Jeremiah 51 - De Beebaa Dabu

De hagaduasala o Babylon

¹ E hagadaba Tagi Maolunga: “Tilo, au e hagangalue naa lodo o de ia daa dangada gai ia ga hebagi ange ai gi Babylon, aama dangada e nnoho i Leb Kamai.

² Au e hai naa gi hulo de gau henua gee gi Babylon e nonu ai de henua bei de ili gi deai dangada i dono henua; gilaadeu e hebagi ange gi de henua i luu baasi alodahi i de laangi oona e hai ngadaa ai.

³ Tangada e dilia de mee hholu gi dee daangia dana mee hholu, ia gi dee gahu i dono malo hebagi baalanga. Gai e dee dugu gi ola denga dama daane i kilaa gai daia donu gi maakau dono hagabuulinga hebagi alodahi.

⁴ Gilaadeu e daa naa ga maakau i de henua o de gau Babylon, aama de lagolagohia ga maakau i honga ono haiava.

⁵ Gai de Maadua, go Tagi o denga hagabuulinga hebagi, tigi tili donu Israel ma Judah, e dee galemu donu delaadeu henua gu honu i de haisala i mada luu mada o de Ia Dabu o Israel.

⁶ Saavini hulo gee mai i Babylon! Tangada nei ma tangada nei gi hagaola ina dono mouli! Goodou gi dee maakau i hiidinga ono haisala. Deenei de masavaa a Tagi Maolunga e sui ange ai, aama de hagao ange ai de henua laa gi bei dagodo o ana hegau gu hai.

⁷ Babylon e bei de ubu goolo i lo te lima o Tagi Maolunga, gai gu hagaunu ai gi ssenga henua i lalo alodahi. Denga huaahenua gu unu uvaini iai, deelaa ai, gilaadeu gu odi i de ssenga.

⁸ Gai tee mmule donu gai Babylon gu oha ga maoha; oo mage dangi i ono hiidinga! Gai gaavee hanu valaai e hai ai ono mee mmae; kana adu e maua naa huu gi ieiangi ia.

⁹ Gimaadeu ne hagatale de hai gi ieiangi Babylon, aagai ia tee maua gi ieiangi. Gidaadeu ga tili ia, gai dahi ma dahi gi hano gi dono henua; go hiidinga dono hagaduasala gu dae age loo gi lo te langi gai gu maolunga donu bei denga giliiga.

¹⁰ ⌊Dangada e hagataba,⌋ ‘Tagi Maolunga gu tala odaadeu heohi; loomai, gidaadeu ga tala i Zion dagodo hegau a Tagi Maolunga, taadeu Maadua gu hai.’

¹¹ Hakaa ina denga dao! Gai hagauda ina denga mee hungihungi! Tagi Maolunga gu hagangaalue lodo o denga hodooligi o de gau Media, go hiidinga ia gu baba ange e oha Babylon. Tagi Maolunga e sui ange naa ana mee ne hai ange gi dono temple.

¹² Hagaduulia age dahi hagailonga i gaogao de buibui o Babylon; haia gi soa dangada e hagaloosia; hagatuu ina denga daane hagaloosi; go hiidinga Tagi Maolunga gu hai dahi hagatau gai gu hagassula donu ana mee gu tala ai dagodo o dangada e nnoho i Babylon.

¹³ Goodou e nnoho i gaogao denga vai lagolago, gai ni dangada lava, gu dae mai doodou laangi e maakau ai, gai oodou mouli e modu naa bei taula.

¹⁴ Tagi o denga hagabuulinga hebagi gu hagatoo donu i dono ingoo: Ni muna abodonu, au e hhao naa de henua i dangada soa bei de lagolago o denga itebuubuu, gai gilaadeu e oo naa i delaadeu kii i de goe.

¹⁵ Go ia ne haia henua i lalo i ono mahi; ma de hagaduu henua i lalo i dono heiangi, aama de hhola de langi i dono iloo mee.

¹⁶ De masavaa oona e basa ai, gai vai i lo te langi gu hagangolo; ia e hai de mama o denga vai gi hanage i luu bido o henua i lalo. Ia e hai gi labalaba de uila i de masavaa e pala ai de langi, ma de hagasao mai de madangi i lodo ono mommee doange goloa.

