Isaiah 60 - De Beebaa Dabu

De mahamaha o Jerusalem i muli mai

¹ ⌊Jerusalem,⌋ hidi age, haia gi maalama goe, gu dae mai doo maalama, gai de mahamaha o Tagi Maolunga ga hagamaalama goe.

² Tilo, de gohu gu haoli henua i lalo, gai de gohu boo dangodango gu haoli denga huaadangada; aagai Tagi Maolunga e humai naa gi oo elunga, gai dono mahamaha e gidee naa i oo daha.

³ Denga huaahenua e loomai naa gi doo maalama, denga hodooligi e loomai naa gi de sula age o doo maalama.

⁴ Dangage age ma gi galogalo saele mage diiloo: gilaadeu alodahi gu hagabuni e loomai gi oo daha. Au dama daane e loomai naa i de mommee mmao, gai au damaa hine e saabai i honga dono dege.

⁵ Gai luoo mada e maalama age naa i dau gidee, koe e lodo danuaa naa ma de malangilangi mmao. De lava o honga lausedi e gaavadu naa gi de goe gai de lava o denga huaahenua e gaavadu naa gi de goe.

⁶ Denga hagabuulingaa gamelo e loomai naa ga hhao honga de henua, go gamelo gauligi a Midian ma Ephah. Gai dangada alodahi mai i Sheba e loomai naa; gilaadeu ga gaamai denga goolo ma mee maanongi, ma de tala de tuhi o Tagi Maolunga.

⁷ Denga hagabuulingaa ssiibi alodahi o Kedar e hagabudu naa ga gaamai gi de goe, denga ssiibi daane o Nebaioth e hai hegau adu naa gi de goe; gilaadeu e hai naa denga sigidaumaha hagamalangilangi i honga dogu mommee o ssigidaumaha, gai au e hai naa gi mahamaha dogu temple.

⁸ Goai e ilihia nei ma e hulo bei dagodo o denga giliiga, ma denga manu kono e aahe mai laa gi olaadeu hoohanga?

⁹ Ni muna abodonu, denga henua i tagudai e tali hagalodolodo mai gi de au; denga vaga o Tarshish e loomai naa i mua, ma e gaamai au dama i mommee mmao, madali alaadeu selevaa ma goolo, e hagadubu ai de ingoo o Tagi Maolunga doo Maadua, go de Ia Dabu o Israel, go hiidinga ia gu hagamahamaha goe.

¹⁰ De gau henua gee e hagatuu age naa oo buibui, gai olaadeu hodooligi e hai hegau adu naa gi de goe. Gai e dee galemu naa donu dagu hagaduasala goe i dogu lili, aagai au e abodonu adu donu gi de goe i dogu lodo aloha.

¹¹ Oo haitoga e hhuge naa i masavaa alodahi, gai e dee pono donu i de laangi ma de boo; gai dangada ga gaamai ai gi de goe de lava o denga huaahenua, gai go olaadeu hodooligi e dagina mai gilaadeu.

¹² Gai denga huaahenua ma nohoanga hodooligi e dee hai hegau adu laa gi de goe e daa naa ga maakau, gai e oha naa donu ga maoha.

¹³ De mahamaha o Lebanon e gaamai naa gi de goe, go denga pine ma fir, aama cypress, e hagamahamaha ai dogu mommee dabu; gai au e hai naa gi mahamaha de mommee e dugu ange aagena luoogu vae.

¹⁴ Dama a dangada nogo hagaduasala ina goe e loomai naa ga ino adu gi de goe; gai gilaadeu alodahi nogo kino i de goe e ino naa gi lalo i gaogao luoo vae; gilaadeu e hagaingoo adu naa goe go de Aduhale o Tagi Maolunga, go Zion o de Ia Dabu o Israel.

¹⁵ E dee galemu donu koe ne dilia ma de kino ai o dangada, gai gu deai dangada e loomai laa kilaa, aagai au e hai naa goe gi maolunga ga hano ai, gai gi se mommee e malangilangi ai denga atangada alodahi.

¹⁶ Koe e unu naa vai uu a denga huaahenua, ma de gaimee i gai danuaa a denga hodooligi. Gai koe e iloo naa bolo go au donu go Iahweh, doo Ia Hagaola, go au ne hagaola ina goe, de Ia Mmahi o Jacob.

¹⁷ Au e gaavadu naa gi de goe goolo e sui ai bronze, denga selevaa e sui ai iron, denga bronze e sui ai laagau, gai denga iron e sui ai hadu. Au e hai naa de noho baba gi dagina goe gai de heohi go doo hodooligi.

¹⁸ Gu deai naa donu dangada alasala e gidee i doo henua, e deai mommee e ngadi daakodo ma de maoha i doo henua, aagai koe e hagaingoo ange naa doo buibui go de Hagaola, gai e hagaingoo ange oo haitoga go de Tuhi.

¹⁹ Gai e dee go de laa e hagamaalama ina goe i de laangi, e dee go de maasina hogi e hagamaalama ina goe i de boo; gai go Tagi Maolunga donu doo maalama ga hano ai, gai go doo Maadua e hagamahamaha ina goe.

²⁰ De laa e hagamaalama ina goe e dee danu naa donu, de maasina e dee danu naa hogi; gai go Tagi Maolunga doo maalama e dee ngado mai, gai oo laangi e hinangalosaa ai e ui naa.

²¹ Gai oo dangada alodahi e mouli naa i de heohi; gilaadeu e henua naa i de henua ga hano ai. Gai go gilaadeu de uli aagu ne doo laa, go hegau a luoogu lima, e hagaago mai ai dogu hagamahamaha.

²² Dangada hugadoo e sogoisi i goodou e hai naa ga se aamuli soa, gai de hagabuulinga damaa mee hugadoo e hai naa ga se huaahenua soa. Go au donu go Iahweh, au e hai gi moolau de hai mee nei i de masavaa gu hagamodu.