John 1 - De Beebaa Dabu

De Muna gu hai ma gu se angaanga

¹ De Muna gu dahi donu i taamada, gai de Muna gu noho huu madali de Maadua, gai de Muna go de Maadua donu.

² Ia gu noho donu madali de Maadua i taamada age.

³ Mee alodahi go ia ne haia; gai teai donu se mee daudahi e dee go ia ne haia.

⁴ Go ono daha iai de mouli, gai de mouli laa go de maalama o dangada.

⁵ De maalama nei e hagamaalama lo te gohu, gai de gohu e dee maua donu i de hai gi lilo.

⁶ De Maadua ne hai gi humai dahi daane, dono ingoo go John.

⁷ Ia ne humai e hai ai tangada tala hagadonu, gai ia ga tala hagadonu ai dagodo o de maalama laa, gi hagadonusia ai e dangada alodahi i hiidinga o ana muna.

⁸ E dee go John de maalama laa; gai ia ne humai e tala hagadonu dagodo o de maalama laa.

⁹ De maalama abodonu e hagamaalama ina laa dangada alodahi ne humai gi henua i lalo.

¹⁰ Ia ne humai gi henua i lalo, gai go ia donu ne hai henua i lalo alodahi; gai henua i lalo tee iloo e gilaadeu ia.

¹¹ Ia ne humai gi daho ono dangada donu, gai gilaadeu tee kave ia.

¹² Aagai gilaadeu alodahi e gaavee ma de hagadonusia ia, gai ia e gaavange naa gi gilaadeu ssauaa e hai ai gi ni dama nii de Maadua,

¹³ gai gilaadeu e dee ni dama ne hagadili i de baasi gi de angaanga, be go lodo o de angaanga, aabe go de hagatau a dahi daane, gai go lodo o de Maadua.

¹⁴ De Muna ne hai gi se dangada ga noho i odaadeu magavaa, gai gidaadeu gu gidee dono mahamaha, go de mahamaha o Tama Dagidahi mai i daho Tamana, e honu laa i de abodonu ma de muna abodonu.

¹⁵ John ne tala hagadonu ono dagodo ga hagadaba, “Deenei de ia aagu ne tala laa bolo ia e humai i ogu dua, gai e maolunga ange i de au, go hiidinga ia gu dahi huu i mua dogu haanau.”

¹⁶ Gai gidaadeu alodahi gu kave de manuuia mai i dono abodonu laumalie e aheahe ange laa ma e gaamai gi gidaadeu.

¹⁷ Gai hainga ne gaavange gi Moses gi gaamai; gai de abodonu ma de muna abodonu ne gaamai i daho Iesu Klisdo.

¹⁸ Tigi ai donu se dangada ne gidee de Maadua; go de Maadua e dahi laa donu huu, go de ia e noho i gaogao o Tamana, ia gu hagaagona mai Tamana gi gidaadeu.

De tala hagadonu a John ono dagodo

¹⁹ Gai aanei muna a John ne tala hagadonu, i de masavaa a de gau Ssuu ne hai ai gi loomai gi ono daha, hanu dangada haimeedabu ma dangada de aamuli o Levi i Jerusalem gi siilia ange gi de ia, “Go koe goai?”

²⁰ Gai ia tee hagammuni donu, gai ne tala ange gi iloo e gilaadeu, ga hai ange, “E dee go au de Klisdo!”

²¹ Gilaadeu ne ssili ange hogi gi de ia, “Gai go koe donu goai? Go koe go Elijah?” Gai ia ga hai ange, “E deai!” “Gai go koe de pelaabisi laa?” Ia ne hai ange, “E deai.”

²² Gilaadeu ga ssili ange hogi gi de ia, “Gai go koe donu goai? Daalaa mai gi iloo e gimaadeu, gi maua ai e gimaadeu i de tala ange gi dangada ne haia gimaadeu gi loomai. Dee hee dau hai e tala ai oo dagodo?”

²³ Gai ia ne hai ange, “Au go de leo o dahi e oo laa i de vao ma e hagadaba, ‘Hagasoea de haiava o Tagi Maolunga,’ bei de hai a de pelaabisi go Isaiah gu tala ai laa.”

²⁴ Gai dangada a denga Pharisee ne hai laa gi loomai

²⁵ ne ssili ange gi de ia, “Noo e dee go koe de Klisdo, be go Elijah, aabe go de pelaabisi laa, gai gu aha goe gu babudaisi ai naa dangada?”

²⁶ John ne basa ange, ga hai ange, “Au e babudaisi i vai, gai e dahi dangada e duu i oodou magavaa gai goodou tigi iloo.

²⁷ Ia e humai i ogu dua, gai au e dee bau ange i de tala mee e noonoa ai ono mee vae.”

²⁸ Mee nei alodahi ne hai i Bethany i de baasi dua o Jordan, go de mommee a John e babudaisi ai dangada.

Iesu Ssiibi Gauligi a de Maadua

²⁹ De laangi i ono dua, gai a John ne gidee e ia Iesu e humai gi ono daha, gai ia ne hagadaba, “Tilo, Ssiibi Gauligi a de Maadua, go de ia e gaavee gee haisala o henua i lalo!

