John 6 - De Beebaa Dabu

De haangai o de limamano

¹ Dua mee nei, gai Iesu ne hano gi de baasi gee de Vai o Galilee (e bei go Vai o Tiberias).

² Gai dangada soa mmao ne daudali ange i de ia ga hulo ai gi kilaa, i hiidinga gilaadeu ne gidee ana hagailonga ne hai ga hagaieiangi ai denga magi.

³ Gai Iesu ga hanage i de mounga ga noho i dahi mommee i kilaa madali ana dangada agoago.

⁴ De masavaa laa gai gu baa ange donu gi Taonga Hagasili a de gau Ssuu.

⁵ Gai Iesu ga galo iho gu gidee e ia dangada soa mmao e loomai gi ono daha, gai ia ga hai ange gi a Philip, “Go hee adaadeu e hagao ai hanu pelaoaa e gaimee ai de gau soa nei?”

⁶ Iesu ne ssili ange muna nei gi a Philip e tilo ai dagodo o dono gai. Gai ia gu iloo donu be ni aha aana gu hagatau e hai ai.

⁷ Philip ne hai ange gi de ia, “De lualau denarius e dee dohu i de hagao ai hanu gai e dagi de momo ai dangada.”

⁸ Gai Andrew, dahi ana dangada agoago, gai go taina daane o Simon Peter, ga hai ange gi de ia,

⁹ “E dahi gauligi daane i kinei e lima ana duudangaa pelaoaa barley aama e lua mamu, gai dee hee de hai e hai ai gi dohu dangada soa i mee nei?”

¹⁰ Iesu ne hai ange, “Haia dangada gi nnoho gi lalo.” Gai kilaa e lagolago helii e ssomo ai; gai dangada alodahi ga nnoho gi lalo, agu made se limamano dangada.

¹¹ Gai Iesu ga poo mai denga duudangaa pelaoaa, gai ga lava huu i dono dalodalo, gai ia ga duha ange gi dangada gu noho laa gi lalo. Ia ne duha ange hogi denga mamu, gai dangada ga gaimee ai gu boobosu.

¹² Gai ga boobosu huu dangada, gai ia ga hai ange gi ana dangada agoago, “Hagabudulia denga amuamu mee e doe, e dee tili donu dahi mee daudahi.”

¹³ Gai gilaadeu ga hagabudu denga dibaa pelaoaa barley e doe i de gaimee ai o dangada ga hhao ai e madaangahulu ma lua gede.

¹⁴ Gai ga gidee huu e dangada de hagailonga a Iesu ne hai laa, gai gilaadeu ga hagataba, “Ni muna abodonu, deenei donu de Pelaabisi gu tala laa bolo e humai gi henua i lalo!”

¹⁵ Gai ga iloo huu e Iesu bolo dangada gu paba ange e loomai e hai gi de mahi ia, e hai ai delaadeu hodooligi, gai ia ga hagalilo ange hogi ga hanage sogosogo gi de mounga.

De seesee o Iesu i honga de vai

¹⁶ Gai ga ahiahi huu de mee, gai ana dangada agoago ga loiho gi de vai,

¹⁷ ga kage i de boose e aahe ai gi Capernaum i de baasi gee o de vai. Gai de masavaa ne boo ai de mee gai Iesu tigi dae mai donu gi olaadeu daha.

¹⁸ Gai gu daamada hogi i de beabeau i hiidinga de kona de ssau de madangi.

¹⁹ Gai de masavaa olaadeu ne gabegabe ga hulo, agu made gu dolu be gu haa maele olaadeu ne hulo ai, gai gilaadeu gu gidee adu Iesu e seesee mai i honga de vai, gai ia gu hagadagadaga ange donu de baa mai gi delaadeu boose. Gai gilaadeu gu maatagu mmao.

²⁰ Gai ia ga hai ange gi gilaadeu, “Go au deenei, goodou gi dee maatagu!”

²¹ Deelaa ai, gilaadeu gu malangilangi ga hakage mai ia gi lo te boose, gai gu moolau donu de dau de boose i de henua olaadeu e hulo laa aagena.

De ssala a dangada Iesu

²² De laangi i ono dua, gai dangada soa e doe laa i de baasi gee de vai ne gidee bolo e dahi donu huu boose nogo i kilaa, gai Iesu tee hano i de boose o ana dangada agoago ne hulo ai laa, go ana dangada agoago donu huu ne hulo ai.

²³ Gai hanu boose mai i Tiberias ne loomai laa gaogao de mommee a dangada ne gai ai pelaoaa i dua de hagaahe ange a Tagi Maolunga de abodonu.