¹⁷ Dangada alodahi e ssenga ma teai selaadeu iloo mee, de labagau o denga goolo e hagadogaa ina naa i ono diinonga. Ono diinonga e dee ni mee abodonu; gilaadeu e dee maua i de manamanava.

¹⁸ E deai olaadeu haigamaiana, gai ni mee hakadanga; gilaadeu e llilo naa i de masavaa o delaadeu hagaduasala.

¹⁹ Gai e dee deenei tagodo o de ia e hagabinga laa go Tuuhanga o Jacob; gai go ia ne haia mee alodahi, aama Israel de aamuli o dono boolonga — dono ingoo go Iahweh o denga hagabuulinga hebagi.

²⁰ Go koe dagu haamaa ma dagu laagau hebagi — go koe e balea mai au e oha ai denga huaahenua, go koe e balea mai au e oha ai denga nohoanga hodooligi,

²¹ go koe e balea mai au e daa de hoosa ma tangada e gage ai; go koe e balea mai au e oha ai de hada hebagi ma tangada e savini ai;

²² go koe e balea mai au e daa ai taane ma de hine; go koe e balea mai au e daa ai tangada madumadua ma tama daane; go koe e balea mai au e daa ai tama daane ma tamaa hine;

²³ go koe e balea mai au e daa ai tangada hagaloosi ma ana ssiibi; go koe e balea mai au e daa ai tangada hai veelenga ma ana kaau e hagahai hegau; go koe e balea mai au e daa denga goobenaa ma dagi o de hebagi.

²⁴ Au e sui ange naa hegau a Babylon ma dangada alodahi e nnoho i kilaa i oodou mada i mua, i hiidinga hegau baubau alodahi alaadeu ne hai i Zion, go Tagi Maolunga e hagadaba.

²⁵ Tilo, au e hai baasi adu gi de goe, de mounga e oohaa mee, go Tagi Maolunga e hagadaba, go de mounga e oohaa henua i lalo alodahi. Au e hagaabo naa dogu lima e hai baasi adu ai gi de goe, ma de poo goe ga maga iho i de mommee maolunga, ga hai goe gi se mounga gu lava i de dudu.

²⁶ Gai e deai naa donu se hadu e aau gee mai i kilaa e hai ai tuludulu o de logunga gai e deai hogi se hadu e kave e hagaduu ai tagelo, aagai koe e ngadi dagodo naa donu huu ga hano ai, go Tagi Maolunga e hagadaba.

²⁷ Hagaduulia age dahi hagailonga i honga de henua, gai ilihia de hanga manu i denga huaahenua. Hagadaabena ina denga huaahenua e hebagi ange gi de ia; gai hagahia de nohoanga hodooligi o Ararat, ma Minni, aama Ashkenaz. Hilia tagi o denga daane hebagi gi hebagi ange gi de ia, gai gaamai denga hoosa lagolago bei denga itebuubuu.

²⁸ Hagadaabena ina denga huaahenua e hebagi ange gi de ia — go denga hodooligi o Media, ma olaadeu goobenaa ma dagi, ma henua alodahi e nnoho i olaadeu lalo.

²⁹ De henua gu bolebole ma de mmae, go hiidinga de hagatau a Tagi Maolunga e hai baasi ange ai gi Babylon, e hagasula donu; gai ia ga hai ai gi ngadi dagodo de henua go Babylon, gi deai ai dangada e nnoho i kilaa.

³⁰ Denga daane dau i de hebagi o Babylon gu haganoho de hebagi, gilaadeu gu mmuni i lodo olaadeu hale buibui makaga, gai gu deai olaadeu mahi, gilaadeu gu bei dagodo o denga haahine. Denga hale i de aduhale gu dudu i de ahi, gai ono baalanga hagamakaga gu hadihadi.

³¹ Dahi dangada adi muna e savini adu naa i dua o de ia ange laa; dahi dangada e gaavee de longo e savini adu naa i dua o de ia ange laa, e hagailoo ange gi de hodooligi o Babylon bolo dono aduhale alodahi gu hagadee kii ina.

³² Mommee e hulo ai laa lo te vai gu gaavee, gai denga mommee buibui makaga gu dudu i de ahi, gai denga daane hebagi gu maatagu.”

