James 1 - De Beebaa Dabu

De hagaboo

¹ Mai i daho James, tangada hai hegau o de Maadua ma Tagi Maolunga go Iesu Klisdo. Ange gi denga aamuli e madaangahulu ma lua gu mavaevae saele laa i denga huaahenua: De laangi danuaa goodou.

De gai ma denga hagatale

² Denga daina, goodou gi malangilangi i de masavaa oodou e tuu ange ai gi denga hagadaagangaa hagatale,

³ go hiidinga goodou e iloo bolo de hagatale o oodou kai e hai ga kii ange doodou llodo mmahi.

⁴ Gai dugua ange de lodo mmahi gi hagalava ina ana hegau, gi maatua ai goodou ma de heohi abodonu, gu deai se mee daudahi e deai i oodou daha.

⁵ Gai noo dahi goodou e deai sono heiangi, gai ia gi dangidangi ange gi de Maadua, de ia e abodonu ange laa gi dangada i mee alodahi, gai ia e dee hagasee donu ia, gai e gaavadu naa donu gi de goe.

⁶ Aagai tangada gi dangidangi i de gai, ia gi dee lua lodo, go hiidinga tangada lua lodo e bei dagodo o de beau i honga tai e ilihia saele laa i de madangi.

⁷ Gai tangada lua lodo gi dee hagadaba bolo ia e maua dahi mee daudahi i daho Tagi Maolunga;

⁸ go hiidinga tangada laa e lua lodo ma tee maua i de duu gi makaga i dahi mee daudahi.

⁹ Taina e maolalo laa gi duuhia dagodo o dono hagamaolunga ina,

¹⁰ gai tangada lava gi duuhia dono hagamaolalo, go hiidinga ia e lilo naa donu bei de huaala.

¹¹ Go hiidinga de laa hagavvela e hanage ga hagammae de manu somo, ga hai gu malili ono huaala, gai dono mahamaha gu lilo. Gai e bei ai hogi, tangada lava e lilo naa donu hogi i de masavaa e hai ai ana hegau.

¹² E manuuia tangada e lodo mmahi i dono masavaa e hagataalea ai, go hiidinga noo ia e duu ga makaga i lo te hagatale, gai ia e kave donu de hau o de mouli, go de mee a de Maadua gu hagatoo donu ange gi gilaadeu e aaloha i de ia.

¹³ De masavaa o tangada e hagatale ai, gai ia gi dee hagadaba, “De Maadua e hagatale ogu dagodo.” Go hiidinga de baubau e dee maua donu i de hagatale de Maadua, gai ia e dee hagatale donu hogi dahi dangada daudahi;

¹⁴ aagai dahi ma dahi e hagataalea donu huu i de lodo baubau e dagodo laa i ono lodo, gai ia gu hagasengalia.

¹⁵ Gai dua de hagadili o de lodo baubau nei, gai de lodo nei gu haanau de haisala; gai ga madua huu de haisala, gai de haisala ga haanau de magau.

¹⁶ Denga daina hagamogomogo, goodou gi dee hagasengalia!

¹⁷ Mee danuaa alodahi ma mee ngadi gaavange abodonu ni mee mai i lunga, i daho Tamana o denga maalama e deai laa se sui ono dagodo, bei dagodo o de gohu e hano laa ga lilo.

¹⁸ Gai ia ne lodo e hagadili gidaadeu i de muna abodonu, gai ia ga hai ai gidaadeu go hua i taamada o mee alodahi aana ne hai.

De hagallongo ma de hai hegau ai

¹⁹ Denga daina hagamogomogo, goodou gi iloo de mee nei: dahi ma dahi gi moolau dana hagallongo, aagai gi dee moolau dono basa aabe go dono lili,

²⁰ go hiidinga de lili o tangada e dee hagahai hegau de heohi o de Maadua.

²¹ Deenei ai, goodou dilia denga dahulinga hakino gee ma dahulinga baubau alodahi, gai daohia agoago gu daakodo laa donu i oodou lodo, i de lodo maolalo, go muna e maua i de hagamouli goodou.

²² Goodou gi dee hagalaangona donu huu denga agoago, ga daahanga ai donu huu goodou. Gai goodou hai hegau ai.

²³ Tangada e hagalaangona laa muna a de Maadua, gai e dee hai hegau ai, e bei dagodo o tangada e diiloo laa luoono mada i de galaasa dilodilo;

²⁴ ia gu gidee dono ada, gai ga hano gee naa huu ia i kilaa, aagai ia gu ngalo dagodo o luoono mada.

²⁵ Aagai tangada e diiloo mee i lo te hainga e honu abodonu laa, go de hainga o de ilaage, ma de duudagi de hai de mee nei — gai ia e dee ngalo ana mee gu langona, aagai e hai hegau ai — tangada bee nei e manuuia i mee alodahi aana e hai.

²⁶ Noo dahi dangada e hagadaba bolo ia se dangada taumaha, aagai ia e dee maua i de daohi dono alelo, gai ia e daahanga donu huu ia, dono se dangada taumaha e deai donu haigamaiana.

²⁷ Gai deenei de hai daumaha gilimalali ma de heohi i mada luu mada o Tamana go de Maadua: go de bale ange denga gauligi gu deai olaadeu maadua ma haahine gu maakau olaadeu bodu gu duasala laa, ma tee dugua ange henua i lalo gi haia gi hakino gee tangada.