Isaiah 54 - De Beebaa Dabu

De mahamaha o Zion i muli mai

¹ “Oo ma gi daahili, de hine dee hua, gai go de hine tee haanau; oo ma gi daahili, oo ma gi malangilangi, de hine tigi ai ono hagalangona; go hiidinga dama a de hine gu dilia e dono bodu e soa ange naa i dama a de hine e dahi ono bodu, go Tagi Maolunga e hagadaba.

² Hagalaumalie ina de mommee o doo hale malo, gai doohaa gi madoha malo buibui o doo hale, aude daohia mai, gai hagatolo ina gi daha oo daula, ma de hagatuu gi makaga oo laagau hagamakaga.

³ Gai koe e hagalahalaha naa gi de madau ma de masui, oo hagadiilinga e hagadee kii naa denga huaahenua, gai gilaadeu ga nnoho i lodo olaadeu aduhale gu ngadi daakodo laa.

⁴ Koe gi dee madagu; koe e dee hagadogaa ina naa donu. Koe gi dee manavasaa i doo hagangadi mee ina; koe e dee hagamaolalo ina. Gai koe e ngalo naa doo hagadogaa ina i de masavaa oou e gauligi ai, gai koe e dee manadua naa donu doo hagadogaa ina i teai soo bodu.

⁵ Go hiidinga doo bodu go ia ne haia goe, dono ingoo go Tagi o denga hagabuulinga hebagi; gai de Ia Dabu o Israel go doo Ia Hagaola, ia e hagaingoo ange go de Maadua o henua i lalo alodahi.

⁶ Gai Tagi Maolunga gu hagahi adu goe bei de hine gu dilia ma de daemaha ono lodo, bei de hine e hai bodu i dono masavaa se damaa hine ai, gai gu dilia, go doo Maadua e hagadaba.

⁷ Au ne tili goe i dahi masavaa bodobodo, aagai au e hagaahe mai naa goe i hiidinga dogu lodo aloha laumalie.

⁸ Au ne kona mmao dogu lili gai au ga haoli luoogu mada gi dee gidee e goodou i dahi masavaa bodobodo, aagai au e abodonu adu gi de goe ga hano ai ma de lodo aloha adu naa gi de goe, go Tagi Maolunga doodou Ia Hagaola e hagadaba.

⁹ Gai de mee nei e bei dagodo laangi o Noah, i de masavaa aagu ne hagatoo donu ai bolo denga vai e dee aahe ange naa donu e haoli henua i lalo. Gai e bei ai hogi, au gu hagatoo donu bolo au e dee lili ange naa donu i goodou, gai au e dee hagasee ange naa donu goodou.

¹⁰ Gai ga aau naa donu ga deai mounga, gai denga duuduu gu hagangalue gee, aagai dogu abodonu adu gi goodou e dee ngalungalue donu, dagu hagatoo donu hagaheloongoi i de nnoho baba e dee tuu naa donu, go Tagi Maolunga e hagadaba, go de ia e lodo aloha adu gi de goe.

¹¹ De aduhale gu hagaduasala ina, ma de oohaa i de madangi, gai tee hagaaneane ina, tilo, au e ahe ange naa e bae age goe i hadu hagamogomogo, ma de hagadagodo oo dagelo i denga sapphire.

¹² Au e hai naa oo hale maolunga i denga agate gai e hai oo haitoga i denga jewel malamalama, gai oo buibui alodahi i denga hadu hagamogomogo.

¹³ Gai au dama alodahi e agoago naa i daho Tagi Maolunga, gai au dama e laumalie naa delaadeu nnoho paba.

¹⁴ De aduhale e hagaduu naa i de heohi, gai de hagaduasala e mmao gee naa donu, gai goodou e dee maatagu naa donu i dahi mee daudahi. De mee hagamaatagu e kave naa donu gi mmao gee i goodou; e dee dai baabaa adu naa donu gi goodou.

¹⁵ Noo dahi dangada e hebagi adu gi goodou, gai e dee go au ne haia de mee nei; gai tangada e hebagi adu gi goodou e magulu naa donu.

¹⁶ Tilo, go au ne hagadau ina de labagau o denga baalanga, go tangada e iliilihia denga maga ahi gi ula, ma de hai dahi goloa hebagi gi heohi ange gi ono hai hegau. Gai go au hogi ne hagadau ina tangada e oohaa laa gi oohaa mee;

¹⁷ aagai e deai naa donu se goloa hebagi e hai baasi adu gi goodou e kii, gai goodou e kii naa i gilaadeu e hagabaubau ina goodou. Deenei de boolonga o de gau hai hegau o Tagi Maolunga, gai deenei dagu hai e hagaheohi ai gilaadeu,” go Tagi Maolunga e hagadaba.