John 12 - De Beebaa Dabu

De hagasulu o Iesu i de lolo i Bethany

¹ Gai ga ono huu laangi i mua Taonga Hagasili, gai Iesu ga hano gi Bethany, de aduhale o Lazarus, taane a Iesu ne hagamouli age laa i de magau.

² Gai gilaadeu ne hai ange dahi daonga gi Iesu i kilaa. Martha e duha denga gai, gai Lazarus e hakaogao i teebele madali ia.

³ Gai Mary ga gaamai dahi pauni vai hagamanongi hagao ngadaa mmao e hai i nard ga hagasulu ai luu vae o Iesu, ma de ssolo luoono vae i ono ngaangaaulu. Gai lo te hale laa alodahi gu manongi i de vai laa.

⁴ Gai Judas Iscariot, dahi dangada agoago a Iesu, gai go taane ne gaavange laa ia, ga ssili ange,

⁵ “Gu aha tee kave ai laa de vai naa e hagao, gi maua mai ai e dolulau denarius e gaavange gi de gau hagaau aloha?”

⁶ Ia tee tala muna laa i hiidinga ia e aloha i de gau hagaau aloha, gai go hiidinga ia se dangada gaiaa, go ia e doange de beagi sseene. Gai e dee modu donu dana gaiaa denga sseene i lo te beagi laa.

⁷ Deelaa ai, Iesu ne hai ange, “Aude hakoso ina ia, ia e hai de hegau nei i mua de laangi oogu e danu ai.

⁸ De gau hagaau aloha e nnoho i oodou daha i masavaa alodahi, aagai au e dee noho i oodou daha i masavaa alodahi.”

Hagasaele ange de hai e daa ai Lazarus gi magau

⁹ Gai ga iloo huu e de gau Ssuu soa bolo Iesu gu dae mai gi kilaa, gai gilaadeu ga loomai i hiidinga o Iesu aama de tilo ai hogi Lazarus, taane a Iesu ne hagamouli age mai i de magau.

¹⁰ Gai de gau haimeedabu maolunga gu nnoho hogi e sala delaadeu hai e daa ai Lazarus gi magau,

¹¹ i hiidinga gu soa de gau Ssuu ne hulo ma gu dau ange gi Iesu ma de hagadonusia ia.

De ulu o Iesu i Jerusalem

¹² De laangi i ono dua, gai dangada soa ne loomai laa gi taonga, ne langona bolo Iesu e humai naa gi Jerusalem.

¹³ Deelaa ai, gilaadeu ne duuduu iho denga lau palm ga hulo ai e hedae ange gi de ia, ga hagataba, “Hosanna! E manuuia tangada e humai i de ingoo o Tagi Maolunga, de Hodooligi o Israel!”

¹⁴ Gai Iesu ne gidee e ia dahi donkey gauligi, gai ia ga gage ange ga noho i ono elunga; bei de hai gu sisi ai laa,

¹⁵ “Tamaa hine o Zion, aude madagu; tilo, doo hodooligi e humai naa, gai ia e gage i honga tama a dahi donkey!”

¹⁶ Gai ana dangada agoago tee tonu ange gi de mee nei i taamada. Gai dua huu de hagamahamaha o Iesu, gai gilaadeu gu manadua bolo mee nei gu lava donu i de sisi ma e tala ai ono dagodo, gai mee nei gu hai ange donu gi de ia.

¹⁷ Gai dangada soa nogo nnoho laa madali ia i de masavaa aana ne hagahi ai Lazarus gi sao mai i lo te daanunga, ga hagamouli age ia, ne hulo ga hagadele mee ne hai laa.

¹⁸ Gai dangada soa ne hulo e hedae ange gi de ia, go hiidinga gilaadeu gu langona dana hai de hagailonga laa.

¹⁹ Gai denga Pharisee ne hagataba i olaadeu magavaa, “Kalo ange diiloo, gu deai donu adaadeu mee e mau i de hai. Tilo, henua i lalo alodahi gu daudali ange i de ia.”

De ssala a hanu daane Greek Iesu

²⁰ Gai e hanu hogi daane Greek ne loomai e daumaha i masavaa o Taonga.

²¹ Gai gilaadeu ne loomai gi daho Philip, taane Bethsaida i Galilee, ga hai ange, “Tangada aamua, gimaadeu e llodo e hedae ange gi Iesu.”

²² Gai a Philip ga hano ga tala ange gi Andrew, gai gilaau ga hulo ga tala ange gi Iesu.

²³ Gai Iesu ga hai ange gi gilaau, “Gu dae mai de masavaa e hagamahamaha ai Tama a tangada.

²⁴ Ni muna abodonu, ni muna abodonu aagu e hai adu nei gi goodou, noo de hua grain e dee doo gi lo te gelegele ga bobo ai, gai e dahi donu huu hua laa, aagai noo e doo iho ga bobo, gai e somo age naa ga lagolago ono hua.

²⁵ Be goai e hagamogomogo ina dono mouli aama e tili donu, gai be goai e kino i dono mouli i henua i lalo nei, gai ia e doange dono mouli gi de mouli e dee ngado mai.

