John 7 - De Beebaa Dabu

Iesu ma ono daina daane

¹ Dua mee nei gai Iesu ne hagadaga saele i Galilee; ia tee hagadaga saele i Judea, go hiidinga de gau Ssuu e ssala de hai e daa ai ia gi magau.

² Laangi laa gai gu baa ange gi Taonga o denga Baasi Hale.

³ Gai ono daina daane ga hai ange gi de ia, “Hano gee i kinei mage hano gi Judea, gi gidee ai e au dangada agoago au hegau e hai.

⁴ E deai donu se dangada e hagammuni ana hegau noo ia e lodo gi iloo e dangada ana mee e hai. Noo koe e hai hegau nei, gai hagaagona ange gi henua i lalo alodahi.”

⁵ Gai ono daina daane donu e dee hagadonusia ia.

⁶ Deelaa ai, Iesu ne hai ange gi gilaadeu, “Tigi dae mai dogu masavaa. Gai goodou, doodou masavaa go masavaa alodahi.

⁷ Henua i lalo e dee kino i goodou, aagai e kino i de au, go hiidinga au e tala bolo hegau e hai i henua i lalo e baubau.

⁸ Goodou hulo gi taonga. Au e dee hano gi taonga iainei, go hiidinga tigi dae mai dogu masavaa.”

⁹ Gai ga lava huu i dana tala ange muna nei gi gilaadeu, gai ia ne damaa noho ange i Galilee.

Iesu i Taonga o denga Baasi Hale

¹⁰ Aagai dua huu de hulo o ono daina daane gi taonga, gai ia ga hano hogi. Gai ia tee hai gi iloo e dangada bolo ia i kilaa.

¹¹ Gai de gau Ssuu ne dagitilo gi gidee e gilaadeu ia i de mommee e hai ai laa taonga ma de ssili, “I hee ai donu ia?”

¹² Gai e lagolago muna a dangada e pasa ai i de ia i olaadeu magavaa. Hanu e hagataba, “Ia se dangada danuaa,” gai hanu e hagataba, “E deai, ia e hagasenga dangada.”

¹³ Gai teai donu se dangada daudahi ne daalaa gi langona e dangada soa ana muna, go hiidinga gilaadeu e maatagu i de gau Ssuu.

¹⁴ Gai ga madohi lua huu de masavaa o taonga, gai Iesu ga hanage gi de temple ga daamada de agoago.

¹⁵ Gai de gau Ssuu gu llele mouli ga hagataba, “Go hee a taane nei ne ago ai nei mee nei, gai ia tee hano i dahi sukulu?”

¹⁶ Iesu ne hai ange gi gilaadeu, “Agu agoago e dee niiagu donu, gai ni agoago nii de ia ne haia nei au gi humai.

¹⁷ Tangada e lodo e daudali i lodo o de Maadua e maua gi iloo, be agu agoago ni mee mai i daho de Maadua aabe niiagu donu huu.

¹⁸ Tangada e basa donu huu i dono sauaa e ssala donu huu dono hai e hagamahamaha ai; gai tangada e saalaa de hai e hagamahamaha ai tangada ne haia ia gi humai, se dangada e hai hegau i de muna abodonu, gai e deai donu se mee dee heohi i ono lodo.

¹⁹ E aha, e dee go Moses ne gaavadu gi goodou de hainga? Gai e deai donu se goodou e daudali ai. Gai gu aha goodou gu ssala ai au e daa au gi magau?”

²⁰ Gai dangada ga hai ange gi de ia, “Dahi hagasaalunga baubau e noho i oo daha. Goai e hagataalea de daa goe gi magau?”

²¹ Iesu ne hai ange gi gilaadeu, “Au ne hai dahi mee hagalele mouli, gai goodou alodahi gu llele mouli.

²² Moses ne gaavadu gi goodou de tuu dagaholiage (gai e dee se mee donu hogi mai i daho Moses, aagai mai i daho denga dubuna madagidagi), gai goodou e tuu dagaholiage tangada i de laangi o Sabbath.

²³ Noo e dee oha de hainga a Moses i doodou tuu dagaholiage tamaa gauligi se daane i de laangi o Sabbath, gai gu aha goodou gu llili ai naa i dagu hagaieiangi de angaanga alodahi o tangada i de laangi o Sabbath?

²⁴ Goodou aude hagamodu ina muna i oodou mee e gide, gai hagamodu ina i de heohi.”

Go de Klisdo deenei?

²⁵ De masavaa laa gai hanu dangada i Jerusalem ne ssili ga hagataba, “E dee deenei taane alaadeu e ssala laa e daa gi magau?

²⁶ Gai deenei ia, e duu nei ma e agoago i madamada o dangada, gai gilaadeu tee pasa ange donu gi de ia. Agu made denga dagi gu iloo bolo deenei donu de Klisdo?

²⁷ Gai gidaadeu e iloo be go hee o taane nei ne humai ai. Gai ga hagasula mai naa huu de Klisdo, gai e deai donu se dangada e iloo e ia be go hee oona ne humai ai.”

