John 10 - De Beebaa Dabu

De mee hagasengasenga o tangada hagaloosi ssiibi

¹ “Ni muna abodonu, ni muna abodonu aagu e hai adu nei gi goodou, tangada e dee ulu mai gi lo te buibui o denga ssiibi i de haitoga, aagai e gage mai gi lodo i dahi mommee gee, se dangada gaiaa ma de daa dangada.

² Gai tangada e ulu mai i de haitoga, go tangada hagaloosi abodonu o denga ssiibi.

³ Tangada hagaloosi o de haitoga e hhuge ange de abaaba gi de ia, gai denga ssiibi e hagallongo dono leo. Gai Ia e hagahi ange ana ssiibi i olaadeu ingoo donu, ga dagi gilaadeu gi duaahaho.

⁴ Gai de masavaa naa huu e odi ai ana ssiibi i de hagassao gi duaahaho, gai ia ga hano i olaadeu mada i mua, gai gilaadeu e daudali ange i de ia, go hiidinga gilaadeu e madea dono leo.

⁵ Aagai gilaadeu e dee daudali ange donu i dahi dangada gee, gilaadeu e saavini ga hulo gee mai i de ia, go hiidinga gilaadeu e dee madea de leo o dahi dangada gee.”

⁶ Iesu ne tala ange de mee hagasengasenga nei gi gilaadeu, aagai gilaadeu tee tonu ange gi mee aana ne tala ange gi gilaadeu.

Iesu tangada hagaloosi ssiibi danuaa

⁷ Deelaa ai, Iesu ne hai ange hogi gi gilaadeu, “Ni muna abodonu, ni muna abodonu aagu e hai adu nei gi goodou, go au de haitoga o denga ssiibi.

⁸ Gilaadeu alodahi ne loomai i ogu mua ni dangada gaiaa ma de daa dangada, gai denga ssiibi tee hagallongo ange gi gilaadeu.

⁹ Go au de haitoga abodonu; be goai e ulu mai i de au, gai ia e hagaola. Ia e ulu mai naa ma de sao ga hano, gai ia e gidee naa de mommee iai helii.

¹⁰ Tangada gaiaa se humai e gaiaa, ma de daa gi maakau aama de oha; au ne humai gi maua ai e gilaadeu de mouli, go de mouli e honu abodonu.

¹¹ Go au donu tangada hagaloosi ssiibi danuaa. Tangada hagaloosi danuaa, e gaavange dono mouli i hiidinga o denga ssiibi.

¹² Tangada hagaloosi hagao e dee go tangada hagaloosi ssiibi abodonu, niiana laa denga ssiibi. Deelaa ai, de masavaa naa huu aana e gidee ai de humai o de wolf, gai ia ga tili denga ssiibi, gai ga savini ga hano. Gai de wolf ga humai ga daa de hagabuulingaa ssiibi ga hagamavaevae saele.

¹³ Tangada laa e savini naa ga hano, go hiidinga ia se dangada hagaloosi hagao, ia e dee anga ange donu gi denga ssiibi.

¹⁴ Go au donu tangada hagaloosi ssiibi danuaa; au e iloo agu ssiibi, gai agu ssiibi e iloo donu au,

¹⁵ bei de hai a Tamana e iloo ai laa au, gai au e iloo Tamana. Gai au e gaavange dogu mouli i hiidinga o denga ssiibi.

¹⁶ E hanu ange donu agu ssiibi, e dee nnoho i lo te buibui nei. Aagai au e gaamai naa donu hogi gilaadeu. Gilaadeu e hagallongo naa hogi dogu leo, gai gi dahi ai donu huu hagabuulingaa ssiibi, gai e dahi dangada hagaloosi.

¹⁷ Dogu Damana e aloha i de au, go hiidinga au e gaavange dogu mouli, gai au e ahe ange naa ga hagaahe mai.

¹⁸ E dee se dangada gee donu ne gaavee dogu mouli, aagai go au donu ne dugua ange dogu mouli. Gai e dahi donu ogu ssauaa e gaavange ai dogu mouli, aama de hagaahe mai ange ai. Aanei muna a dogu Damana ne tala mai gi de au.”

¹⁹ Gai de gau Ssuu gu dee buni ange hogi i hiidinga o muna nei.

²⁰ Gai e soa gilaadeu ne hagataba, “Dahi hagasaalunga baubau e noho i ono daha, gai ia gu senga. Gai gu aha gu hagallongo ai gidaadeu ana muna?”

