James 4 - De Beebaa Dabu

Gi dee hai soa ange gi henua i lalo

¹ Gai aahee hiidinga e ssula age ai laa denga hebagi, ma de hagadaumee i oodou magavaa? E dee go hiidinga o denga lodo e hagadau hebagi i oodou lodo naa?

² Goodou e llodo i hanu mee, gai e deai donu oodou mee; deenei ai, goodou e daa dangada gi maakau. Goodou e nnoo gai e dee maua i de kave mee nei, gai goodou e hagadaumee ma de hebagi. Goodou e deai donu oodou mee, go hiidinga goodou e dee dangidangi ai.

³ Goodou e dangidangi gai e dee gaavadu gi goodou, go hiidinga e dee heohi doodou mee e dangidangi ai, gai goodou ga hai ai donu huu oodou mee e llodo ai.

⁴ Goodou dangada e dee hai hegau i de mee abodonu! Goodou e dee iloo laa bolo tangada e hai soa ange gi henua i lalo e hai baasi ange donu gi de Maadua? Deenei ai, be goai e lodo e hai soa ange gi henua i lalo, gai ia e hai donu ia gi se hagadaumee niio de Maadua.

⁵ Goodou e maanadu bolo ni ngadi muna e sisi laa i de Beebaa Dabu, e hai ange, “De Maadua e lodo gaiaa ange mmao i de hagasaalunga aana gu hai laa gi noho i odaadeu lodo”?

⁶ Aagai ia e abodonu mmao; deelaa ai, gu sisi e hai ange, “De Maadua e hai baasi ange gi gilaadeu e llodo maolunga, aagai e abodonu ange gi gilaadeu e llodo maolalo.”

⁷ Deenei ai, goodou hagallongo ange gi de Maadua. Hai baasi ange gi de ia hagabaubau, gai ia e savini naa donu ga hano gee mai i goodou.

⁸ Goodou hagapaa ange gi de Maadua, gai ia ga hagabaa adu gi goodou. Goodou de gau haisala, hagagilimalali ina oodou lima! Goodou de gau llodo lagolago, hagagilimalali ina oodou lodo!

⁹ Goodou llodo baubau ma de tangi aama de tangi see. Goodou gi dee kada aagai gi llodo baubau, gai haia gi dee malangilangi goodou gai gi daemaha.

¹⁰ Goodou hagamaolalo i mada luu mada o Tagi Maolunga, gai ia ga hagaamua ai goodou.

¹¹ Denga daina, goodou aude hagadau hagabaubau ina goodou. Tangada e hagabaubau ina dono daina aabe e hagamodu ina muna o dono daina, e hai baasi ange donu gi de hainga aama de hagamodu muna o de hainga. Aagai noo koe e hagamodu muna o de hainga, gai koe e dee daudali i de hainga, aagai se dangada e hagamodu ina muna o de hainga.

¹² Gai e dahi donu huu ia hai hainga ma de ia hagamodu muna; go ia e maua i de hagaola aabe go de daa gi magau. Aagai go koe goai, gai koe ga hagamodu ai muna o tangada e baa adu gi de goe?

Gidaadeu e dee iloo dagodo o daiao

¹³ Nnoho mai hagalaangona agu muna, goodou e hagataba laa, “Ailaa nei aabe go daiao gai gimaadeu e hulo naa gi dahi aduhale ga nnoho ai i e dahi ngadau, ga hagao mee ai gi maua ai mee lagolago.”

¹⁴ Gai goodou e dee iloo donu be ni aha e hai daiao. Aahee dagodo o oodou mouli? Oodou mouli e bei dagodo o de mama o vai e hanage laa i dahi masavaa bodobodo gai e moolau donu de lilo.

¹⁵ Aagai goodou hagataba, “Noo e heohi mai i daho Tagi Maolunga, gai gimaadeu e mouli naa ga hai dahi mee ma dahi mee.”

¹⁶ Aagai goodou e pasa hagassoenga i doodou hagamaolunga. Denga pasa hagassoenga bee nei alodahi e baubau.

¹⁷ Deenei ai, tangada e iloo e ia de mee heohi dana hai, aagai ia e dee hai, gai ia gu haisala ai donu.