John 15 - De Beebaa Dabu

Iesu de grapevine abodonu

¹ “Go au de grapevine abodonu, gai dogu Damana go de ia hai veelenga.

² Laa alodahi e deai olaadeu hua, gai ia e duuduu ga tili, aagai laa alodahi iai hua, gai ia e velevele gi kii ange ai de hhua lagolago.

³ Goodou gu lava i de hai ma gu gilimalali, i hiidinga o agu muna gu tala adu ai goodou.

⁴ Goodou nnoho i ogu lodo, gai au i oodou lodo. E deai donu se laa e maua gi hua, noo e dee somo mai i de grapevine. Goodou e dee maua hogi gi hanu oodou hua, noo goodou e dee nnoho i ogu lodo.

⁵ Go au de grapevine; goodou go denga laa. Be goai e noho i ogu lodo, gai au e noho i ono lodo, gai ia e hua lagolago. Goodou e dee maua donu i de hai dahi mee daudahi, noo goodou e dee noho i ogu lodo.

⁶ Noo tangada e dee noho i ogu lodo, gai ia e bei de laa gu tuu laa ma gu tili, gai gu mmae; laa bee nei e hagabudu ga tili ange gi lo te ahi ga dudu ai.

⁷ Noo goodou e nnoho i ogu lodo, gai agu muna e daakodo i oodou lodo, gai be se aha naa huu oodou e dangidangi mai ai, gai e gaavadu donu gi goodou.

⁸ Deenei de mee e hagamahamaha ai dogu Damana, go doodou hhua lagolago, e hagaago mai ai bolo goodou ni dangada agoago donu niiagu.

⁹ Au ne aloha i goodou, bei de hai a dogu Damana e aloha ai laa i de au; goodou duudagina de nnoho i lalo dogu aloha.

¹⁰ Noo goodou e daudali i agu muna, gai goodou e nnoho donu i lalo dogu aloha, bei dagu hai ne daudali ai laa i muna a dogu Damana, ma de noho i lalo dono aloha.

¹¹ Au gu tala adu mee nei gi goodou, gi dagodo ai dogu malangilangi i oodou lodo, gai gi honu danuaa ai doodou malangilangi.

¹² Aanei agu muna, goodou hagadau aaloha bei dogu hai ne aloha ai i goodou.

¹³ E deai donu se aloha e laumalie ange i de mee nei: go de gaavange a dahi dangada dono mouli, i hiidinga o ono soa.

¹⁴ Goodou ni soa donu niiogu, noo goodou e daudali i agu muna e tala adu gi goodou.

¹⁵ Au e dee hagadaba bolo goodou ni dangada hai hegau, go hiidinga tangada hai hegau e dee iloo, be ni aha a dono dangada aamua e hai. Gai au e hagadaba bolo goodou go ogu soa, go hiidinga au gu tala adu agu mee alodahi gu langona i daho dogu Damana.

¹⁶ E dee go goodou ne hilia nei au, aagai go au ne hilia goodou ga hagadabu, ga hai goodou gi hulo gi haia gi lagolago oodou hua, gai oodou hua gi daakodo ga hano ai. Gai be se aha naa huu oodou e dangidangi ange ai gi Tamana i dogu ingoo, gai ia e gaavadu donu gi goodou.

¹⁷ Aanei agu muna adu gi goodou: goodou hagadau aaloha!

De kino o henua i lalo i goodou

¹⁸ “Noo henua i lalo e kino i goodou, gai goodou gi manadua bolo henua i lalo ne kino hogi i de au, i mua delaadeu kino i goodou.

¹⁹ Noo goodou ni dangada henua i lalo, gai henua i lalo e aloha i ono dangada donu; gai goodou e dee ni dangada henua i lalo, aagai au gu hili ma gu vvae gee goodou mai i henua i lalo, deelaa ai, henua i lalo e kino i goodou.

²⁰ Goodou manadua agu muna gu tala adu gi goodou, ‘Tangada hai hegau e dee maolunga ange i dono dangada aamua.’ Noo gilaadeu ne vaivai hai au, gai gilaadeu e vaivai hai naa hogi goodou. Noo gilaadeu ne daohi agu muna, gai gilaadeu e daohi naa hogi oodou muna.

²¹ Aagai gilaadeu e hai adu naa mee nei alodahi gi goodou i hiidinga o dogu ingoo, go hiidinga gilaadeu e dee iloo de ia ne haia nei au gi humai.

²² Noo au tee humai ga tala ange muna nei gi gilaadeu, gai gilaadeu e dee haisala. Aagai iainei gilaadeu gu dee maua i de hagaheohi olaadeu haisala.

²³ Tangada e kino i de au, e kino hogi i dogu Damana.

²⁴ Noo au tee hai denga hegau hagalele mouli i olaadeu magavaa, tigi ai ange laa dangada ne haia, gai gilaadeu tee hagabaubau ina i delaadeu haisala. Aagai gilaadeu gu gidee donu agu hegau, gai goi kino huu i gimaau ma dogu Damana.

²⁵ Gai de mee nei gu bei donu muna gu sisi laa, i lodo alaadeu hainga ma e hai ange, ‘Gilaadeu ne kino i de au, gai e deai donu hiidinga.’

Hegau a de Hagasaalunga Dabu

²⁶ “De masavaa naa huu o de Ia Bale e humai ai, go de ia aagu e hai gi humai i daho Tamana — go de Hagasaalunga o de muna abodonu, e humai laa i daho Tamana — gai ia ga tala hagadonu adu ogu dagodo.

²⁷ Gai goodou ga tala hagadonu ai hogi ogu dagodo, go hiidinga goodou gu nnoho mai huu madali au i taamada.