²¹ Gai hanu ne hagataba, “Muna nei e dee bei muna a tangada e noho de hagasaalunga baubau i ono daha. Gai e maua naa e tangada e noho de hagasaalunga baubau i ono daha i de hai gi gide dahi dangada dee gide?”

De hagangadi mee a de gau Ssuu Iesu

²² De masavaa laa gai gu hai Taonga o de Hagadabu o de temple i Jerusalem. Gai go de masavaa hagamagalili.

²³ Gai Iesu ne hano ga seesee i de temple, i honga de velanda o Solomon.

²⁴ Gai de gau Ssuu ga hagabuni mai gi ono daha ga ssili ange gi de ia, “Dee hee maa taulooloa dau dee tala mai gi iloo e gimaadeu? Noo go koe de Klisdo, gai koe daalaa mai.”

²⁵ Iesu ne hai ange, “Au gu lava i de tala adu gi goodou, aagai goodou e dee hagadonu. Denga hegau aagu e hai i de ingoo o dogu Damana, go gilaadeu e daalaa hagadonu ogu dagodo,

²⁶ gai goodou e dee hagadonu, go hiidinga goodou e dee ni ssiibi niiagu.

²⁷ Agu ssiibi e langona dogu leo; au e iloo gilaadeu, gai gilaadeu e daudali mai i de au.

²⁸ Au e gaavange gi gilaadeu de mouli e dee ngado mai, gai gilaadeu e dee haihai naa donu ga maakau; gai e deai donu se dangada e maua i de aau gee gilaadeu mai i lo togu lima.

²⁹ Dogu Damana, de ia ne gaamai gilaadeu gi de au, e maolunga ange i mee alodahi, gai e deai donu e maua i de aau gee gilaadeu mai i lo te lima o Tamana.

³⁰ Gimaau ma dogu Damana e dahi donu huu.”

³¹ Gai de gau Ssuu ne poo age hogi denga hadu e maga ai ia,

³² aagai Iesu ga hai ange gi gilaadeu, “Au gu hagaago adu gi goodou hegau danuaa lagolago mai i daho dogu Damana. Gai dee hee de hegau i mee nei, oodou ga maga ai naa au i hadu?”

³³ Gai de gau Ssuu ga hai ange, “Gimaadeu e dee maga goe i hadu, i hiidinga o dahi hegau danuaa nei, gai go hiidinga koe gu hagangadi mee de Maadua i au muna. Koe se dangada bei omaadeu dagodo, gai koe e hagahedae ange goe gi de Maadua.”

³⁴ Iesu ne hai ange gi gilaadeu, “E aha, tigi sisi i oodou hainga, e hai ange, ‘Au e hagadaba bolo goodou ni maadua donu’?

³⁵ Gidaadeu e iloo bolo muna a de Beebaa Dabu e dee maua donu i de oha ga hano ai; gai de Maadua tee hagabinga gilaadeu ne gaavange aagena ana muna bolo ni maadua?

³⁶ Gai gu aha goodou gu hai ange ai naa gi de ia a Tamana ne hagadabu ga hai gi humai gi henua i lalo, ‘Koe e hagangadi mee de Maadua i au muna’, i hiidinga au e hagadaba, ‘Go au Tama Daane a de Maadua’?

³⁷ Noo au e dee hai hegau a dogu Damana, gai goodou e dee hagadonu donu au;

³⁸ gai noo au e hai hegau a dogu Damana, gai e dee galemu naa donu doodou dee hagadonu au, gai goodou hagadonusia agu hegau, gi iloo ai e goodou, aama de tonu ange bolo Tamana e noho i ogu daha, gai au e seesee i lodo o Tamana.”

³⁹ Gai gilaadeu ne hagatale ange hogi de poo ia, gai ia ga hagaui i olaadeu lima, ga hano gee i kilaa.

⁴⁰ Gai Iesu ne ahe ga hano gi de baasi laa o Jordan, i de mommee a John nogo babudaisi ai laa i laangi i mua.

⁴¹ Gai dangada soa ne loomai gi ono daha, ga hai ange, “John teai donu ana hagailonga ne hai, gai mee alodahi aana gu tala, i dagodo o Taane nei ni muna abodonu.”

⁴² Gai ne soa dangada ne hagadonusia ia i kilaa.