James 5 - De Beebaa Dabu

De hagakana ange gi de gau lava

¹ De gau lava, goodou nnoho mai hagalaangona. Goodou tangi ma de tangi see i hiidinga o denga hagaduasala gu dai tuu adu gi goodou.

² Oodou goloa lagolago gu pobo, gai oodou malo gu gaina i de goa.

³ Oodou goolo ma selevaa gu hongagelegele baalanga, gai de hongagelegele baalanga ina o mee nei e hagabaubau donu goodou, ma de oha oodou angaanga bei de ahi. Goodou gu hagabudu donu oodou goloa e hagadabena ange gi denga laangi hagaodi.

⁴ Tilo, hagaoanga o de gau hai hegau ne hagihagia hua o oodou veelenga e tangi, go hiidinga goodou tee hagao ange gilaadeu. Gai Tagi o denga hagabuulinga hebagi gu langona de tangi o de gau hagihagi.

⁵ Goodou ne duadonu ma de hagamalangilangi donu huu goodou i doodou nnoho i henua i lalo. Goodou gu hai gi pedi goodou bei dagodo o manu gu paba ange e daa gi maakau i de laangi laa.

⁶ Goodou ne hagabaubau ma de daa ga magau tangada tigi haisala, gai ia tee hai baasi adu donu gi goodou.

De golomagi lodo ma de lodo mmahi

⁷ Deenei ai, denga daina, golomagi ina oodou lodo ga dae ai gi de humai o Tagi Maolunga. Goodou kalo ange diiloo de hai a tangada hai veelenga i dana tali de hua manu i honga dono gelegele, ia e golomagi ono lodo ga tali ai de pala de langi i de hagaodi ma taamada o de ngadau.

⁸ Goodou golomagina hogi oodou lodo ga tuu gi makaga, go hiidinga Tagi Maolunga gu dai humai donu.

⁹ Denga daina, goodou gi dee nnanu i dahi dangada gee, gi dee hagamodu ai oodou muna. Tilo, tangada hagamodu muna gu duu donu i ma te haitoga.

¹⁰ Denga daina, goodou manadua dagodo de golomagi lodo o denga pelaabisi i de masavaa olaadeu ne hagaduasala ai, aanei gilaadeu ne agoago i de ingoo o Tagi Maolunga.

¹¹ Tilo, gidaadeu e hagataba bolo gilaadeu ne manuuia i delaadeu llodo mmahi. Goodou gu langona hogi dagodo de lodo mmahi o Job, gai goodou ne gidee hogi dagodo de hagatau a Tagi Maolunga; ia e lodo aloha ma de degi.

¹² Denga daina, deenei hugadoo de mee hagamogomogo, goodou gi dee haia hanu hagatoo donu soe — i de langi aabe go henua i lalo, aabe go dahi mee ange. Gai goodou hai ange donu huu “Uaa” aabe “Deai,” gi dee tuu ange ai goodou gi de hagaduasala.

Talodalo o de gai

¹³ Noo dahi goodou gu hai ngadaa, gai ia gi dalodalo. Noo dahi goodou e malangilangi, gai ia gi daahili gi duuhia.

¹⁴ Noo dahi goodou e magi, gai ia gi alumia denga dagi o de nohoanga dabu, gi loomai gi dalodalo i de ia aama de hagasulu ia i lolo i de ingoo o Tagi Maolunga.

¹⁵ Gai talodalo e hai i de gai e hagaieiangi donu tangada magi; gai Tagi Maolunga e hagaieiangi donu ia. Gai noo ia gu haisala, aagai ono haisala gu maatala.

¹⁶ Deenei ai, goodou hagadau daalaa oodou haisala, ma de hagadau dalodalo gi ieiangi ai goodou. Talodalo a tangada heohi e sauaa mmao ma de haigamaiana.

¹⁷ Elijah se dangada bei odaadeu dagodo, gai ia ne hagaduu ngae ga dalodalo gi dee pala de langi, gai tee pala donu de langi i honga de henua, i e dolu ngadau ma e ono malama.

¹⁸ Gai ia ne dalodalo ange hogi gai gu ahe ange ga pala de langi, gai gu ssomo age denga manu i honga de henua ga hhua.

¹⁹ Denga daina, noo dahi goodou e dahuli gee i de mee abodonu, gai dahi dangada ga hagaahe mai ia,

²⁰ gai ia gi donu iho bolo tangada e hagaahea mai tangada haisala i ana mee dee heohi gu hai laa, gu hagaola donu dono mouli mai i de magau aama de haoli denga haisala lagolago.