John 18 - De Beebaa Dabu

De boogia o Iesu

¹ Gai ga lava huu i dana tala muna nei, gai gilaadeu ma ana dangada agoago ga hulo gee i kilaa ga hulo laa lo te geelonga go Kidron gi de baasi laa. Gai e dahi veelenga i de baasi laa, gai gilaadeu ne hulo gi lo te veelenga laa.

² Gai Judas, taane ne gaavange laa ia, e iloo hogi e ia de mommee laa, go hiidinga Iesu ma ana dangada agoago e dee modu de hedae i kilaa.

³ Gai Judas ne hano ga gaamai dahi hagabuulinga hebagi, ma hanu daane hagaloosi, i daho de gau haimeedabu maolunga ma denga Pharisee. Gilaadeu ne loomai ma alaadeu mee haula ma laama aama goloa hebagi.

⁴ Gai Iesu gu iloo donu e ia mee alodahi gu dai hai ange gi de ia, gai ia ga hano ga ssili ange gi gilaadeu, “Goai oodou e ssala?”

⁵ Gai gilaadeu ga hai ange, “Go Iesu tangada Nazareth.” Iesu ne hai ange gi gilaadeu, “Go au donu deenei.” (Gai Judas, taane ne gaavange laa ia, e duu madali gilaadeu.)

⁶ De masavaa a Iesu ne hai ange ai gi gilaadeu, “Go au donu deenei,” gai gilaadeu ga aahe dua gu baakuu gi honga de gelegele.

⁷ Gai ia ga ahe anga ga ssili ange gi gilaadeu, “Goai oodou e ssala?” Gai gilaadeu ne hai ange, “Go Iesu tangada Nazareth.”

⁸ Iesu ne hai ange, “Au gu tala adu bolo go au donu deenei. Noo go au oodou e ssala, gai goodou dugua denga daane ange nei gi hulo.”

⁹ (De mee nei ne hai e hagassula ai ana muna gu tala laa, “Au tee tili donu dahi gilaadeu aau ne gaamai gi de au.”)

¹⁰ Gai Simon Peter, e dahi ana gadilaasa, gai ia ga unusi dana gadilaasa ga tuu ai gu doo talinga madau o tangada hai hegau o tangada haimeedabu maolunga. Gai de ingoo o taane hai hegau laa go Malchus.

¹¹ Gai Iesu ga hai ange gi Peter, “Hagaahea ange dau gadilaasa gi lo tono hale; koe e maanadu bolo au e dee unu i de ubu o de hagaduasala a dogu Damana gu gaamai gi de au?”

Iesu i mada i mua o Annas

¹² Gai de hagabuulinga hebagi laa ma olaadeu dagi aama dagi o de gau Ssuu ne poo Iesu ga nnoa,

¹³ ga kave gi daho Annas i mua, go ssaulaba o Caiaphas, tangada haimeedabu maolunga i de ngadau laa.

¹⁴ Caiaphas go taane ne hai ange laa gi dagi o de gau Ssuu, bolo e danuaa de magau o dahi dangada e sui ai dangada alodahi.

De hagadee iloo a Peter Iesu

¹⁵ Gai Simon Peter ne daudali adu i dua o Iesu, gai e dahi ange agoago madali ia. Gai tangada agoago ange laa ne hano ga ulu gi lo te buibui o de hale o tangada haimeedabu maolunga madali Iesu, i hiidinga ia e iloo tangada haimeedabu maolunga laa,

¹⁶ gai Peter ne duu i haho i gaogao de haitoga. Gai tangada agoago e iloo laa e ia tangada haimeedabu maolunga, ne ahe mai ga basa ange gi tamaa hine e duu laa i gaogao haitoga, ga hagaulu mai Peter gi lodo.

¹⁷ Gai tamaa hine e hagaloosi ina laa de haitoga ne ssili ange gi Peter, “Koe e dee go dahi dangada agoago a taane laa?” Ia ne hai ange, “E deai.”

¹⁸ Gai de gau hai hegau ma de gau hagaloosi gu dahu dahi ahi, i hiidinga gu hagamagalili de mee. Gai gilaadeu e tuu ma e hagamahanahana i de ahi. Gai Peter ne duu hogi madali gilaadeu ma e hagamahanahana.

Tangada haimeedabu maolunga e ssili ange gi Iesu

¹⁹ Gai tangada haimeedabu maolunga ne ssili ange gi Iesu dagodo o ana dangada agoago aama ana agoago.

²⁰ Iesu ne hai ange gi de ia, “Au ne agoago i madamada o dangada alodahi. Au ne agoago i laangi alodahi i lodo synagogue ma lo te temple, go de mommee o de gau Ssuu alodahi e hagabuni ai. Au tee tala hagammuni donu dahi mee.

