Jeremiah 47 - De Beebaa Dabu

Muna pelaabisi i dagodo o Philistia

¹ Gai aanei muna a Tagi Maolunga ne hagaago ange gi de pelaabisi go Jeremiah, i dagodo o de gau Philistia, i mua de hebagi ange o de gau Pharaoh gi Gaza.

² E hagadaba Tagi Maolunga: “Tilo, denga vai e hagahonu age naa i ngaiho, ga loomai bei de mee mmilo mmahi. Gai e haoli naa honga de henua ma mee alodahi iai, go denga aduhale ma dangada e nnoho ai. Dangada e oo naa ga tangi, gai dangada alodahi e nnoho i de henua e tangi see naa,

³ i de hogihogi mai vae o denga hoosa e saavini mai ai, ma de nngolo mai o olaadeu hada hebagi ma de hagalongaa mai o olaadeu hagasii. Denga damana e dee huuhuli mai donu e bale ange alaadeu dama, i hiidinga gu deai olaadeu mahi.

⁴ Gai gu dae mai donu de laangi e daa ai gi maakau dangada alodahi o Philistia, ma de daa dangada alodahi e ola, go gilaadeu ne balea ange Tyre ma Sidon. Tagi Maolunga gu dai hagallilo naa de gau Philistia, go dangada e doe i gilaadeu mai i Caphtor.

⁵ Gaza e dahi naa dono biho ga malali, gai Ashkelon e ngadi dagodo naa. Goodou dangada e doe i de mommee iai de geelonga, dee hee maa taulooloa doodou duuduu oodou angaanga?

⁶ ⌊Goodou e hagataba,⌋ ‘De gadilaasa a Tagi Maolunga, dee hee maa taulooloa doo dee hagamabu? Ahe ange gi lo too hale, gai noho ma gi dee ngalue.’

⁷ Aagai dee hee dono hai e hagamabu ai, i de masavaa a Tagi Maolunga gu tala ai de mee nei, ma dana masavaa gu hagamodu ai de mee nei e hai baasi ange ai gi Ashkelon ma mommee i tagudai?”