John 3 - De Beebaa Dabu

Iesu ma Nicodemus

¹ Gai e dahi daane i magavaa o denga Pharisee, dono ingoo go Nicodemus, gai ia se dagi niio de gau Ssuu.

² Taane nei ne humai gi daho Iesu i de boo, ga ssili ange gi de ia, “Tangada Agoago, gimaadeu e iloo, bolo koe se dangada agoago ne humai i daho de Maadua. Gai e deai ange donu se dangada e maua i de hai denga hagailonga aau e hai naa, noo de Maadua e dee noho i ono daha.”

³ Iesu ne hai ange gi de ia, “Ni muna abodonu, ni muna abodonu, aagu e hai adu nei gi de goe: noo tangada e dee haanau hoou, gai ia e dee maua donu gi gidee de nohoanga hodooligi o de Maadua.”

⁴ Gai Nicodemus ne ssili ange gi de ia, “Dee hee de hai o tangada, e ahe ange ai e haanau noo ia gu se dangada madua? E maua e ia i de ahe ange e ulu gi lo te dinae o dono dinana e haanau mai ange ai?”

⁵ Iesu ne hai ange, “Ni muna abodonu, ni muna abodonu, aagu e hai adu nei gi de goe, noo tangada e dee haanau i de vai aama de Hagasaalunga ⌊Dabu⌋, gai ia e dee maua donu, i de ulu i de nohoanga hodooligi o de Maadua.

⁶ De mee e haanau mai i de angaanga se angaanga, gai de mee e haanau mai i daho de Hagasaalunga se hagasaalunga.

⁷ Aude lele oo mouli i dagu hai adu gi de goe bolo koe gi ahe ange gi haanau hoou.

⁸ De madangi e ssau mai ga hano be go hee e hano laa aagena, koe e langona de leo o de madangi, aagai koe e dee iloo be go hee ne humai ai aabe go hee e hano laa aagena; gai e bei ai hogi dagodo o dangada gu haanau laa i de Hagasaalunga.”

⁹ Nicodemus ne ssili ange, “Dee hee de hai e maua ai i de hai mee nei?”

¹⁰ Iesu ne hai ange, “Koe se dangada agoago niio de gau Israel, gai koe e dee donu ange gi de mee nei?

¹¹ Ni muna abodonu, ni muna abodonu aagu e hai adu nei gi de goe, gimaadeu e pasa i mee amaadeu e iloo, gai gimaadeu e tala hagadonu mee amaadeu gu gide, aagai goodou e dee hagadonu amaadeu mee e tala adu.

¹² Au gu tala adu dagodo mee e hai i henua i lalo, gai goodou e dee hagadonu, gai dee hee doodou hai e maua ai i de hagadonu, noo au e tala adu gi goodou dagodo o mee e hai i de langi?

¹³ Tigi ai donu se dangada ne hanage gi de langi, aagai go Tama a Tangada donu huu ne hano iho laa i de langi.

¹⁴ Moses ne hagaduu age de labodo i de vao, gai Tama a Tangada e hagaduu age naa hogi,

¹⁵ gai be goai e hagadonusia ia, e maua de mouli e dee ngado mai.

De Maadua e aloha mmao i henua i lalo

¹⁶ “Gai de Maadua ne aloha mmao i henua i lalo, deelaa ai aana ne gaamai ai laa dana Dama Daane dagidahi, gai be goai e hagadonusia gai ia e dee magau donu, aagai e maua de mouli e dee ngado mai.

¹⁷ Gai de Maadua tee gaamai dana Dama Daane gi henua i lalo e hagaduasala ai henua i lalo, aagai ne gaamai e hagaola ai henua i lalo i ono daha.

¹⁸ Gai tangada e hagadonusia e dee hagaduasala donu, aagai be goai e dee hagadonusia gu lava donu i de hagaduasala, i hiidinga ia e dee hagadonusia Tama dagidahi a de Maadua.

¹⁹ Gai deenei de mee gu modu: de maalama ne humai gi henua i lalo, aagai dangada e kii de gohu i delaadeu llodo ai i de maalama, i hiidinga alaadeu hegau e baubau.

²⁰ Be goai e haia de baubau e kino donu i de maalama, gai ia e dee lodo e humai gi de maalama, kana ssula mai ana hegau baubau.

²¹ Gai tangada e haia de mee heohi e humai gi de maalama, gi gidee danuaa ai bolo ana hegau ni mee mai i daho de Maadua.”

John e tala hagadonu dagodo o Iesu

²² Dua mee laa gai Iesu ma ana dangada agoago ne hulo gi de lodo henua o Judea; gai gilaadeu ne noho i kilaa ga babudaisi ai dangada.

²³ De masavaa laa gai John e babudaisi dangada i Aenon, se mommee e baa ange gi Salim, i hiidinga e lagolago vai i kilaa, gai dangada ne loomai ga babudaisi i ono daha.

²⁴ De masavaa laa gai John tigi hhao gi lo te hale pono.

²⁵ Gai denga dangada agoago a John ma dahi daane Ssuu ne hagadaumee i dagodo o tahulinga o de hagagilimalali.

²⁶ Gai gilaadeu ne loomai gi daho John, ga hai ange, “Tangada agoago, taane nogo madali goe i de baasi laa o Jordan, gai koe gu tala hagadonu ono dagodo — tilo, ia e babudaisi hogi dangada, gai dangada alodahi gu hulo gi ono daha.”

²⁷ Gai a John ne basa ange ga hai ange, “E deai donu se mee a tangada e maua i de kave, noo e dee gaavange gi de ia mai i de langi.

²⁸ Goodou gu langona dagu tala bolo e dee go au de Klisdo, aagai au ne hai gi humai i ono mada i mua.

²⁹ Taane niiona de bodu go taane gu dai hagahai bodu. Gai ssoa o taane gu dai hagahai bodu e duu ma e tali e hagallongo ana muna, gai ia e malangilangi mmao i dana langona de leo o taane gu dai hagahai bodu. Deenei ai, dogu malangilangi gu honu danuaa.

³⁰ Ia gi hagadagadaga age, gai au gi hagadagadaga iho.”

De ia ne hano iho laa i de langi

³¹ De ia ne hano iho laa i de langi e maolunga ange i dangada alodahi; gai de ia mai i henua i lalo se dangada henua i lalo, gai ia e basa i mee o henua i lalo. Gai de ia ne hano iho laa i de langi e maolunga ange i dangada alodahi.

³² Gai ia e tala hagadonu ana mee gu gidee ma de langona; aagai e deai donu dangada e hagadonusia ana muna e tala.

³³ Gai tangada e hagadonusia ana muna gu tala hagadonu bolo de Maadua e hai hegau i de mee abodonu.

³⁴ Gai de ia a de Maadua ne hai gi humai e tala muna a de Maadua, gai de Maadua e gaavange gi de ia de Hagasaalunga ⌊Dabu⌋, gai e dee hagabau donu.

³⁵ Tamana e aloha i dana Dama Daane, gai gu dugu ange mee alodahi gi de ia.

³⁶ Be goai e hagadonusia Tama gai e maua e ia de mouli e dee ngado mai, aagai be goai e dee hagadonusia Tama e dee gidee e ia de mouli, aagai de bole o de Maadua e dagodo i ono elunga.