²¹ Gai gu aha gu ssili mai ai naa goe gi de au? Siilia ange gi dangada ne langona agu muna ne tala ange gi gilaadeu; gilaadeu e iloo agu muna ne tala.”

²² De masavaa o Iesu ne basa ange ai bee nei, gai dahi dangada hagaloosi e duu laa i kilaa ga hagaili ia, ga hai ange, “Gu aha gu basa ange ai naa goe bee naa gi tangada haimeedabu maolunga?”

²³ Iesu ne hai ange gi de ia, “Noo tee heohi agu muna ne tala, gai koe daalaa mai be se aha tee heohi. Aagai noo ne heohi agu muna ne tala, gai gu aha goe gu hagaili ai nei au?”

²⁴ Gai Annas ne hai gilaadeu gi noodia Iesu gi gaavee gi Caiaphas, tangada haimeedabu maolunga.

Peter e hagadee iloo ange hogi Iesu

²⁵ De masavaa laa gai Simon Peter e duu ma e hagamahanahana i gaogao de ahi. Gai dangada i kilaa ne ssili ange gi de ia, “Koe e dee se dangada agoago hogi nii taane laa?” Gai ia ga hagadee iloo mee laa ga hai ange, “E deai.”

²⁶ Gai dahi dangada hai hegau o tangada haimeedabu maolunga, se dangada niio taane a Peter ne tuu laa ga doo dono dalinga, ne ssili ange, “E dee go koe aagu ne gidee laa madali ia i lo te veelenga?”

²⁷ Gai Peter ne hagadee iloo ange hogi mee laa. De masavaa laa donu huu gai gu goo de gaagoo daane.

Iesu i mada i mua o Pilate

²⁸ Gai boo taiao donu huu gai gilaadeu ga dagi mai Iesu i de hale o Caiaphas ga kave gi de Praetorium, go de hale o de goobenaa. Gai de gau Ssuu tee ulu gi lo te mommee laa, kana dee gilimalali naa gilaadeu ga dee maua i de gaimee i Taonga Hagasili.

²⁹ Gai Pilate ga sao mai ga hai ange gi gilaadeu, “Se aha oodou e hagabaubau ai taane nei?”

³⁰ Gilaadeu ne hai ange gi de ia, “Noo taane nei tee hai de baubau, gai gimaadeu tee gaamai donu ia gi de goe.”

³¹ Pilate ne hai ange gi gilaadeu, “Goodou gaavee donu huu ia mage hagamodu ina ono muna i oodou hainga.” De gau Ssuu laa ne hai ange gi de ia, “E dee alaange demaadeu daa dahi dangada gi magau.”

³² (De mee nei ne hai e hagassula ai muna a Iesu gu tala ai laa dagodo o dono hai e magau ai.)

³³ Gai Pilate ga ulu ange hogi gi lo te hale, ga hagahi Iesu ga hai ange gi de ia, “Go koe de Hodooligi o de gau Ssuu?”

³⁴ Iesu ne ssili ange, “Go koe donu ne lodo naa e siilia muna naa, aabe ni dangada ne daalaa adu gi de goe ogu dagodo?”

³⁵ Pilate ne hai ange, “Au e dee se dangada Ssuu! Go doo huaahenua ma de gau haimeedabu maolunga ne gaamai nei goe gi de au. Gai ni aha donu aau gu hai?”

³⁶ Iesu ne hai ange, “Dogu nohoanga hodooligi e dee se mee mai i henua i lalo. Noo dogu nohoanga hodooligi se mee mai i henua i lalo, gai ogu dangada hai hegau ga hebagi, gi dee gaavange ai au gi de gau Ssuu. Aagai dogu nohoanga hodooligi se mee mai i dahi mommee gee.”

³⁷ Gai Pilate ne ssili ange gi de ia, “Koe se hodooligi?” Iesu ne hai ange, “Koe gu hagadaba bolo au se hodooligi. Deenei dogu hiidinga ne haanau mai ai nei, ma de humai gi henua i lalo; gai au ga tala hagadonu ai dagodo o de mee abodonu. Be goai e daohia de mee abodonu gai ia e hagallongo agu muna.”

³⁸ Pilate ne ssili ange gi de ia, “Gai dee hee donu de mee abodonu?” Gai dua de tala a Pilate muna laa gai ia ga sao ange hogi gi haho ga hai ange gi de gau Ssuu, “Au tee gidee dahi haisala daudahi i ono daha.

De hagamodu muna o Iesu e daa gi magau

³⁹ Gai e dahi oodou dahulinga i de masavaa o Taonga Hagasili: au e hagasao mai dahi dangada i lo te hale pono e gaavadu gi goodou; goodou e llodo au gi hagasao ina mai de Hodooligi o de gau Ssuu e gaavadu gi goodou?”

⁴⁰ Gilaadeu ne hevaalogi hogi ga hai ange, “E dee go ia, gai go Barabbas!” Gai Barabbas se daane gaiaa.