³⁰ Deenei taane aagu gu tala laa ma e hagadaba, ‘Taane e humai i ogu dua e maolunga ange i de au, go hiidinga ia gu nnoho donu i mua.’

³¹ Au donu tee madea ia; aagai aanei donu hiidinga oogu ne humai ai nei e babudaisi i vai, gi maua i de hagaago ange ia gi de gau Israel.”

³² John ne tala hagadonu ga hagadaba, “Au ne gidee de Hagasaalunga ⌊Dabu⌋ e hano iho i de langi gi ono elunga, bei dagodo o de manu kono.

³³ Gai au tee madea ia i de masavaa laa, gai de Maadua ne haia nei au gi humai gi babudaisi ina dangada i vai ne hai mai gi de au, ‘Tangada aau e gidee de hano iho o de Hagasaalunga ga noho i ono elunga, deenei de ia e babudaisi ina dangada i de Hagasaalunga Dabu.’

³⁴ Gai au ne gidee de hai mee nei, ma de tala hagadonu bolo go ia donu Tama Daane a de Maadua.”

De hagahi a Iesu hanu ana dangada agoago

³⁵ De laangi i ono dua, gai a John e duu hogi madali e dogolua ana dangada agoago;

³⁶ gai ia ne gidee Iesu e seesee mai laa kilaa, gai ia ne hai ange gi gilaau, “Tilo, Ssiibi Gauligi a de Maadua!”

³⁷ Gai luaana dangada agoago ne langona e gilaau ana muna, gai gilaau ga daudali ange i Iesu.

³⁸ Gai Iesu ga huli dua gu gidee e ia gilaau e daudali ange i de ia, gai ia ga ssili ange, “Se aha ooluu e ssala?” Gilaau ne hai ange gi de ia, “Rabbi (e bei Tangada Agoago), go hee oou e noho ai naa?”

³⁹ Iesu ne hai ange gi gilaau, “Gooluu loomai diiloo.” Gai gilaau ne hulo ga gidee de mommee oona e noho ai, gai gilaau ne nnoho i ono daha i de laangi laa, go hiidinga gu daa de haa i muli de hualaangi.

⁴⁰ Gai dahi luu daane ne langona laa muna a John ga daudali ange i Iesu go Andrew, taina daane o Simon Peter.

⁴¹ Ia ne hano i mua ga ssala dono daina daane go Simon, ga hai ange gi de ia, “Gimaau gu gidee de Messiah” (e bei, go de Klisdo).

⁴² Gai ia ne dagi mai ia gi daho Iesu. Gai Iesu ne galo ange ga tilo Peter, ga hai ange, “Doo ingoo go Simon tama daane a John? Koe e hagaingoo ange naa go Cephas” (e bei go Peter).

De hagahi a Iesu a Philip ma Nathanael

⁴³ De laangi i ono dua, gai Iesu ne lodo e hano gi Galilee, gai ia gu hedae ange gi Philip, gai ia ga hai ange gi de ia, “Daudali mai i de au.”

⁴⁴ (Philip se daane Bethsaida, go de aduhale hogi o Andrew ma Peter ne loomai ai.)

⁴⁵ Philip ne gidee hogi e ia Nathanael, ga hai ange, “Gimaadeu gu gidee de ia a Moses e basa ai laa i lodo hainga, gai denga pelaabisi ne sisi hogi ono dagodo — Iesu tangada Nazareth, tama a Joseph.”

⁴⁶ Aagai Nathanael ga ssili ange gi de ia, “E maua gi sula age dahi mee danuaa daudahi i Nazareth?” Philip ne hai ange gi de ia, “Humai diiloo.”

⁴⁷ Gai ga gidee huu e Iesu Nathanael i dono masavaa ne dae mai ai, gai ia ga tala ono dagodo ga hagadaba, “Taane nei se daane Israel abodonu, gai e deai donu se muna hhadu i ono daha!”

⁴⁸ Nathanael ne ssili ange gi de ia, “Dee hee donu dau hai ne iloo ai au?” Iesu ne hai ange, “I mua de hagahi a Philip goe, gai au ne gidee goe, i doo masavaa nogo noho ai i lalo de fig.”

⁴⁹ Gai Nathanael ga hai ange gi de ia, “Tangada Agoago, go koe donu Tama Daane a de Maadua! Gai go koe de hodooligi o Israel!”

⁵⁰ Iesu ne hai ange gi de ia, “Koe gu hagadonusia i hiidinga au ne tala adu bolo au ne gidee goe i doo noho i lalo de manu somo go de fig? Gai koe e gidee naa mee e kii ange de hagalele mouli i mee nei.”

⁵¹ Iesu ne hai ange hogi, “Ni muna abodonu, ni muna abodonu aagu e hai adu nei gi goodou, goodou e gidee naa de langi e hhuge, gai dangada de langi o de Maadua e loage aama de loiho gi honga o Tama a Tangada.”