Isaiah 56 - De Beebaa Dabu

De hagaola ange gi huaahenua alodahi

¹ E hagadaba Tagi Maolunga: “Hai hegau i de hagamodu heohi, gai haia de mee heohi, go hiidinga dagu hagaola gu baa mai donu, gai dogu heohi gu dai hagaago mai donu.

² E manuuia tangada e haia de mee nei, ma tangada e kana ange ga daohia de mee nei, go tangada e dao ina e dee hagangadi mee Sabbath, gai e daohi luoono lima gi dee haia de baubau.”

³ Tangada henua gee gu dau ange laa gi Tagi Maolunga gi dee hagadaba, “Tagi Maolunga e vvae gee naa ngau mai i dono huaadangada.” Gai de eunuch gi dee hagadaba, “Au e bei donu huu de manu somo gu mmae laa.”

⁴ Go hiidinga e hagadaba Tagi Maolunga, “Denga eunuch e dao ina laa agu Sabbath, ma de hilihili mee oogu e malangilangi ai, aama de daohi dagu hagatoo donu hagaheloongoi —

⁵ au e hai naa dahi hagamaanadu ma dahi ingoo moolaadeu i lo te temple ma lodo ono buibui, gi danuaa ange i denga dama daane ma damaa hine; au e gaavange naa gi gilaadeu dahi ingoo e dee ngado mai gai e dee maua donu gi lilo.

⁶ Gai de gau henua gee gu dau ange laa gi Tagi Maolunga ma de hai hegau ange ai gi de ia, gi aaloha i de ingoo o Tagi Maolunga ma de daumaha ange gi de ia, gai alodahi e daohia Sabbath, gai e dee hagangadi mee de laangi nei, ma tangada e daohia dagu hagatoo donu hagaheloongoi —

⁷ au e gaamai naa gilaadeu nei alodahi gi dogu mounga dabu, ma de hai gilaadeu gi malangilangi i dogu hale dalodalo. Gai au e malangilangi naa i alaadeu sigidaumaha dudu ma alaadeu sigidaumaha e hai i honga dogu mommee o ssigidaumaha; go hiidinga dogu hale e hagaingoo ange naa go de hale dalodalo o denga huaahenua alodahi.”

⁸ Gai de Ia Aamua go Iahweh e hagadaba, go de ia e hagabuni ina mai de gau Israel gu i denga henua gee: “Au e hagabuni mai naa hogi de gau ange laa, gi daho olaadeu aagu gu lava laa i de hagabuni mai.”

De hagabaubau o dagi o Israel

⁹ Loomai, denga manu dolodolo i de henua alodahi, denga manu alasala i lodo henua alodahi, goodou loomai gaimee.

¹⁰ Denga daane dagitilo o Israel e dee kide, gilaadeu alodahi e deai donu olaadeu iloo mee; gilaadeu e bei denga gaaduu e dee pasa, gilaadeu dee maua i de koo; gilaadeu e daakodo ga sseni ma de midi, gilaadeu e llodo mmao e sseni.

¹¹ Gilaadeu e bei denga gaaduu hiikai, e dee maua laa gi boobosu. Gilaadeu ni dangada hagaloosi ssiibi e dee tonu; gilaadeu alodahi gu daudali donu huu i olaadeu lodo, dahi ma dahi gu ssala donu huu mee e danuaa ange gi de ia.

¹² Gilaadeu e hagataba, “Loomai, gidaadeu ga gaamai uvaini! Gidaadeu ga unu gi ssenga i mee mmahi! Gai daiao gidaadeu ga aahe ange hogi e hai mee mau, aabe e hai gi dubu ange i mee anailaa nei.”