Isaiah 50 - De Beebaa Dabu

¹ E hagadaba Tagi Maolunga, “I hee iai de beebaa maavae a doodou dinana, aagu ne gaavadu ga hai ai ia gi hano gee? Gai goai aagu ne hagao ange goodou aagena e hagao ai agu muli? Tilo, go hiidinga oodou haisala oodou ne hagao ai gi daha, gai go oodou haisala ne hidi mai ai de hano gee o doodou dinana.

² Gai gu aha gu deai ai laa dangada i de masavaa oogu ne humai ai? Gai gu aha gu deai ai laa dangada e pasa mai, i de masavaa aagu ne hagaagahi ai? E aha, gu kona laa de bodobodo dogu lima, gu dee maua i de hagaola goodou? Aabe gu deai ogu mahi e hagaola ai goodou? Tilo, au ne hagasee tai gu masa, au ne hai denga saalingaa vai ga se vao; denga mamu i kilaa gu pilo i teai dai ma de maakau i delaadeu hieunu.

³ Au e hai gi gohu lo te langi bei tangada e gahu i malo daladala.”

Tangada hai hegau o Tagi Maolunga

⁴ De Ia Aamua go Iahweh gu gaamai gi de au de alelo o tangada gu agoagona, gi iloo ai e au muna e hagammahi ai gilaadeu e daalea. Ia e hhango mai au i daiao alodahi, ma de hhuge luoogu dalinga gi langona ai e au bei dagodo o tangada e agoagona.

⁵ De Ia Aamua go Iahweh gu hhuge luoogu dalinga, gai au tee hagamanege, aabe ne huli gee i de ia.

⁶ Au ne dugu ange au gi gilaadeu e hagailiilia dogu dua, gai e huli ange luoogu galaahuu gi gilaadeu e vele ina dogu gumigumi; gai au tee haoli luoogu mada i de hagadogaa ma de saavale.

⁷ De Ia Aamua go Iahweh ne bale mai au, deelaa ai, au e dee hagangadi mee ina naa donu; deenei ai, au gu soe donu dagu maanadu, gai au e iloo bolo au e dee dogaa naa donu.

⁸ De ia e daalaa dogu heohi e baa mai donu gi de au. Gai goai ai naa e hagabaubau ina au? Gidaadeu ga hagadau gaavange i de mommee hagamodu muna. Goai e lodo e hagabaubau au? Gai ia gi humai.

⁹ Tilo, go de Ia Aamua go Iahweh e bale mai au, gai goai ai naa e hagahaisala ina au? Tilo, gilaadeu alodahi e bei naa de malo duai a de lengisi e gai laa ga odi.

¹⁰ Goai i oodou magavaa e madagu i Tagi Maolunga, ma de hagallongo ange gi muna a dono dangada hai hegau? Tangada e seesee i lo te gohu e deai laa se maalama iai, gi hagadonusia de ingoo o Tagi Maolunga ma de tali hagalodolodo ange gi dono Maadua.

¹¹ Tilo, goodou alodahi e haulasia dahi ahi, ma de kave denga lama e haula laa, goodou seesee i de maalama o oodou ahi, ma denga lama oodou gu haula laa. Deenei dagu hai e hai ai goodou: goodou e daakodo gi lalo i doodou mmae.