Isaiah 52 - De Beebaa Dabu

Tagi Maolunga e hagaola naa Jerusalem

¹ Zion, alahage, alahage, hagammahi ina goe. Jerusalem, de aduhale dabu, gahu i oo malo mahamaha. Gai de gau tigi tuu dagaholiage ma gilaadeu e dee gilimalali e dee aahe e ulu i de aduhale.

² Jerusalem, dahidahia oo gelegele, mage hidi age, noho i honga doo nohoanga. Tamaa hine o Zion gu noonoodia laa ma gu gaavee gee, hagauia seeini i oodou ua.

³ E hagadaba Tagi Maolunga, “Koe ne hagao gi daha, gai tee hagao i sseene, gai e dee ni sseene hogi e hagaola ai goe.”

⁴ Gai e hagadaba de Ia Aamua go Iahweh, “Taamada gai ogu dangada ne hulo gi Egypt e nnoho, gai iainei de gau Assyria gu hagaduasala gilaadeu.

⁵ Gai ni aha gu hai nei i kinei? go Tagi Maolunga e hagadaba. Ogu dangada gu gaavee gee, gai tee hagao, gai dangada e dagina gilaadeu e pasa hagamaolunga, go Tagi Maolunga e hagadaba. Mai i taiao ga boo ai gai dogu ingoo e hagangadi mee ina.

⁶ Deenei ai, ogu dangada e iloo naa dogu ingoo; de laangi laa gai gilaadeu e tonu ange naa bolo go au donu ne daalaa de mee nei. Uaa, go au donu deenei.”

⁷ Ga dae laa de mahamaha i honga denga mounga vae o dangada e gaamai de longo danuaa, go de ia e daalaa dagodo o de nnoho paba, ma de gaamai denga longo danuaa ma de tala dagodo o de hagaola, ma de hai ange gi Zion, “Go doo Maadua e hodooligi!”

⁸ Hagalaangona adu! Oodou dangada dagitilo e hevaalogi; gilaadeu alodahi gu hevaalogi i delaadeu malangilangi. Go hiidinga gilaadeu gu gidee i olaadeu ganomada de masavaa o Tagi Maolunga e ahe mai ai gi Zion.

⁹ Denga mommee i Jerusalem gu ngadi daakodo laa, goodou alodahi hevaalogi daahili i de malangilangi, go hiidinga Tagi Maolunga gu hagaaneane lodo o ono dangada; ia gu hagaola Jerusalem.

¹⁰ Tagi Maolunga e hagaabo naa dono lima dabu, i madamada o denga huaahenua alodahi, gai henua i lalo alodahi e gidee naa de hagaola a taadeu Maadua.

¹¹ Goodou hulo gee, goodou hulo gee, hulo gee mai i kilaa! Goodou aude poo ange gi dahi mee hakino gee! Goodou ssao hulo gee mai i kilaa gai gi gilimalali ai goodou, go goodou e hagauda ina goloa hai hegau o Tagi Maolunga.

¹² Gai goodou e dee hagamoolau naa donu e hulo, aabe e saavini e hulo, go hiidinga Tagi Maolunga e hano naa i oodou mada i mua, gai de Maadua o Israel e buibui naa oodou dua.

De hagaduasala o tangada hai hegau o Tagi Maolunga

¹³ Tilo, dogu dangada hai hegau e hai hegau naa i de iloo mee; ia e hagaamua ina naa, ma de hagadubulia, ma de maolunga mmao.

¹⁴ Dangada soa ne llele mouli i ono dagodo — dono angaanga e kona de lagolagohia, gu dee dagodo be se angaanga dangada, gai dono angaanga gu dee madea ange bolo se angaanga dangada —

¹⁵ gai ia e hai naa ga llele mouli denga huaahenua soa, denga hodooligi e pono naa olaadeu ngudu i ono hiidinga. Gilaadeu e gidee naa mee tee tala ange gi gilaadeu, gai e tonu ange naa gi mee alaadeu tee langona.