Jeremiah 18 - De Beebaa Dabu

De hale o tangada hai gumedi hadu

¹ Gai Tagi Maolunga ne hagaago ange ana muna gi Jeremiah, ga hai ange,

² “Hannoo gi de hale o tangada hai gumedi hadu, gai au ga tala adu ai agu muna gi de goe i kilaa.”

³ Gai au ga hano iho gi de hale o tangada hai gumedi hadu, gai au gu gidee ia e noho ma e hai ana hegau i honga dana hagasii hai gumedi.

⁴ Aagai de gumedi aana e hai laa i bela pigi ne maoha i de masavaa aana e poo ai i luoono lima, gai ia ga ahe ange ga hai ai dahi gumedi gee, ga hagahua bei dono hai e lodo ai.

⁵ Gai Tagi Maolunga ga hagaago mai ange ana muna, ga hai mai,

⁶ “E hagadaba Tagi Maolunga: De gau Israel, au e maua donu i de hai adu gi goodou hegau a tangada hai gumedi e hai. De gau Israel, tilo, goodou ni bela pigi i lodo luoogu lima, bei denga bela pigi i lodo luu lima o tangada hai gumedi hadu.

⁷ De masavaa naa huu aagu e hagadaba ai bolo au ga unusi age aabe oha dahi huaahenua aabe se nohoanga hodooligi,

⁸ gai noo de huaahenua aagu e hagakana ange laa e daahuli gee i olaadeu baubau, gai au ga sui dagu hagatau; au e dee hai gi humai de hai ngadaa aagu gu baba ange laa e hai.

⁹ Gai noo au e hagailoo i dahi masavaa dagodo o dahi huaahenua aabe se nohoanga hodooligi, bolo au e hagaduu ma de hai gi makaga,

¹⁰ gai noo de huaahenua laa e hai de baubau i mada luoogu mada, ma tee hagallongo mai, gai au e sui naa ogu lodo ga dee hai tanuaa aagu gu baba ange laa e hai.

¹¹ Deenei ai, hai ange gi dangada o Judah ma dangada e nnoho i Jerusalem, ‘E hagadaba Tagi Maolunga: Tilo, au gu hagadabena dahi hai ngadaa e gaamai gi goodou, ma de hai dahi hagatau e hai baasi adu ai gi goodou. Gai dahi ma dahi gi hano gee mai i ana hegau baubau, ma gi suuia oodou mouli ma oodou hegau.’

¹² Aagai gilaadeu e hai adu naa, ‘E deai haigamaiana. Gimaadeu e duudagi naa donu huu de hai amaadeu hagatau; dahi ma dahi e daudali naa donu huu i de makaga o ono llodo baubau laa.’

¹³ Deenei ai, e hagadaba Tagi Maolunga: Siilia ange gi dangada i denga huaahenua: be gu hanu laa dangada ne langona de hai dahi hegau bee nei? De bua moe go Israel gu hai dahi hegau baubau mmao.

¹⁴ E aha, e maua gi deai snow i honga hadu i ulu o Lebanon? E aha, e maua i de pono gi dee ssali mai denga vai maluulu i de mommee mmao?

¹⁵ Aagai ogu dangada gu ngalo au, gilaadeu e dudu mee maanongi ange gi denga ngadi diinonga, gai denga diinonga gu hai gilaadeu gi dee maua i de seesee i de haiava madagidagi. Denga diinonga laa gu hai gilaadeu gi hulo i denga dao haiava gee, aama honga haiava tigi bae.

¹⁶ Gai delaadeu henua e hai naa ga se mee hagamaatagu, gai se mommee e hagavogivogi ai dangada i de lele olaadeu mouli ga hano ai; gai dangada alodahi e seesee laa kilaa e geugeu naa olaadeu biho i delaadeu llele olaadeu mouli i ono dagodo.

¹⁷ Au e hai naa gilaadeu gi mavaevae saele i mada i mua olaadeu hagadaumee, bei hegau a de madangi mmahi mai i dua. Au e huli ange naa dogu dua gi gilaadeu, e dee go luoogu mada, i de laangi olaadeu e hai ngadaa ai.”

¹⁸ Gai gilaadeu ne hagataba, “Loomai, gidaadeu ga hai dahi hagatau e hai baasi ange ai gi Jeremiah, go hiidinga de hainga e dee llilo naa donu mai i daho de gau haimeedabu, be go muna bale a taane heiangi, aabe go muna mai i daho denga pelaabisi. Loomai, gidaadeu ga daa Jeremiah i adaadeu muna, gai gidaadeu e dee anga ange donu gi ana muna.”

¹⁹ Tagi Maolunga, hagalaangona agu muna; hagalaangona muna a ogu hagadaumee e tala!

²⁰ E aha, e heohi de sui ange tanuaa i de baubau? Aagai gilaadeu gu geli dahi geelinga moogu. Koe gi manadua dogu duu i mada luoo mada ga dangidangi ai i olaadeu hiidinga gi dee humai ai doo lili i gilaadeu.

²¹ Deenei ai, haia gi humai de onge gi alaadeu dama; haia gi daia gilaadeu gi maakau i de gadilaasa. Haia alaadeu haahine gi deai alaadeu dama ma de maakau olaadeu bodu; alaadeu daane gi maakau i de mee hagamaakau, gai alaadeu dama daane gi maakau i de gadilaasa i de hebagi.

²² Haia gi langona delaadeu oo ga tangi i lodo olaadeu hale, i de moolau de tae mai o de gau hebagi ga hebagi ange gi gilaadeu, go hiidinga gilaadeu gu geli dahi geelinga moogu, ma de dugu ssele e dada ai luoogu vae.

²³ Aagai koe e iloo, e Tagi Maolunga, alaadeu hagatau e daa ai au gi magau. Koe gi dee degi ange gi alaadeu hegau baubau, aabe gi sooloa olaadeu haisala i mada luoo mada. Gai koe hagadee kii ina gilaadeu i oo mada i mua, ma de haele gilaadeu i doo lili.