Jeremiah 49 - De Beebaa Dabu

Muna pelaabisi i dagodo o Ammon

¹ E hagadaba Tagi Maolunga i dagodo o de gau Ammon: “E aha, gu deai dama daane a Israel? Gu deai dama e dugu ai delaadeu boolonga? Gai gu aha Milcom gu kave ai de mommee o Gad, gai ono dangada gu nnoho i lodo ono aduhale?

² Gai tilo, e tae mai naa laangi, go Tagi Maolunga e hagadaba, aagu e hai ai gi langona de oo ina mai o de hebagi e hai baasi ange ai gi Rabbah o de gau Ammon! Gai e hai naa ga bei de hagabuudungaa gainga, gai ono aduhale e dudu naa i de ahi. Israel e kave naa de henua o dangada ne gaavee dono henua, go Tagi Maolunga e hagadaba.

³ Heshbon, koe gi dangi, go hiidinga Ai gu maoha! Dangada o Rabbah, goodou hevaalogi tangi, gai kahu i malo daladala ma de hinangalosaa, ma de saavini i magavaa o denga buibui; go hiidinga Milcom e gaavee naa gi dahi henua gee, madali ono dangada haimeedabu aama dagi o dono henua.

⁴ Tamaa hine e dee hai hegau i de mee abodonu, gu aha gu basa hagasoenga ai naa goe i oo geelonga, ma de tali hagalodolodo ange oo goloa hagamogomogo, ga hagadaba, ‘Goai e maua i de hai baasi mai gi de au?’

⁵ Tilo, au e gaamai naa de mee hagamaatagu gi de goe, go de Ia Aamua, Tagi o denga hagabuulinga hebagi e hagadaba, mai i denga mommee alodahi i luoo baasi, gai goodou alodahi e hai naa gi hulo gee, dahi ma dahi e seesee naa donu ga hagasoe gi mua, gai e deai naa donu dangada e bale ange gilaadeu.

⁶ Aagai muli mai naa huu, gai au e hagaahe ange de manuuia o de gau Ammon,” go Tagi Maolunga e hagadaba.

Muna pelaabisi i dagodo o Edom

⁷ E hagadaba Tagi o denga hagabuulinga hebagi i dagodo o Edom: “E aha, gu deai nei donu se heiangi i Teman? Gai gu deai nei donu hagasaele heohi a de gau maanetonu? Gai gu llilo nei donu olaadeu heiangi?

⁸ Dangada e nnoho i Dedan, goodou saavini mmuni i lodo haonga kelo, go hiidinga au e hai naa gi hai ngadaa Esau, i de masavaa aagu e hagaduasala ai ia.

⁹ E aha, noo de gau hagihagi e loomai e hagihagi denga grape i oo daha, gai gilaadeu e dee dugu naa hanu grape? Gai noo de gau gaiaa e loomai i de boo, gilaadeu e dee kave naa donu huu olaadeu mee e llodo ai?

¹⁰ Aagai au gu aau ma gu deai malo o Esau; au gu hai ga gidee mommee e hagammuni laa, gai ia e dee maua donu i de mmuni. Ana dama gu maakau, ono daina ma dangada e paa ange gi de ia gu deai.

¹¹ Dugua au dama e deai olaadeu damana, gai au ga tilo ange gilaadeu; gai au haahine gu maakau olaadeu bodu e maua i de hagadonu au.”

¹² E hagadaba Tagi Maolunga, “Noo dangada e dee heohi delaadeu unu i de ubu o de hagaduasala nei e unu ai, gai goodou e maanadu bolo goodou e dee hagaduasala? Goodou e dee haihai naa donu ga dee hagaduasala, aagai goodou e unu donu i de ubu nei.

¹³ Au e hagatoo donu i dogu ingoo, go Tagi Maolunga e hagadaba, bolo Bozrah e hai naa gi se mommee maoha ma de hagamaatagu, se mee e hakadanga ai dangada gai se muna hagamalaia; ono aduhale alodahi e maoha naa ga ngadi daakodo ga hano ai.”

¹⁴ Au gu langona dahi hagailoo mai i daho Tagi Maolunga: dahi dangada hagailoo gu hai gi hano gi denga huaahenua, gi hai ange, “Goodou hagabuni loomai hebagi ange gi de henua laa! Hiihidi age haia de hebagi!”

¹⁵ “Au e hai naa goe gi damaa mee ange i denga huaahenua, ma de hagangadi mee ina i daho dangada.

¹⁶ Koe gu hagasengalia i hiidinga de maatagu o dangada i de goe, aama doo lodo hagamaolunga, koe e nnoho laa i magavaa o denga hadu maolunga, ma honga mommee maolunga o denga duuduu. Gai e dee galemu donu dau hai doo hoohanga i denga mommee maolunga, gai au e tili iho mai naa goe i kilaa, go Tagi Maolunga e hagadaba.

¹⁷ Edom e hai naa ga se mee hagamaatagu; dangada alodahi e seesee i ono gaogao e llele mouli naa ga hagavogivogi, i hiidinga o de hai ngadaa gu hai ange laa aagena.

¹⁸ Gai e bei hogi de oha o Sodom ma Gomorrah, madali denga aduhale e paa ange, go Tagi Maolunga e hagadaba, gai e deai naa donu se dangada e nnoho gaainga i kilaa; e deai naa hogi dangada e nnoho i kilaa.