²⁸ Gai Iesu ga oo ga hagadaba i de masavaa oona ne agoago ai i de temple, “Goodou e iloo donu be au go ai, goodou e iloo hogi be go hee oogu ne humai ai? Au tee humai donu huu i dogu sauaa, gai de ia ne gaamai nei au gi humai go de muna abodonu, gai goodou e dee iloo donu ia.

²⁹ Aagai au e iloo ia, go hiidinga au ne humai i ono daha, gai go ia donu ne haia nei au gi humai.”

³⁰ Gai gilaadeu ga hagatale de poo ia, gai teai ne maua i de poo ange gi de ia, go hiidinga tigi dae mai dono masavaa.

³¹ Aagai ne soa dangada i de hagabuulingaa dangada laa ne hagadonusia ia, gai gilaadeu ga hagataba, “E aha, de Klisdo e lagolago ange naa ana hagailonga e hai, i dono masavaa e humai ai?”

De hai gi hulo denga daane hagaloosi gi boogia Iesu

³² Gai ga langona huu e denga Pharisee muna a dangada e pasa ai laa, gai gilaadeu ma de gau haimeedabu maolunga ga hai gi hulo hanu dangada hagaloosi gi boogia Iesu.

³³ Gai Iesu ga hai ange gi dangada, “E bodobodo donu huu dogu masavaa e noho ai i oodou daha, gai au ga ahe ai loo gi daho de ia ne gaamai au gi humai.

³⁴ Gai goodou e ssala naa au, gai goodou e dee maua gi gidee au. Gai de mommee oogu e hano ai goodou e dee maua i de loadu aagena.”

³⁵ Gai de gau Ssuu ga hagadau ssili i olaadeu magavaa ga hagataba, “Go hee oona e hano aagena gi dee gidee ai e gidaadeu ia? Ia ga hano nei gi daho de gau Ssuu e nnoho saele laa i magavaa o de gau Greek e agoago ai de gau Greek?

³⁶ Gai dee hee de hagadoonunga o ana muna nei, ‘Goodou e sala naa ngau gai goodou e dee maua gi gidee au,’ aabe ‘De mommee oogu e hano ai goodou e dee maua i de loadu aagena’?”

Denga saalingaa vai o de mouli

³⁷ Gai de laangi hagaodi o taonga, go de laangi maolunga hugadoo, gai Iesu ne duu age ga oo ga hagadaba, “Be goai e hieunu, gai ia gi humai gi unu i ogu daha.

³⁸ Be goai e gai mai gi de au, gai ia e bei muna a de Beebaa Dabu gu tala laa, ‘Denga saalingaa vai o de mouli e ssali mai i ono lodo.’ ”

³⁹ Gai ia ne basa i dagodo o de Hagasaalunga ⌊Dabu⌋, gu dai hano iho laa gi honga o dangada gu hagadonusia ia; de masavaa laa gai de Hagasaalunga ⌊Dabu⌋ tigi hano iho, go hiidinga Iesu tigi kave dono mahamaha.

Tee buni o dangada

⁴⁰ Gai ga langona huu e dangada soa muna laa, gai hanu gilaadeu ga hagataba, “Deenei donu de Pelaabisi laa.”

⁴¹ Gai hanu ne hagataba, “Deenei donu de Klisdo.” Gai hanu ne ssili, “E maua gi humai de Klisdo i Galilee?

⁴² Gai tigi tala laa i de Beebaa Dabu bolo de Klisdo se aamuli niio David, gai ia e humai i Bethlehem, de aduhale o David ne noho ai?”

⁴³ Deelaa ai, gu dee buni dangada i ono hiidinga.

⁴⁴ Gai hanu dangada ne llodo e poo ia, gai teai donu se dangada ne poo ange gi de ia.

Dagi o de gau Ssuu tee hagadonusia

⁴⁵ Gai de gau hagaloosi o de hale daumaha ga ahe mai gi daho de gau haimeedabu maolunga ma denga Pharisee, gai gilaadeu ne hagasee gilaadeu ga ssili ange, “Gu aha goodou tee poo ai laa ia e gaamai kinei?”

⁴⁶ Gai de gau hagaloosi ga hai ange, “Tigi ai donu se dangada ne agoago bei dagodo o taane laa.”

⁴⁷ Gai denga Pharisee ga ssili ange gi gilaadeu, “Goodou gu hagasengalia naa hogi?

⁴⁸ Gu hanu nei dagi aabe ni Pharisee ne hagadonusia ia?

⁴⁹ Aagai de gau soa e dee iloo donu e gilaadeu de hainga, gilaadeu gu hagamalaia.”

⁵⁰ Gai Nicodemus, taane ne hano laa gi daho Iesu i dahi masavaa i mua, gai se daane donu madali gilaadeu, ga ssili ange gi gilaadeu,

⁵¹ “E aha, taadeu hainga e hagabaubau laa dahi dangada noo tigi hai ssiilingaa muna ma de hai gi iloo be ni aha aana gu hai?”

⁵² Gai gilaadeu ga hai ange gi de ia, “E aha, koe se dangada Galilee hogi? Saalaa, gai koe e gidee naa bolo tigi ai donu se pelaabisi daudahi ne humai i Galilee.”

⁵³ [Gai dangada alodahi gu aahe gi olaadeu hale.