³³ Gai e hagadaba Tagi o denga hagabuulinga hebagi, de Maadua o Israel: “Tamaa hine o Babylon e bei de mommee hili huamanu, i de masavaa oona e dagadagahia ai; dono masavaa e hagihagi ai gu dai dae mai donu.”

³⁴ ⌊Dangada o Jerusalem e hagataba,⌋ “De hodooligi o Babylon go Nebuchadnezzar gu holo gimaadeu, ia gu hai gi ssenga ange gimaadeu, ia gu hai gimaadeu bei de ssaa gu deai mee i ono lodo. Ia gu holo gimaadeu bei dahi manu hagamaatagu, ma de hhao dono dinae i agu gai mammami, ga lava ga luei mai gimaadeu.”

³⁵ Dangada e nnoho i Zion e hagataba, “Hegau baubau gu hai mai gi de au ma ogu dangada gi dau ange gi Babylon.” Dangada o Jerusalem gi hagataba, “Omaadeu dodo gi dau ange gi dangada e nnoho i Babylon.”

³⁶ Deenei ai, e hagadaba Tagi Maolunga, “Tilo, au e bale adu naa goe e sui ange ai hegau baubau aana ne hai adu gi de goe. Au e hai naa gi maamasa ono dai ma de hai gi deai vai i lodo ono saalingaa vai.

³⁷ Gai Babylon e bei naa dahi hagabuudungaa mee maoha, gai se mommee e nnoho ai denga jackal, se mommee hagamaatagu, ma de llele ai mouli o dangada, gai se mommee gu deai dangada e noho ai.

³⁸ Dangada i kilaa e koo naa bei dagodo o denga laiono; gilaadeu e hagangolo naa bei dama a de laiono.

³⁹ Aagai de masavaa olaadeu gu ssae ai gai au e hagadabena naa dahi daonga ange gi gilaadeu, ga hai gilaadeu gu ssenga ma de malangilangi — ga dae ai gi delaadeu sseni ga hano ai gilaadeu gu dee alahage ange, go Tagi Maolunga e hagadaba.

⁴⁰ Au e kave naa gilaadeu gi de mommee e daa ai gilaadeu gi maakau, bei denga ssiibi gauligi ma guudi daane, aama ssiibi daane.

⁴¹ Dee hee de hai ne hagadee kii ai laa Sheshak, gai de henua a henua i lalo e tuhi gu magulu! Babylon gu hai ma gu se mee hagamaatagu i magavaa o denga huaahenua!

⁴² Tai e honu age naa ga haoli Babylon, gai denga beau hadihadi mai naa ga haoli de henua.

⁴³ Ono aduhale e hai naa ga ni mommee e ngadi daakodo, gai gu se henua e deai vai iai, gu se lodo henua, gai gu se henua e deai dangada e nnoho ai, gu deai hogi dangada e hulo saele laa kilaa.

⁴⁴ Gai au e hagaduasala naa a Bel i Babylon, ga hai ia gi lueia mai mee aana gu holo. Gai denga huaahenua gu dee daga e hulo gi ono daha; de buibui o Babylon gu maoha.

⁴⁵ Ogu dangada, goodou ssao hulo gee mai i de henua! Dahi ma dahi gi hagaola ina dono mouli mai i de kona de bole o Tagi Maolunga!

⁴⁶ Goodou gi dee manavasaa oodou lodo aabe gi maatagu i doodou langona denga longo i honga de henua; dahi longo e dae mai naa i de ngadau nei gai e dahi ange naa e dae mai i de ngadau e humai, go longo o de hai ngadaa honga de henua, ma de hagadau hebagi o denga dagi.

⁴⁷ Deenei ai, tilo, e tae mai naa donu laangi aagu e hagaduasala ai denga diinonga o Babylon; dono henua alodahi e hagangadi mee ina naa, gai ono dangada e maakau naa ma e daakodo saele i kilaa.

⁴⁸ De langi ma henua i lalo, ma mee alodahi iai, e daahili naa ga malangilangi i de hai ange mee nei gi Babylon, go hiidinga de gau e oohaa mee e loomai naa i ngaiho ga hebagi ange gi de henua, go Tagi Maolunga e hagadaba.

⁴⁹ Babylon e oha donu i hiidinga o de gau Israel gu maakau laa, aama dangada alodahi o henua i lalo a Babylon ne daa laa ga maakau.

