John 19 - De Beebaa Dabu

De hagamodu muna o Iesu e daudau i de laagau lui

¹ Gai Pilate ne hai gi hagailiilia Iesu.

² Gai denga daane hebagi ne bini dahi hau manu duiduia ga hagauda ange gi honga dono biho, ma de hakahu ange ia i dahi malo purple.

³ Gai gilaadeu ne loomai, ga hai ange, “De laangi danuaa, de hodooligi o de gau Ssuu!” Gai gilaadeu ga hagailiili luoono mada.

⁴ Gai Pilate ga sao ange hogi gi duaahaho ga hai ange gi de gau Ssuu, “Tilo, au ga hagasao mai nei ia e gaavadu gi goodou, gai goodou gi iloo bolo au tee gidee donu dahi haisala daudahi i ono daha.”

⁵ Gai de masavaa huu o Iesu ne sao mai ai, gai ia gu hagauda de hau duiduia ma de gahu i de malo purple. Gai Pilate ga hai ange gi gilaadeu, “Tilo, deenei taane!”

⁶ De masavaa huu a de gau haimeedabu maolunga ma de gau hagaloosi ne gidee ai ia, gai gilaadeu ga hevaalogi, ga hagataba, “Daudau ina ia i de laagau lui, daudau ina ia i de laagau lui!” Pilate ne hai ange gi gilaadeu, “Goodou gaavee ia daudau ina i de laagau lui, gai au tee gidee donu dahi haisala daudahi i ono daha.”

⁷ De gau Ssuu ne hai ange gi de ia, “E dahi amaadeu hainga, gai de hainga laa gu hagamodu bolo ia e magau, i hiidinga ia e hagadaba bolo ia go Tama Daane a de Maadua.”

⁸ De masavaa huu a Pilate ne langona ai muna laa, gai ia gu kii ange donu dono madagu;

⁹ gai ia ga ulu ange hogi gi lo te hale ga ssili ange gi Iesu, “Go hee oou ne humai ai?” Gai Iesu tee basa ange donu.

¹⁰ Pilate ne hai ange gi de ia, “Koe e dee lodo e basa mai gi de au? Koe e dee iloo laa bolo e dahi ogu sauaa e hagaola ai goe aabe go de daudau goe i de laagau lui?”

¹¹ Iesu ne hai ange gi de ia, “E deai donu soo sauaa noo e dee gaavadu gi de goe mai i lunga. Deelaa ai, tangada ne gaavadu au gi de goe e kii ange dono haisala i de goe.”

¹² De masavaa laa gai Pilate gu hagatale de hagaola ai Iesu, aagai de gau Ssuu ne hevaalogi ga hai ange, “Noo koe e hagaola taane nei, gai koe e dee se soa niio Caesar; tangada e hagadaba bolo ia se hodooligi e hai baasi ange donu gi Caesar.”

¹³ Gai ga langona huu e Pilate muna laa, gai ia ga hagasao mai Iesu ma de noho i honga dono seaa hagamodu muna, i de mommee e hagaingoo ange go de Mommee e Hola i Hadu Malali (gai muna Aramaic go Gabbatha).

¹⁴ Gai de laangi laa go de laangi e hagadabena ai Taonga Hagasili; agu made gu daa tuele. Gai Pilate ga hai ange gi de gau Ssuu, “Tilo, deenei doodou Hodooligi!”

¹⁵ Gai gilaadeu ga hevaalogi ga hai ange, “Gaavee gee ia, gaavee gee ia, daudau ina ia i de laagau lui!” Pilate ne ssili ange gi gilaadeu, “Goodou e llodo au gi daudaulia doodou Hodooligi i de laagau lui?” Gai de gau haimeedabu maolunga ga hai ange, “E deai ange donu semaadeu hodooligi, go Caesar donu huu.”

¹⁶ Gai Pilate ga gaavange Iesu gilaadeu gi gaavee gi daudau ina i de laagau lui. Deelaa ai, gilaadeu ne dagi Iesu ga kave,

De daudau o Iesu i de laagau lui

¹⁷ gai ia ne saabai dono laagau lui ga hano ai, gi de mommee e hagaingoo ange laa go de Mommee o de Ivi o de Biho, gai muna Aramaic e hai ange bolo go Golgotha.

¹⁸ Gai gilaadeu ne daudau ia i kilaa madali e dogolua daane, dahi i dono baasi madau, gai dahi i dono baasi masui, gai Iesu i olaau magavaa.

¹⁹ Gai Pilate ne sisi dahi mee ga hagapigi age gi ulu de laagau lui, e hai ange, “Iesu taane Nazareth, de Hodooligi o de gau Ssuu.”

²⁰ Ne soa dangada Ssuu ne daulia muna laa, go hiidinga de mommee o Iesu ne daudau ai laa e baa ange gi de aduhale; gai muna laa e sisi i muna Aramaic, ma muna Latin aama muna Greek.

