James 2 - De Beebaa Dabu

De hagakana ange gi dee hilihili dangada

¹ Denga daina, goodou gi dee hilihili dangada, noo goodou ni dangada e kai ange gi Iesu Klisdo taadeu Dagi Maolunga mahamaha laa.

² Noo dahi dangada e ulumagi dahi buulei goolo ma de gahu i malo danuaa ga humai gi doodou hagabuni, gai dahi dangada hagaau aloha e gahu laa i malo gelegele e ulu mai hogi,

³ gai goodou e hagadubu tangada e gahu laa i malo danuaa, ga hai ange gi de ia, “Humai noho i kinei,” gai e hai ange gi tangada hagaau aloha laa, “Duu gi lunga i kinaa,” aabe e hai ange, “Humai noho i gaogao luoogu vae,”

⁴ e aha, goodou e dee vae dangada naa i oodou magavaa, ma de hai goodou gi ni dangada hagamodu i oodou maanadu baubau?

⁵ Denga daina hagamogomogo, goodou nnoho hagasaelea age! E dee go gilaadeu e hagaau aloha i henua i lalo a de Maadua ne hai laa gi lava i de gai, aama de henua i de nohoanga hodooligi, gu lava laa i dana hagatoo donu ange gi gilaadeu e aaloha i de ia?

⁶ Aagai goodou gu hagangadi mee tangada hagaau aloha. Gai e dee go de gau lava e vaivai haia naa goodou ma de gaavange goodou gi de hainga?

⁷ Gai e dee go gilaadeu hogi e hagabaubau ina laa de ingoo dabu oodou gu hagaingoo ai naa?

⁸ Noo goodou e hagasula de hainga o de nohoanga hodooligi o de Maadua, bei de hai gu sisi ai laa i de Beebaa Dabu, “Koe gi aloha i tangada e baa adu gi de goe bei doo aloha donu i de goe,” gai gu danuaa.

⁹ Aagai noo goodou e hilihili dangada, gai goodou gu haisala donu, goodou gu oha donu de hainga.

¹⁰ Go hiidinga tangada e daohia de hainga alodahi, aagai e haisala i dahi damaa mee i lo te hainga, gai ia gu haisala donu i de hainga alodahi.

¹¹ Go hiidinga de ia ne hagadaba laa, “Aude dagodo haisala,” gu hagadaba hogi, “Aude daia tangada gi magau.” Noo koe e dee dagodo haisala aagai koe e daa tangada gi magau, aagai koe gu hagahaisala donu de hainga.

¹² Deenei ai, oodou muna ma oodou hegau gi bei dagodo o dangada e tonu iho laa bolo gilaadeu e hagamodu olaadeu muna i de hainga e haia laa gidaadeu ga ilaage.

¹³ Go hiidinga de Maadua e dee degi ange donu gi tangada e dee degi ange laa gi dangada i de masavaa hagamodu muna; aagai tegi e kii i de hagamodu muna.

Doo gai ma au hegau

¹⁴ Denga daina, ni haigamaiana aha de hagadaba a tangada bolo ia e dahi ono gai, aagai e dee hagaago mai i ana hegau? E maua e dono gai i de hagamouli ia?

¹⁵ Noo dahi daina daane be se daina hahine e gahu i bulubulu malo, aabe e deai ana gai i de laangi,

¹⁶ gai dahi goodou ga hai ange gi gilaadeu, “Hannoo i de baba, koe gi mahanahana ma de gaimee gi bosu danuaa,” aagai goodou tee gaavange hanu mee e hagadanuaa ai dono angaanga — gai e hanu ai naa haigamaiana o mee nei?

¹⁷ Gai e bei ai hogi, de gai e duu sogosogo laa, e magau donu, noo e dee hagaago mai i denga hegau.

¹⁸ Aagai dahi dangada e hagadaba, “Koe e dahi oo gai; gai au e hanu agu hegau.” Hagaagona mai doo gai e deai laa ono hegau, gai au ga hagaago adu dogu gai i agu hegau.

¹⁹ Koe e hagadonusia bolo e dahi donu huu Maadua; e danuaa. Denga hagasaalunga baubau e hagadonusia donu hogi ma de bolebole i delaadeu maatagu.

²⁰ Koe se dangada donu senga, koe e lodo gi hagaagona adu bolo de gai e deai laa ono hegau e deai donu ono haigamaiana?

²¹ E aha, e dee go hegau a Abraham taadeu dubuna ne hagaheohi ina ai laa ia, i dana masavaa ne sigidaumaha ai dana dama daane go Isaac i honga de mommee o ssigidaumaha?

²² Gai koe gu gidee bolo dono gai ma ana hegau e hagahai hegau ngaadahi, gai dono gai ne hai ga honu danuaa i ana hegau.

²³ Gai gu hagassula muna a de Beebaa Dabu gu tala laa, “Abraham ne hagadonusia de Maadua, gai dono gai ne hai ia gi dau bolo se dangada e heohi;” gai ia gu hagaingoo ange go ssoa o de Maadua.

²⁴ Goodou gu gidee bolo tangada e hagaheohi i ana hegau, e dee go dono gai donu huu.

²⁵ Aagai e bei ai hogi de hine hai be se manu go Rahab: ia ne hagabinga bolo e heohi i ana hegau ne hai, i dono abodonu ange gi luu daane mulidagi ga hai gilaau gi hulo i dahi haiava gee.

²⁶ De angaanga e deai se hagasaalunga iai e magau, e bei ai hogi, de gai e dee hagahai hegau e magau.