¹⁹ Tilo, au e bei de laiono i lodo mee muimui i Jordan e humai laa e hai baasi ange gi de mommee iai helii lau kohu; gai e moolau naa donu dagu doolohi ia ga hai gi hano gee i dono henua. Gai au ga hili tangada oogu e malangilangi ai gi de hegau nei. Goai e bei ogu dagodo? Gai goai e maua i de hai baasi mai gi de au? Gai goai tangada hagaloosi e maua i de hebagi mai gi de au?

²⁰ Deenei ai, goodou hagalaangona de hagatau a Tagi Maolunga e hai baasi ange ai gi Edom, ma ana mee gu hagadabena e hebagi ange ai gi gilaadeu e nnoho i Teman: dama a dana hagabuulingaa ssiibi e gaavee gee naa; ia e oha naa olaadeu mommee iai helii i olaadeu hiidinga.

²¹ Henua i lalo gu bolebole i dana langona delaadeu hagadee kii ina, gai de leo o delaadeu tangi e tae loo gi Tai Mmea.

²² Tilo, dahi igele gemo e lele mai naa ga hagatili iho, ga doha luoono bakau ga hai baasi ange ai gi Bozrah. Gai lodo o denga daane hebagi mmahi o Edom e bei naa lodo o de hine gu hai ono hagalangona.”

Muna pelaabisi i dagodo o Damascus

²³ Dagodo o Damascus. “Hamath ma Arpad gu hagadookaa ina, go hiidinga gilaau gu langona hanu longo baubau; gilaau gu maatagu olaau lodo, gilaau gu dee paba olaau lodo bei dagodo o tai e dee maua laa gi malino.

²⁴ Damascus gu deai ono mahi, gai gu huli ma gu savini; ia gu kona de manavasaa ma de mmae, bei de mmae o de hine gu hai ono hagalangona.

²⁵ Gai gu aha tee dilia ai laa de aduhale a dangada e tuhi laa, gai go de aduhale oogu e malangilangi ai?

²⁶ Deelaa ai, ono dama daane mmahi e maakau naa i honga ono haiava, ono daane hebagi alodahi e hagallilo naa i de laangi laa, go Tagi o denga hagabuulinga hebagi e hagadaba.

²⁷ Gai au e dudu naa denga buibui o Damascus, gai de ahi e oha naa denga hale danuaa o Ben-Hadad.”

Muna pelaabisi i dagodo o Kedar ma Hazor

²⁸ Dagodo o Kedar ma de nohoanga hodooligi o Hazor, a Nebuchadnezzar de hodooligi o Babylon ne hebagi ange laa aagena. E hagadaba Tagi Maolunga: “Hiihidi age, hebagi ange gi Kedar, gai daia gi maakau dangada i de baasi dua!

²⁹ Olaadeu hale malo ma alaadeu ssiibi e gaavee gee naa, olaadeu malo buibui ma olaadeu goloa alodahi ma alaadeu gamelo e gaavee gee naa. Gai dangada e oo naa, ga hai ange, ‘Denga mee hagamaatagu gu hai i mommee alodahi!’

³⁰ Dangada e nnoho i Hazor, goodou hagamoolau hulo gee! Goodou hulo nnoho i lodo haonga, go Tagi Maolunga e hagadaba. De hodooligi o Babylon go Nebuchadnezzar gu hai dahi hagatau e hai baasi adu ai gi goodou; ia gu hagadabena e hebagi adu ai gi goodou.

³¹ Hiihidi age hulo hebagi ange gi de huaahenua e nnoho paba laa ma de duadonu, go Tagi Maolunga e hagadaba, se huaahenua e deai ono abaaba aabe ni laagau hagamakaga; e deai hogi dangada e paa ange gilaadeu.

³² Alaadeu gamelo e hai naa ga ni goloa e maua i de hebagi, alaadeu manu haangai lagolago e duha naa. Au e hai naa gilaadeu e dahi baasi o olaadeu biho gi mavaevae saele gi denga mommee mmao, ma de hai gi hai ngadaa gilaadeu i mommee alodahi, go Tagi Maolunga e hagadaba.

³³ Hazor e hai naa ga se mommee e nnoho ai denga jackal, gai gi se mommee e maoha ga hano ai. Gai e deai naa donu dangada e nnoho i kilaa, e deai naa hogi e noho gaainga i de mommee laa.”

Muna pelaabisi i dagodo o Elam

³⁴ Gai aanei muna a Tagi Maolunga ne hagaago ange gi de pelaabisi go Jeremiah, dagodo o Elam, i taamada de dagi o Zedekiah, de hodooligi o Judah, ga hai ange,

³⁵ “E hagadaba Tagi o denga hagabuulinga hebagi: Tilo, au e hhadi naa de mee hholu a Elam, go de goloa hebagi olaadeu e mmahi ai.

³⁶ Au e gaamai naa denga madangi e haa i dege e haa o de langi gi hai baasi ange gi Elam. Au e hai naa gilaadeu gi mavaevae saele i denga madangi e haa, gai e deai naa donu se huaahenua o dangada o Elam e dee mavaevae saele aagena.

³⁷ Au e hai naa gi maatagu dangada o Elam i olaadeu hagadaumee, aama dangada e nnoho e daia gilaadeu gi maakau. Au e hai naa gi humai de hai ngadaa gi gilaadeu i dogu lili, go Tagi Maolunga e hagadaba. Au e doolohi naa gilaadeu ma de gadilaasa, ga dae ai gi dagu daa gilaadeu gi odi.

³⁸ Au e hagaduu naa dogu nohoanga i Elam, gai ga daa gi maakau dono hodooligi ma ono dagi, go Tagi Maolunga e hagadaba.

³⁹ Aagai muli mai naa huu, gai au e hagaahe ange naa de manuuia o Elam,” go Tagi Maolunga e hagadaba.