Isaiah 62 - De Beebaa Dabu

De ingoo hoou o Zion

¹ Au e dee hagapuni naa donu dogu ngudu i hiidinga o Zion, au e dee tuu naa donu dogu basa i hiidinga o Jerusalem, ga dae ai gi de sula age dono heohi bei de maalama o taiao, dono hagaola e bei de lama gu haula laa.

² Gai denga huaahenua e gidee naa doo heohi, denga hodooligi alodahi e gidee naa doo mahamaha; gai koe e kave naa dahi ingoo hoou, go de ngudu donu o Tagi Maolunga e gaavadu doo ingoo.

³ Koe e bei naa de hau hodooligi mahamaha i lo te lima o Tagi Maolunga, gai se hau hagauda i lo te lima o doo Maadua.

⁴ Gai koe gu dee hagabinga bolo go De ia gu Dilia, gai doodou henua gu dee hagabinga bolo go Ngadi Dagodo. Aagai koe e hagaingoo ange naa go Hephzibah, gai doo henua e hagaingoo ange naa go Beulah; go hiidinga Tagi Maolunga e malangilangi naa i de goe, gai doo henua e bei naa de hine gu hai bodu.

⁵ Dahi dama daane e hai bodu ange gi dahi damaa hine, gai e bei ai hogi au dama e hai bodu adu naa gi de goe. Gai de Maadua e malangilangi naa hogi i de goe, bei de malangilangi o tama daane i dono bodu.

⁶ Jerusalem, au gu dugu denga daane dagitilo i honga doo buibui; gai gilaadeu e dee hagapuni naa donu olaadeu ngudu i de laangi ma boo. Goodou e dalodalo ange laa gi Tagi Maolunga, goodou aude damaa hagammabu donu,

⁷ gai gi dee dugua ange ia gi hagamabu ga dae ai gi dana hagaahe age Jerusalem, ma de hai gi se mommee e tuhi hagadanuaa i henua i lalo.

⁸ Tagi Maolunga gu haalo dono lima madau ma gu hagatoo donu i dono sauaa ma gu hagadaba, “Au e dee ahe ange naa donu e gaavange oodou grain e gai oodou hagadaumee, gai de gau henua gee e dee aahe ange naa donu e unu uvaini hoou oodou ne hagadaalea ange aagena;

⁹ aagai go dangada e hagihagia e gaina, gai gilaadeu ga tuhi ai Tagi Maolunga; gai go dangada e hagihagia denga grape e unumia uvaini i lodo buibui o dogu mommee dabu.”

¹⁰ Ulu laa lodo, ulu laa lodo haitoga! Hagadabena ina de haiava o dangada e ulu ai. Hagaduulia age, hagaduulia age de haiava laumalie! Aaua denga hadu; hagaduulia age de hagailonga ange gi denga huaadangada.

¹¹ Tilo, Tagi Maolunga gu hagailoo ange gi luu bido o henua i lalo; “Goodou hai ange gi tamaa hine o Zion: Tilo, doodou Ia Hagaola gu humai! Tilo, ia e gaamai ana hagaoanga madali ia, ma mee e hagao ange ai alaadeu hegau.”

¹² Gai gilaadeu e hagaingoo ange naa go de Gau Dabu, go Dangada a Tagi Maolunga gu Hagaola; gai koe e hagaingoo ange naa go de Aduhale e Saalaa, se Aduhale e dee Dilia.