James 3 - De Beebaa Dabu

De alelo

¹ Denga daina, gi dee soa goodou e hai gi ni dangada agoago, go hiidinga goodou e iloo bolo gidaadeu e agoagona ange dangada e kona ange de hai e hagamodu ai odaadeu muna.

² E lagolago donu odaadeu mee e haisala ai, gai noo tangada e dee haisala i ana muna e tala, gai ia se dangada gu heohi abodonu, ia gu maua hogi i de dagi dono angaanga alodahi.

³ Noo gidaadeu e hhao denga bit gi lodo ngudu o denga hoosa gi hagallongo mai ai gilaadeu, gai gidaadeu gu maua i de hai gilaadeu gi hulo gi de mommee adaadeu e llodo gilaadeu gi hulo aagena.

⁴ Goodou kalo ange diiloo dagodo o denga vaga: e dee galemu naa donu de nnui denga vaga, gai de madangi mmahi e ili saele gilaadeu i honga de moana, aagai se hoe damaa mee donu huu e baalea, gi lui ange gi de mommee o de giabini e lodo e dele aagena.

⁵ Gai e bei ai hogi dagodo o de alelo: se mee damaa mee, aagai e maua i de tala mee hagalele mouli. Gai e laumalie mmao de mommee e haula i lodo henua i de ahi damaa mee!

⁶ De alelo e bei de ahi ula. Gai se mommee iai de baubau gu dugu madali mee i odaadeu angaanga, gai e hai ga hakino gee de angaanga alodahi, gai e haula ai mee alodahi, mai i de ahi o Gehenna.

⁷ Denga hagadaagangaa manu dolodolo alodahi ma manu llele, ma manu bei labodo ma manu i lausedi, e maua i de hai gi tala, gai gu lava donu i de hagadala i daho dangada,

⁸ aagai tigi ai donu se dangada ne maua i de hai gi dala de alelo. De alelo se baubau e dee maua i de haganoho, gai e honu i mee hagammau ma de hagamaakau.

⁹ Odaadeu alelo e tuhi taadeu Dagi Maolunga ma Tamana, gai go ia hogi adaadeu hagamalaia ai dangada, ne hai laa ga hagadulagi ange gi dagodo o de Maadua.

¹⁰ De ngudu e hagaahe ange de abodonu, gai e hagamalaia hogi. Denga daina, e dee heohi donu doodou hai mee nei.

¹¹ E maua i de hai vai danuaa ma vai mmala i dahi saalingaa vai daudahi?

¹² Denga daina, e maua i de hai gi hhaa mai denga olive i de fig, aabe go denga fig i de grapevine? E dee maua hogi e dahi saalingaa vai soolo i de hai denga vai danuaa.

De heiangi mai i lunga

¹³ Goai i oodou magavaa e heiangi ma de donu? Gai ia gi hagaagona mai i dono hai hegau i de daudonu ma de heiangi.

¹⁴ Aagai noo goodou e llodo gaiaa ma de ssala donu huu oodou mee e llodo ai, gai goodou gi dee pasa hagasoenga, aabe gi hagahadu muna ina de mee abodonu.

¹⁵ De iloo mee nei e dee se mee ne hano iho i de langi, aagai se mee mai i henua i lalo, ma mai i daho dangada aama i daho Satan.

¹⁶ Gai de mommee iai de lodo gaiaa ma de hagamau mee, e hai hogi ga dee buni dangada, ma de hai denga dahulinga hakino gee alodahi.

¹⁷ Aagai de heiangi mai i lunga e gilimalali, e hai ga nnoho paba dangada, e daudonu, e maua i de sui noo ia e haisala, e honu i tegi ma denga hegau danuaa, e dee vae dangada, ma de hai hegau i de mee abodonu.

¹⁸ Gai hua o de heohi, go gilaadeu ne dooa de nnoho paba e hagihagia.