dangada henua i lalo, gai au e dee se dangada henua i lalo.

²⁴ Au gu tala adu gi goodou bolo goodou e maakau donu i lodo oodou haisala; noo goodou e dee hagadonusia bolo go au go ia bei dagu hai gu tala, gai goodou e maakau naa donu i lodo oodou haisala.”

²⁵ Gai gilaadeu ga ssili ange gi de ia, “Gai go koe donu goai?” Iesu ne hai ange gi gilaadeu, “Au gu tala adu huu gi goodou mai i taamada age be au goai.

²⁶ E lagolago agu mee e tala ai oodou dagodo ma de hagamodu ai oodou muna; gai de ia ne haia ngau gi humai go de muna abodonu, gai au e tala ange gi henua i lalo mee alodahi aagu gu langona mai i ono daha.”

²⁷ Gai gilaadeu tee tonu ange bolo ia e basa i dono Tamana.

²⁸ Gai Iesu ga hai ange, “Dua naa huu doodou hagaduu age Tama a Tangada, gai goodou gu iloo bolo go au donu go ia, gai au e dee hai donu dahi mee daudahi i dogu sauaa donu huu, aagai au e tala donu huu mee a Tamana gu agoago mai ai au.

²⁹ De ia ne hai laa au gi humai e noho madali au. Ia e dee tili donu au, go hiidinga au e hai mee oona e malangilangi ai i masavaa alodahi.”

³⁰ Gai de masavaa aana e tala ai muna nei, gai dangada soa gu hagadonusia ia.

De muna abodonu e hai gi ilaage goodou

³¹ Iesu ne hai ange gi de gau Ssuu gu hagadonusia laa ia, “Noo goodou e daohi agu muna, gai goodou ni dangada agoago abodonu niiagu,

³² gai goodou e iloo ai naa de muna abodonu, gai de muna abodonu ga hai gi ilaage goodou.”

³³ Gilaadeu ne hai ange gi de ia, “Gimaadeu ni mogobuna niio Abraham, gai tigi ai donu semaadeu hai ga ni dangada hai hegau dee ilaage. Gai dee hee dau hai e hagadaba ai naa bolo gimaadeu e hai naa ga ilaage?”

³⁴ Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, be goai e haisala se dangada hai hegau donu niio de haisala.

³⁵ Tangada hai hegau e dee ilaage e dee se dangada donu de huaabodu, gai tama se dangada donu de huaabodu ga hano ai.

³⁶ Gai noo Tama e hagailaage goe, gai koe gu ilaage donu.

³⁷ Au e iloo bolo goodou go aamuli o Abraham. Gai goodou gu paba ange donu e daa au gi magau, go hiidinga goodou e dee daohi agu muna i oodou lodo.

³⁸ Au e tala adu gi goodou agu mee gu gide i daho dogu Damana, gai goodou e hai mee oodou gu langona i daho doodou damana.”

³⁹ Gilaadeu ne hai ange gi de ia, “Demaadeu dubuna go Abraham.” Iesu ne hai ange, “Noo goodou ni dama nii Abraham, gai goodou e hai mee a Abraham ne hai.

⁴⁰ Gai iainei goodou e llodo e daa au gi magau, go tangada gu daalaa adu gi goodou de mee abodonu aagu ne langona mai i daho de Maadua. Gai Abraham tee hai de mee nei.

⁴¹ Gai goodou e hai donu mee a doodou damana gu hai.” Gilaadeu ne hai ange gi de ia, “Gimaadeu tee hagadili i de hai be se manu; gimaadeu e dahi donu huu omaadeu damana, go de Maadua.”

⁴² Iesu ne hai ange gi gilaadeu, “Noo go de Maadua doodou damana, gai goodou e aaloha i de au, go hiidinga au ne humai donu i daho de Maadua. Au tee humai donu huu i de au, gai go ia ne haia nei au gi humai.

⁴³ Gai gu aha goodou gu dee tonu mai ai naa gi agu muna? Go hiidinga goodou e dee llodo e hagallongo agu muna.

⁴⁴ Goodou ni dama donu nii de ia hagabaubau laa, gai goodou e hai lodo o doodou damana. Ia se dangada daa dangada mai i taamada age, ia e dee daohi de muna abodonu, go hiidinga e deai donu se muna abodonu i ono daha. Ia e hadu muna i hiidinga aalaa donu ono dagodo: ia se dangada hadu muna gai go tamana donu o de muna hhadu.

⁴⁵ Gai go hiidinga au e tala adu gi goodou de muna abodonu, deenei ai, goodou e dee hagadonusia agu muna.

⁴⁶ Goai i oodou magavaa e maua i de hagadaba bolo au e haisala? Noo au e tala adu de muna abodonu, gai gu aha goodou gu dee hagadonusia ai naa agu muna?

⁴⁷ Tangada se dama nii de Maadua e hagallongo muna a de Maadua. Goodou e dee hagallongo muna a de Maadua, go hiidinga goodou e dee ni dama nii de Maadua.”

I mua o Abraham, gai go Au donu go Au

⁴⁸ Gai de gau Ssuu ga hai ange gi de ia, “E heohi donu demaadeu hai adu bolo koe se dangada Samaria, gai de hagasaalunga baubau e noho i oo daha.”

⁴⁹ Iesu ne hai ange gi gilaadeu, “E deai donu se hagasaalunga baubau e noho i ogu daha. Au e hagadubu dogu Damana, gai goodou e dee hagadubu au.

⁵⁰ Au e dee ssala dogu hai e hagamahamaha ai, gai e Dahi ange e saalaa dogu hagamahamaha, gai go ia donu de ia hagamodu.

⁵¹ Ni muna abodonu, ni muna abodonu aagu e hai adu gi goodou, tangada e daohi agu muna e dee magau naa donu.”

⁵² Gai de gau Ssuu ga hai ange gi de ia, “Deenei donu de sula mai bolo de hagasaalunga baubau e noho i oo daha! Abraham gu magau, gai e bei ai hogi denga pelaabisi; gai koe e hagadaba, ‘Tangada e daohia agu muna e dee magau donu.’

⁵³ Koe e maolunga ange i demaadeu damana go Abraham, ma denga pelaabisi gu odi nei i de maakau? Gai go koe goai?”

⁵⁴ Iesu ne hai ange gi gilaadeu, “Noo au e hagamahamaha donu huu au, gai dogu mahamaha e deai donu ono haigamaiana. Gai go dogu Damana e hagamahamaha ina au, gai go ia oodou e hagataba naa bolo go ia doodou Maadua.

⁵⁵ Goodou e dee iloo ia, gai au e iloo donu ia. Noo au e hagadaba bolo au e dee iloo ia, gai au gu se dangada hadu muna bei oodou dagodo, aagai au e iloo donu ia ma de daohi ana muna.

⁵⁶ Doodou damana go Abraham ne malangilangi i dana gidee dogu masavaa e dae mai ai; ia ne malangilangi i dana gidee de mee nei.”

⁵⁷ Gai de gau Ssuu ga hai ange gi de ia, “Koe tigi madalima donu oo ngadau. Gai dee hee dau hai ne gidee ai Abraham?”

⁵⁸ Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, i mua de haanau o Abraham, gai au gu dahi donu.”

⁵⁹ Gai gilaadeu ga poo age denga hadu e maga ai ia, gai Iesu ga hagalilo ga sao ga hano gee mai i de mommee o de temple.