Isaiah 58 - De Beebaa Dabu

De hagahiikai heohi

¹ “Oo daalaa, aude haganoho ina. Hagaleo laumalie bei de leo o de hanga manu. Daalaa ange gi ogu dangada olaadeu baubau, gai daalaa ange gi dangada o Jacob olaadeu haisala.

² Laangi alodahi gai gilaadeu e ssala ngau, e dagodo be gilaadeu e llodo gi iloo e gilaadeu ogu haiava, gai e dagodo be gilaadeu se huaahenua e haia de mee heohi, gai gilaadeu tigi tili donu muna a delaadeu Maadua. Gilaadeu e ssili mai dagodo o ogu hagamodu heohi, e dagodo be gilaadeu e malangilangi i de hagabaa ange o de Maadua.

³ Gilaadeu e hagataba, ‘Gu aha gu hagahiikai ai gimaadeu gai de Maadua e dee gidee donu? Gai gu aha gu hagamaolalo ai gimaadeu, gai koe e dee anga mai donu?’ Gai de laangi oodou ne hagahiikai ai, gai goodou e hai donu huu oodou mee e malangilangi ai, goodou ne vaivai hai oodou dangada hai hegau alodahi.

⁴ Tilo, doodou hagahiikai e hai goodou ga hagadaumee ma de hebagi, gai goodou e hagadau hebagi i oodou lima. Oodou dalodalo e dee maua gi tae age gi de langi noo goodou e hagahiikai bei oodou hegau e hai anailaa nei.

⁵ E aha, deenei de hagahiikai oogu e lodo ai, e dahi donu huu laangi a tangada e hagamaolalo ai ono lodo? E aha, go dono ino gi lalo bei dahi madila, ma de dagodo i honga dahi malo daladala aama lehu? Gai goodou e hagataba bolo se hagahiikai abodonu deenaa, e dahi laangi e malangilangi ai Tagi Maolunga?

⁶ E aha, e dee deenei de hagahiikai aagu ne hili: go de hagadangadanga daula o hegau baubau, ma de tala daula o de laagau hagahai hegau, ma de hai gi ilaage gilaadeu e vaivai haia, aama de hadihadi laagau hagahai hegau alodahi?

⁷ E aha, e dee go dau duha ange au gai gi gilaadeu e hiikai, ma de gaavange dahi mommee moo tangada e deai sono hale — ma de hakahu tangada e deai ono malo, i de masavaa aau e gidee ai dono gilisau, gai koe e dee hano e mmuni e dee bale ange doo dangada donu?

⁸ Gai doo maalama e sula age naa bei de maalama o taiao, gai doo ieiangi e moolau naa donu de dae mai; doo heohi e hano naa i oo mada i mua, gai de mahamaha o Tagi Maolunga e buibui mai naa oo dua.

⁹ Gai de masavaa naa huu oou e dalodalo ai, gai Tagi Maolunga ga basa adu gi de goe; de masavaa naa huu oou e dangidangi i de bale, gai ia e hai adu naa, ‘Deenei au.’ Noo koe e tuu dau vaivai hai dangada, ma de sisi ange dahi, ma de tala hagabaubau dahi,

¹⁰ gai noo koe e haangai anga gilaadeu e hiikai ma de gaavange au mee gi gilaadeu e duasala laa, gai doo maalama e sula age naa i lo te gohu, gai de gohu i oo daha e bei naa de maalama o lo te laangi.

¹¹ Gai Tagi Maolunga e dagi naa goe i masavaa alodahi, ia e gaavadu oo mee e duasala ai i de masavaa hai ngadaa, ma de hagammahi doo angaanga. Gai koe e bei naa dagodo o de veelenga gu maluulu danuaa laa, ma de vai e dee maua laa gi masa.

¹² Gai oo dangada e hagatuu age ange naa mommee gu maoha laa ma de hagaahe age tagelo madagidagi, gai koe e hagaingoo ange naa go de ia e hagaahea age de buibui gu maoha laa, ma de ia e hagaahea age denga haiava i de mommee nnoho.

¹³ Noo koe e dee oha Sabbath, ma tee hai oo mee e lodo ai i dogu laangi dabu, ma de hagabinga Sabbath bolo se laangi hagamalangilangi, ma de hagaingoo ange de laangi dabu o Tagi Maolunga bolo se laangi hagadubu, gai noo koe e hagadubu de laangi laa ga dee hai donu huu au hegau, ma de hagamalangilangi donu huu goe, aama tee tala ai hanu ngadi muna,

¹⁴ gai koe e malangilangi naa i Tagi Maolunga, gai au e hai naa goe gi gage i honga mommee maolunga o de henua; ma de hagadanuaa i de boolonga o doo dubuna go Jacob.” Go Tagi Maolunga donu ne daalaa muna nei.