John 2 - De Beebaa Dabu

Taonga hagahai bodu i Cana

¹ Dua e lua laangi gai ne hai dahi daonga hagahai bodu i Cana o Galilee, gai tinana o Iesu i kilaa hogi.

² Gai Iesu ma ana dangada agoago ne saalaa hogi i taonga hagahai bodu laa.

³ Gai ga odi huu uvaini i taonga, gai tinana o Iesu ga hai ange gi de ia, “Gu odi alaadeu uvaini.”

⁴ Iesu ne hai ange gi de ia, “De hine, gu aha gu tala mai ai naa goe mee naa gi de au? Tigi dae dogu masavaa.”

⁵ Gai dono dinana ne hai ange gi de gau hai hegau, “Goodou haia gi bei mee alodahi aana e tala adu gi goodou.”

⁶ Gai e ono ssaa hhao vai e tuu i kilaa; ni ssaa e hhao ai vai e hagagilimalali ai, bei dagodo tahulinga a de gau Ssuu. Dahi manu laa se madalua aabe se matolu gaalene e hhao ai.

⁷ Iesu ne hai ange gi de gau hai hegau, “Haoa gi hoohonu denga ssaa naa i vai.” Gai gilaadeu ga hhao gu hoohonu denga ssaa laa.

⁸ Gai Iesu ga hai ange gi gilaadeu, “Asua hanu gaavee gi tagi o taonga.” Gai de gau hai hegau ne asu hanu ga kave gi tagi o taonga.

⁹ De masavaa a tagi o taonga ne mamia ange ai vai gu sui laa ma gu ni uvaini, gai ia tee iloo be go hee ne loomai ai uvaini laa, gai de gau hai hegau ne asua mai vai laa e iloo. Gai ia ga hagahi taane ne hagahai bodu laa,

¹⁰ ga hai ange gi de ia, “Dangada alodahi e gaavange uvaini danuaa hugadoo gi dangada i mua, gai de masavaa naa huu o dangada gu ssenga ai, gai gilaadeu ga dugu mai uvaini dai dee danuaa laa. Aagai koe ne dugu uvaini danuaa hugadoo gi de hagaodi!”

¹¹ Gai mee a Iesu ne hai laa i Cana i Galilee, go tahi hagailonga aana ne hai e hagaago mai ai dono mahamaha. Gai ana dangada agoago gu hagadonusia e gilaadeu ia.

¹² Dua mee laa gai Iesu ne hano gi Capernaum madali dono dinana, ma ono daina daane, aama ana dangada agoago. Gai gilaadeu ne nnoho i kilaa i hanu laangi.

De hagagilimalali o de temple

¹³ Gai ga baa mai huu Taonga Hagasili a de gau Ssuu, gai Iesu ga hanage gi Jerusalem.

¹⁴ Gai ia gu gidee dangada e hagao denga kaau, ma ssiibi, aama manu kono i lo te buibui o de temple, gai hanu e nnoho i denga deebele ma e seenisi ai sseene.

¹⁵ Gai ia ga bini dahi daula ga alualu ai dangada alodahi, gi hulo gee mai i lo te buibui o de temple, madali alaadeu ssiibi, ma kaau. Gai ia ne hagassii saele sseene hadu a dangada e seenisi ai denga sseene, ma de hagahuuhuli gi lalo alaadeu deebele.

¹⁶ Gai ia ga hai ange gi gilaadeu e hagao ina denga manu kono, “Goodou gaavee gee mee nei i kinei! Goodou aude haia de hale o dogu Damana gi se mommee hagao mee!”

¹⁷ Gai ana dangada agoago gu manadua e gilaadeu muna gu sisi laa, e hai ange, “Au gu kona mmao dogu lodo gaiaa, i hiidinga o doo hale.”

¹⁸ Gai de gau Ssuu ga ssili ange gi de ia, “Se hagailonga bee hee aau e hai e hagadonu ai, bolo e dahi oo sauaa e hai ai mee nei?”

¹⁹ Iesu ne hai ange gi gilaadeu, “Oohaa de temple nei, gai au ga hagaduu age ange i e dolu laangi.”

²⁰ De gau Ssuu ne hai ange, “Ne madahaa ma ono ngadau ne hagaduu ai de temple nei, gai koe e maua i de hagaduu age ange i e dolu donu huu laangi?”

²¹ Aagai gilaadeu tee tonu ange, bolo de temple oona e basa ai laa, go dono angaanga.

²² Deelaa ai, dua huu dono mouli age, gai ana dangada agoago gu manadua e gilaadeu muna a Iesu ne tala laa, gai gilaadeu gu hagadonusia muna o de Beebaa Dabu aama muna a Iesu gu tala.

Iesu e iloo dagodo lodo o dangada

²³ De masavaa oona e noho ai i Taonga Hagasili i Jerusalem, gai ne soa dangada ne hagadonusia dono ingoo, i delaadeu gidee denga hagailonga aana ne hai.

²⁴ Gai Iesu tee hagadonusia gilaadeu, go hiidinga ia e iloo lodo o dangada alodahi.

²⁵ Gai e dee se dangada donu ne daalaa ange gi de ia dagodo o dangada, go hiidinga ia e lava donu i dana iloo dagodo lodo o tangada.