Joel 1 - De Beebaa Dabu

¹ Tagi Maolunga ne hagailoo ange ana muna gi Joel, tama daane a Pethuel.

De oha a denga itebuubuu honga de henua

² Denga daane maatua, goodou hagalaangona muna nei, alodahi e nnoho i honga de henua, hagalaangona. Gu hanu laa hegau bee nei ne hai i doodou masavaa, aabe go de masavaa o odaadeu dubuna madagidagi?

³ Daalaa ange mee nei gi oodou dama, gai gilaadeu gi daalaa ange gi alaadeu dama, gai alaadeu dama gi daalaa ange gi de atangada i olaadeu dua.

⁴ Mee ne doe i gai a denga itebuubuu, gai de hagabuulingaa itebuubuu gu gai; mee ne doe mai i de hagabuulingaa itebuubuu gai denga itebuubuu e tolo laa gu gai; mee ne doe mai i denga itebuubuu e tolo laa gai denga itebuubuu ange laa gu gai.

⁵ De gau ssenga, goodou aalahage tangi; alodahi e unumia uvaini, goodou tangi ssee, goodou tangi, i hiidinga gu deai donu uvaini maimai, gai gu gaavee gi dee unumia ai e goodou.

⁶ Dahi huaahenua gu kage mai gi honga dogu henua, gilaadeu e mmahi gai e dee maua i de dau; olaadeu niho e bei niho o dahi laiono, gai e kangi bei niho o de laiono hahine.

⁷ Gilaadeu gu oha agu grapevine, ma de hagabaubau agu fig. Gai gu holehole ma gu deai gili o denga manu, gai laa o denga manu gu tea.

⁸ Goodou tangi bei de bua moe e gahu laa i malo daladala i hiidinga dono hinangalosaa i dono bodu.

⁹ Gu deai donu sigidaumaha o grain ma mee unu i de hale o Tagi Maolunga. De gau haimeedabu gu tangi, aanei gilaadeu ne haia hegau i mada luu mada o Tagi Maolunga.

¹⁰ Denga veelenga gu ngadi daakodo, gai de gelegele gu hagahinangalosaa ono dagodo; denga grain gu lava i de oha, gu deai donu hogi uvaini hoou ma lolo.

¹¹ De gau hai veelenga, go goodou gi dookaa, de gau e dooa denga grapevine, goodou tangi see; goodou tangi i teai wheat ma barley; go hiidinga teai huamanu e hagihagi.

¹² De grapevine gu magau, de fig gu mmae; de pomegranate, ma de palm aama de apple hogi, denga manu ssomo alodahi gu odi i de maakau. Gai gu deai donu se malangilangi i daho dangada.

De hagahi ange dangada gi tangi

¹³ De gau haimeedabu, goodou kahu i malo daladala, ma de tangi, de gau hai hegau i de mommee o ssigidaumaha, goodou tangi ssee. De gau e haia hegau i mada luu mada o dogu Maadua, goodou loomai, kahu i malo daladala i dahi boo; go hiidinga gu deai donu sigidaumaha o grain ma sigidaumaha o mee unu, e gaamai gi de hale o doodou Maadua!

¹⁴ Hagailoo ina de hagahiikai dabu; hagailoo ina de hagabuni dabu. Hagabuni ina denga dagi ma dangada alodahi e nnoho i de henua gi de hale o Tagi Maolunga doodou Maadua, gai dalodalo ange gi Tagi Maolunga.

¹⁵ E vakaa naa gidaadeu i de laangi laa! Go hiidinga de laangi o Tagi Maolunga gu baa mai donu, gai de Ia Mmahi Mmao e oha naa donu de henua.

¹⁶ E aha, gidaadeu tee gidee laa teai gai, ma teai se malangilangi be se lodo danuaa i de hale o taadeu Maadua?

¹⁷ Denga golee i lo te gelegele gu pobo. Denga hale doange gu deai mee iai; denga mommee e hhao ai grain gu maoha, go hiidinga gu deai donu grain e hhao ai.

¹⁸ Denga manu haangai gu tangi! Denga kaau gu ngadi hulo saele donu huu, go hiidinga gu deai mommee iai helii; denga ssiibi gu duasala donu hogi.

¹⁹ Tagi Maolunga, au e dangidangi adu gi de goe, go hiidinga de ahi gu dudu ma gu odi denga mommee iai helii i lodo henua, gai de ula o de ahi gu dudu denga manu ssomo alodahi i honga de henua.

²⁰ Gai manu lodo henua gu tangi adu gi de goe; go hiidinga denga saalingaa vai gu deai vai iai, gai de ahi gu dudu denga mommee iai helii.