²¹ Gai de gau haimeedabu maolunga o de gau Ssuu ga hai ange gi Pilate, “Aude siia ange ‘de Hodooligi o de gau Ssuu’, gai siia ange bolo taane nei e hagadaba bolo ia go de Hodooligi o de gau Ssuu.”

²² Pilate ne hai ange, “Mee aagu gu lava i de sisi, e dugu bei dagu hai gu sisi ai.”

²³ Gai ga lava huu de daudau a denga daane hebagi Iesu i de laagau lui, gai gilaadeu ga kave ono malo ga vvae haa, dahi gilaadeu ne kave dahi, gai dono malo laa lodo e doe. De malo laa ne llanga mai i de ulu ga dae ai gi de bido i lalo, gai e buni donu huu.

²⁴ Gai gilaadeu ga hagataba, “Gidaadeu e dee ssae de malo nei. Gai gidaadeu ga dada e tilo ai be goai e gaavee de malo nei.” De mee nei ne hai e hagassula ai muna a de Beebaa Dabu, “Gilaadeu ne vaevae ogu malo i olaadeu magavaa, ma de dada e tilo ai be goai e gaavee dogu malo.” Aanei mee a denga daane hebagi ne hai.

²⁵ Gai dono dinana e duu i de baasi gee o de laagau lui o Iesu, ma taina o dono dinana, ma Mary de bodu o Clopas, aama Mary Magdalene.

²⁶ Gai ga gidee huu e Iesu dono dinana, ma tangada agoago oona e aloha ai laa e tuu i ono gaogao, gai ia ga hai ange gi dono dinana, “De hine, deenei dau dama daane!”

²⁷ Gai ia ne hai ange gi tangada agoago laa, “Tilo, deenei doo dinana!” Mai i de masavaa laa gai tangada agoago laa ne kave de hine laa gi noho i dono hale.

De magau o Iesu

²⁸ Dua mee laa, gai Iesu gu iloo bolo mee alodahi gu lava, gai gi hagassula ai muna a de Beebaa Dabu, gai Iesu ga hagadaba, “Au gu hieunu.”

²⁹ Gai e dahi ssaa iai hanu uvaini mmala e duu i kilaa. Gai gilaadeu ne hai dahi laagau hyssop, ga velo age ai dahi galagala iai uvaini mmala ga daohi ange gi dono ngudu.

³⁰ Gai ga lava huu i dana unu mee laa, gai Iesu ga hagadaba, “Gu lava.” Gai ia ga ino iho dono biho ga dugu gi hano dono hagasaalunga.

De velo de gaogao o Iesu

³¹ De laangi laa se laangi hagadabena, gai de laangi i ono dua se Sabbath maolunga. Gai dagi o de gau Ssuu ne dangidangi ange gi Pilate gi hadihadia vae o de gau laa, go hiidinga gilaadeu e dee llodo hanu dangada maakau gi daudau i honga denga laagau lui i de laangi o Sabbath.

³² Gai denga daane hebagi ne loomai e hadihadi vae o tahi daane ne daudau madali Iesu aama taane ange laa.

³³ Aagai ga loomai huu gilaadeu e hadihadi luu vae o Iesu, gai gilaadeu gu gide bolo ia gu magau. Deelaa ai, gilaadeu tee hadihadi luoono vae.

³⁴ Aagai dahi daane hebagi ga velo dono gaogao i tao, gai gu ssali mai ai dodo ma vai.

³⁵ Gai taane ne gidee mee nei ne tala hagadonu mee nei, gai ana muna ni muna abodonu. Gai ia e iloo bolo ia e tala de muna abodonu, gi hagadonusia ai e goodou.

³⁶ Gai mee nei ne hai e hagassula ai muna a de Beebaa Dabu, “E deai donu sono ivi daudahi e hadi.”

³⁷ Gai e hai ange hogi i dahi mommee, “Gilaadeu e gidee naa de ia alaadeu ne velo laa.”

De danu o Iesu

³⁸ Dua mee nei gai Joseph taane Arimathea ne dangidangi ange gi Pilate i de angaanga o Iesu. Joseph go dahi dangada agoago a Iesu, aagai ia tigi tala i hiidinga ia e madagu i de gau Ssuu. Gai Pilate ne dugu ange, gai ia ga kave gee dono angaanga.

³⁹ Taane hogi go Nicodemus, ne humai laa gi Iesu i de boo, ne humai ga gaamai hanu myrrh ma aloe gu hilo, agu made se lau pauni.

⁴⁰ Gai gilaadeu ga kave de angaanga o Iesu ga saabini i denga malo linen madali denga mee maanongi, bei dagodo tahulinga a de gau Ssuu e danu ai dangada.

⁴¹ Gai de mommee o Iesu ne daudau ai i de laagau lui, e dahi veelenga iai, gai lo te veelenga laa e dahi daanunga gu lava i de hoda i lo te baba. Gai tigi ai donu dangada ne hagadaakodo ai.

⁴² Gai go hiidinga de laangi laa se laangi e hagadabena niio de gau Ssuu, gai taanunga laa e baa ange, gai gilaadeu ga kave Iesu ga hagadagodo i kilaa.