²⁴ Gai ga gidee huu e dangada bolo Iesu ma ana dangada agoago e dee maleva i kilaa, gai gilaadeu ga kage i denga boose ange laa ga hulo ai gi Capernaum e ssala ai Iesu.

Iesu go de pelaoaa o de mouli

²⁵ De masavaa a dangada ne gidee ai ia i de baasi laa o de vai, gai gilaadeu ga ssili ange gi de ia, “Tangada Agoago, go ana hee oou ne humai ai naa gi kinei?”

²⁶ Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, goodou tee ssala au i hiidinga goodou gu gidee hanu hagailonga, aagai goodou ne ssala au i hiidinga goodou ne boobosu i de gai pelaoaa.

²⁷ Goodou aude hai hegau ange gi gai e odi laa, aagai hai hegau ange gi gai e daakodo ange laa gi de mouli e dee ngado mai, go gai a Tama a Tangada e gaavadu gi goodou, i hiidinga Tamana go de Maadua gu lava donu i de hagailonga ia.”

²⁸ Gai dangada ne ssili ange gi de ia, “Ni aha amaadeu e hai, gai gimaadeu ga hai hegau a de Maadua?”

²⁹ Iesu ne hai ange gi gilaadeu, “Aanei hegau a de Maadua: goodou hagadonusia de ia aana gu hai gi humai.”

³⁰ Gai gilaadeu ne ssili ange hogi gi Iesu, “Ni hagailonga bee hee aau e hagaago mai gi hagadonusia ai e gimaadeu goe? Ni aha naa aau e mau i de hai?

³¹ Omaadeu damana madagidagi ne gai manna i lodo henua, bei de hai gu sisi ai laa, ‘Ia ne gaavange gi gilaadeu hanu pelaoaa mai i de langi.’ ”

³² Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, e dee go Moses ne gaavadu gi goodou de pelaoaa mai i de langi, gai dogu Damana e gaavadu gi goodou de pelaoaa abodonu mai i de langi.

³³ Gai de pelaoaa a de Maadua go de ia ne hano iho mai i de langi, gai ia e gaavange de mouli gi henua i lalo.”

³⁴ Gai gilaadeu ga hai ange gi de ia, “Tangada aamua, gaamai gi gimaadeu de pelaoaa naa i laangi alodahi.”

³⁵ Iesu ne hai ange gi gilaadeu, “Go au de pelaoaa o de mouli; tangada e humai gi de au e dee haihai donu ga hiigai, gai tangada e hagadonu au e dee haihai naa donu ga hieunu.

³⁶ Aagai e bei dagu hai gu tala adu ai gi goodou: goodou gu gidee au, aagai goodou e dee hagadonusia.

³⁷ Dangada alodahi a Tamana e gaamai gi de au e loomai naa donu gi de au; aagai au e dee haihai naa donu ga tili tangada e humai gi de au.

³⁸ Go hiidinga au tee hano iho i de langi e hai donu huu ogu mee e lodo ai, gai au ne hano iho e hai lodo o de ia ne haia nei au gi humai.

³⁹ Gai deenei de mee o de ia ne haia nei au gi humai e lodo ai, au gi dee dilia dahi gilaadeu aana gu gaamai gi de au, aagai gi hagamouli ina age gilaadeu i de laangi hagaodi.

⁴⁰ Gai deenei de mee o dogu Damana e lodo ai, tangada e gidee Tama ga hagadonusia ia e maua de mouli e dee ngado mai; gai au e hagamouli age naa ia i de laangi hagaodi.”

⁴¹ Gai de gau Ssuu ga nnanu i de ia, go hiidinga ia ne hagadaba, “Go au de pelaoaa ne hano iho laa i de langi.”

⁴² Gilaadeu ne hagataba, “E dee go Iesu tama daane a Joseph deenei, gai gidaadeu e iloo hogi be goai luoono maadua? Gai dee hee dana hai e hagadaba ai nei bolo ia ne hano iho laa i de langi?”

⁴³ Iesu ne hai ange gi gilaadeu, “Goodou aude nnanu i oodou magavaa.

⁴⁴ E deai donu se dangada daudahi e maua i de humai gi de au, noo Tamana ne haia au gi humai e dee haia ia gi humai gi de au, gai au ga hagamouli age ia i de laangi hagaodi.

⁴⁵ Gu sisi i lodo beebaa a denga pelaabisi, ‘Gilaadeu alodahi e agoago naa i daho de Maadua.’ Gai be goai gu langona ma de agoago i daho Tamana e humai gi de au.

⁴⁶ Tigi ai donu se dangada ne gidee e ia Tamana; go Tama donu huu ne humai laa i daho de Maadua, go ia gu gidee Tamana.