²⁶ Be goai e hai hegau mai gi de au, gai ia gi daudali mai i de au. Gai go hee naa huu oogu iai, gai go kilaa hogi o dogu dangada hai hegau iai. Gai dogu Damana e hagadubu tangada e hai hegau mai gi de au.

De tala a Iesu dono magau

²⁷ “Ogu lodo gu daemaha mmao iainei. Gai aahee naa agu muna e tala ange? ‘Tamana, hagaola ina mai au i de aoaa nei’? E deai, gai aanei donu ogu hiidinga ne duu ange ai nei gi de aoaa nei.

²⁸ Tamana, hagamahamaha ina doo ingoo.” De masavaa laa donu huu gai gu langona de leo mai i de langi, e hagadaba, “Gu lava donu i dagu hagamahamaha dogu ingoo, gai au e ahe ange naa hogi ga hagamahamaha.”

²⁹ Gai dangada soa e tuu laa i kilaa ma de langona de leo laa ne maanadu bolo se hatuli, gai hanu ne hagataba, “Dahi dangada de langi gu basa ange gi de ia.”

³⁰ Iesu ne hai ange, “De leo nei tee humai i ogu hiidinga, aagai ne humai i oodou hiidinga.

³¹ Iainei go de masavaa e hagamodu ai muna o henua i lalo nei; gai tagi o henua i lalo nei e tili naa gi tua.

³² Aagai aanei ogu dagodo, de masavaa naa huu oogu e hagaduu age ai i henua i lalo, gai au ga hai gi loomai dangada alodahi gi de au.”

³³ Gai ia ne tala muna nei e hagaago ange ai dono hai e magau ai.

³⁴ Dangada ne hai ange gi de ia, “Gimaadeu gu langona mai i de hainga bolo de Klisdo e mouli naa donu huu ga hano ai. Gai dee hee dau hai e tala mai ai naa bolo Tama a Tangada e hagaduu age? Goai Tama a tangada oou e basa ai naa?”

³⁵ Iesu ne hai ange gi gilaadeu, “De maalama e dagodo i oodou daha i dahi damaa masavaa. Goodou seesee i de masavaa e dahi ai maalama kana daea mai e de gohu goodou. Tangada e seesee i de gohu e dee gidee e ia dono mommee e seesee ai.

³⁶ Goodou hagadonusia de maalama, i de masavaa o de maalama i oodou daha ai, gi ni dama ai goodou nii de maalama.” Gai ga lava huu i de tala a Iesu muna nei, gai ia ga hano gee i kilaa ga mmuni i gilaadeu.

Teai se hagadonu i daho dangada

³⁷ Aagai e dee galemu donu de lagolago hagailonga a Iesu ne hai i madamada o dangada, gai gilaadeu tee hagadonusia donu ia.

³⁸ De mee nei ne hai e hagassula ai muna a de pelaabisi go Isaiah: “Tagi Maolunga, goai ne hagadonusia amaadeu muna, gai goai a Tagi Maolunga gu hagaago ange aagena dono sauaa?”

³⁹ Deelaa ai, gilaadeu tee hagadonusia, go hiidinga e bei de hai a Isaiah gu tala,

⁴⁰ “Ia gu hai gi dee kide gilaadeu ma de hagamakaga olaadeu lodo, kana gidee naa huu e gilaadeu ga tonu ange gai gilaadeu ga daahuli olaadeu lodo, gai au ga hagaieiangi gilaadeu.”

⁴¹ Isaiah ne tala de mee nei i hiidinga ia ne gidee de mahamaha o Iesu gai ia ga tala ono dagodo.

⁴² Aagai ne soa i magavaa o denga dagi ne hagadonusia Iesu, aagai gilaadeu tee tala i hiidinga o denga Pharisee, kana alualumia gilaadeu gi dee ulu i de synagogue;

⁴³ go hiidinga e kii de tuhi mai i daho dangada i delaadeu llodo ai, i de tuhi mai i daho de Maadua.

Go muna a Iesu e hagamodu ai muna o tangada

⁴⁴ Gai Iesu ne oo ga hagadaba, “Tangada e hagadonusia au e hagadonusia donu hogi de ia ne haia ngau gi humai.

⁴⁵ Tangada gu gidee au gu gidee donu hogi de ia ne haia au gi humai.

⁴⁶ Au ne humai e hai ai de maalama o henua i lalo, gai be goai e hagadonusia au gai ia e dee noho donu i lo te gohu.

⁴⁷ Gai noo tangada e langona agu muna aagai e dee daudali ai, gai au e dee hagamodu ono muna, go hiidinga au tee humai e hagamodu muna o henua i lalo, gai au se humai e hagaola henua i lalo.

⁴⁸ Tangada e kino i de au ma tee daohi agu muna e dahi donu mee e hagamodu ai ono muna; go agu muna gu tala e hagamodu ai ono muna i de laangi hagaodi.

⁴⁹ Gai au tee basa i dogu sauaa donu huu, gai go Tamana donu ne haia nei au gi humai ne daalaa mai agu muna e tala ma dagu hai e tala ai.

⁵⁰ Gai au e iloo bolo ana muna e tala go de mouli e dee ngado mai donu. Deelaa ai, agu muna e tala nei e tala donu bei de hai a Tamana gu tala mai ai gi de au.”