⁵⁰ Goodou dangada ne ola mai i de gadilaasa, hulo gee mai i kinei, goodou gi dee ngadi tuu saele donu huu! Goodou gi manadua Tagi Maolunga i doodou nnoho i dahi henua mmao, goodou gi manadua Jerusalem.”

⁵¹ ⌊Goodou e hagataba,⌋ “Gimaadeu gu hagangadi mee ina, go hiidinga gimaadeu gu langona hanu muna hagadookaa; gimaadeu gu dee hagadubulia, go hiidinga de gau henua gee gu ulu gi lodo mommee dabu i de hale o Tagi Maolunga.”

⁵² Aagai e hagadaba Tagi Maolunga, “Tilo, e tae mai naa laangi aagu e hagaduasala ai diinonga o Babylon, gai honga de henua alodahi iai naa de gau lagolagohia gai gilaadeu e gonogono.

⁵³ Gai ga dae age naa donu Babylon gi de langi, ma de hai ga makaga dono mommee buibui maolunga iai, aagai au e hai naa gi loomai de gau oha gi hebagi ange gi de ia, go Tagi Maolunga e hagadaba.

⁵⁴ Hagalaangona adu! Dangada o Babylon e tangi! Gai e saamumu mai denga mee e maoha i de henua go Babylon!

⁵⁵ Tagi Maolunga e oha Babylon alodahi, ma de hai gi dee langona dono leo e hagalongaa ai. Beau a ono hagadaumee e bei naa de nngolo o vai lagolago; gai olaadeu leo gu kona donu de nngana.

⁵⁶ Dahi dangada oha mee gu humai e hebagi ange gi Babylon; ono daane hebagi gu noonoodia ma gu gaavee, gai alaadeu mee hholu gu hadihadia. Go hiidinga Tagi Maolunga se Maadua e suuia ange de baubau, gai ia e hagaodi ange donu de hagaoanga o ana hegau.

⁵⁷ Gai au e hai naa ono dagi ma ono daane heiangi gi bei dangada gu unu laa ma gu ssenga, ma ono goobenaa, aama dagi o de hebagi, aama ono daane dau i de hebagi; gilaadeu e sseni naa ga hano ai gai e dee aalahage ange naa donu,” go de Hodooligi e hagadaba, dono ingoo go Tagi o denga hagabuulinga hebagi.

⁵⁸ E hagadaba Tagi o denga hagabuulinga hebagi: “De buibui lahalaha o Babylon e oha iho naa ga dagodo i honga de gelegele, gai ono haitoga maolunga e dudu naa i de ahi; hegau kona a dangada e deai naa donu ono haigamaiana, denga huaahenua ne hagadaalea ange donu huu gi mee e dudu i de ahi.”

⁵⁹ Gai aanei muna a Jeremiah ne tala ange gi tagi o de gau hegau go Seraiah tama daane a Neriah, tama daane a Mahseiah, i de masavaa oona ne hano ai gi Babylon madali Zedekiah, de hodooligi o Judah, i de haa ngadau oona ne hodooligi ai.

⁶⁰ Gai Jeremiah ne sisi i lo te beebaa mulo denga hagaduasala alodahi ne hai ange gi Babylon — go mee alodahi ne daohi i dagodo o Babylon.

⁶¹ Gai Jeremiah ga hai ange gi Seraiah, “De masavaa naa huu oou e dae ai gi Babylon, gai koe diiloo daulia ange muna nei alodahi gi langona e dangada.

⁶² Gai koe ga hai ange, ‘Tagi Maolunga, koe gu hagadaba bolo koe e oha de mommee nei, gai e deai naa donu se dangada aabe se manu e nnoho ai; gai e ngadi dagodo naa ga hano ai.’

⁶³ Gai ga lava naa huu i dau dau ange muna o de beebaa mulo naa, gai koe ga nnoa ange gi dahi hadu ga maga ange gi lo te saalingaa vai go Euphrates.

⁶⁴ Gai koe ga hai ange, ‘Babylon e abulu naa gu dee hagaahe age ange donu, i hiidinga o de hai ngadaa aagu gu dai gaamai gi de henua. Gai dangada e nnoho ai e deai olaadeu mahi.’ ” Deenei de hagaodi muna a Jeremiah.