⁴⁷ Ni muna abodonu, ni muna abodonu aagu e hai adu nei gi goodou, tangada e hagadonusia gu kave donu de mouli e dee ngado mai.

⁴⁸ Go au donu de pelaoaa o de mouli.

⁴⁹ Oodou damana madagidagi ne gai manna i lodo henua, gai gilaadeu ne maakau.

⁵⁰ Gai au de pelaoaa ne hano iho laa mai i de langi, gai be goai e gaina de pelaoaa nei gai ia e dee magau.

⁵¹ Go au de pelaoaa o de mouli ne hano iho mai i de langi; be goai e gaina de pelaoaa nei, gai ia e mouli ga hano ai. Gai de pelaoaa aagu e gaavange e hagamouli ai henua i lalo go dogu angaanga donu.”

⁵² Gai de gau Ssuu ga daamada de hagadaumee ga hagataba, “Dee hee de hai a taane nei e gaamai dono angaanga gidaadeu gi gaina?”

⁵³ Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, noo goodou e dee gai de angaanga o Tama a Tangada ma de unu ono dodo, aagai e deai se mouli i oodou daha.

⁵⁴ Be goai e gaina dogu angaanga ma de unu ogu dodo e dagodo donu de mouli e dee ngado mai i ono daha, gai au e hagamouli age naa ia i de laangi hagaodi.

⁵⁵ Go hiidinga dogu angaanga go gai abodonu, gai ogu dodo go mee unu abodonu.

⁵⁶ Be goai e gaina dogu angaanga ma de unu ogu dodo e noho donu i ogu lodo, gai au i ono lodo.

⁵⁷ Tamana e mouli laa ne hai au gi humai, gai au e mouli i hiidinga o Tamana, deenei ai, be goai e gaina dogu angaanga e mouli i ogu hiidinga.

⁵⁸ Go au de pelaoaa ne hano iho laa i de langi, gai e dee bei de pelaoaa a denga damana madagidagi ne gai laa, gai gilaadeu ne maakau. Gai be goai e gaina de pelaoaa nei e mouli ga hano ai.”

⁵⁹ Ia ne tala muna nei i lo te synagogue i dono masavaa ne agoago ai i Capernaum.

Muna o de mouli e dee ngado mai

⁶⁰ Gai ga langona huu e denga dangada agoago soa muna nei, gai gilaadeu ga hagataba, “Ni muna hai ngadaa aanei. Goai e maua i de kave?”

⁶¹ Gai ga iloo huu e Iesu bolo ana dangada agoago soa e nnanu i dagodo o de mee nei, gai ia ga hai ange gi gilaadeu, “Goodou gu llodo baageaa naa i muna nei?

⁶² Gai aahee naa oodou muna noo goodou e gidee Tama a Tangada e hanage gi de mommee oona nogo noho ai i mua?

⁶³ Go de Hagasaalunga ⌊Dabu⌋ e gaavange de mouli; de angaanga e deai ono haigamaiana. Muna aagu gu tala adu gi goodou go de Hagasaalunga ma de mouli.

⁶⁴ Aagai e hanu goodou e dee hagadonusia.” Gai Iesu gu iloo huu e ia mai i taamada age be goai gilaadeu e dee hagadonusia, gai goai e gaavange ia.

⁶⁵ Gai ia ga hai ange, “Aanei hiidinga aagu gu tala adu ai laa bolo e deai donu se dangada e maua i de humai gi de au noo Tamana e dee hai ia gi humai.”

⁶⁶ Dua de mee laa gai e soa ana dangada agoago gu aahe dua, gilaadeu gu dee daudali ange i de ia.

⁶⁷ Iesu ne ssili ange gi ana dangada agoago e dinoangahulu ma dogolua, “Goodou gu llodo naa hogi e hulo gee mai i ogu daha?”

⁶⁸ Simon Peter ne hai ange gi de ia, “Tagi Maolunga, gai go daho ai ange naa omaadeu e hulo aagena? Gai go oo daha iai muna o de mouli e dee ngado mai.

⁶⁹ Gimaadeu gu hagadonusia ma de iloo bolo go koe donu de Ia Dabu a de Maadua.”

⁷⁰ Iesu ne hai ange gi gilaadeu, “E aha, e dee go au ne hilia goodou, tinoangahulu ma dogolua? Gai dahi goodou se ia hagabaubau.”

⁷¹ Gai ia e basa i dagodo o Judas, tama daane a Simon Iscariot, go dahi i magavaa o tinoangahulu ma dogolua, gai ia ne gaavange Iesu i muli mai.