Isaiah 47 - De Beebaa Dabu

De hagaduasala o Babylon

¹ De bua moe go Babylon, iho ma gi noho i lo te gelegele; tamaa hine a de gau Babylon, noho i honga de gelegele e dee go de nohoanga o de hodooligi, Gai koe gu dee hagabinga bolo se damaa hine somo danuaa ma de balabala doo angaanga.

² Haia denga hadu mmili ga mmili ai denga grain gi lligi; hagauia de malo e haoli ai luoo mada. Langaa age oo malo, gi ssula mai ai luoo gauanga, gai koe ga seesee laa lodo saalingaa vai.

³ Gai dangada e gidee naa doo gilisau, gai koe e dogaa naa i de hagaui oo malo; au e sui adu naa oodou hegau baubau, gai au e dee dugu naa donu dahi goodou gi ola.

⁴ Demaadeu Ia Hagaola, dono ingoo go Tagi o denga hagabuulinga hebagi, gai go de Ia Dabu o Israel.

⁵ Noho mage dee muu, ma de noho i lo te gohu, tamaa hine a de gau Babylon; koe gu dee hagabinga bolo go de hine hodooligi o denga nohoanga hodooligi.

⁶ Au ne lili i ogu dangada, ga hai gi dee se mee dabu dogu boolonga; au ne dugu adu goe gi hagadee kii ina gilaadeu, gai koe tee lodo aloha ange gi gilaadeu. Koe ne hagahai hegau kona donu hogi de gau madumaatua.

⁷ Koe ne hagadaba, “Au se hine hodooligi ga hano ai e dee ngado mai.” Aagai koe tee hagasaele donu dagodo o mee nei, aabe ne maanadu dagodo o de hagaodi o au hegau.

⁸ Deenei ai, noho mai hagalaangona, de hine e haia donu huu ono mee e lodo ai, ma de noho baba, gai koe e hagadaba i oo lodo, “Go au donu huu, e deai ange donu e bei au. Au e dee haihai naa donu ga see hine gu magau dono bodu, aabe gu maakau agu dama.”

⁹ Gai luu mee nei ngaadahi e hai adu naa gi de goe i de masavaa daa hagalele, i dahi laangi daudahi: au dama e maakau naa, gai gu magau doo bodu. Mee nei e hai adu naa donu gi de goe e dee galemu donu dau hai denga huuhuaa mee lagolago, ma de mmahi au helau alodahi.

¹⁰ Gai dau tali go au hegau baubau, gai koe e hagadaba, “E deai donu dangada e gidee agu mee e hai.” Doo iloo mee ma doo heiangi gu hagasenga goe; gai koe e hagadaba i oo lodo, “Go au donu huu, e deai ange donu e bei au.”

¹¹ De hai ngadaa e dae mai naa donu gi de goe, gai koe e dee maua donu i de hagaola goe. Dahi hai ngadaa e duu adu naa gi de goe gai koe e dee maua naa donu gi ola mai ai, gai de hai ngadaa aau e dee gidee laa e daa hagalele naa donu de hai adu gi de goe.

¹² Duudagi ina de haia au helau ma au huuhuaa mee lagolago, go mee aau gu hai hegau mai loo i doo gauligi. Agu made koe e hagadagadaga age naa, agu made koe e hai naa ga maatagu dangada.

¹³ Koe gu goso i de hagallongo muna bale lagolago; gilaadeu gi hiihidi age mage hagaola ina goe; gilaadeu e diiloo mee i lo te langi gi loomai, ma gilaadeu e diiloo denga heduu ma gilaadeu e daalaa adu gi goodou mee e loomai i de duu de maasina i dai.

¹⁴ Tilo, gilaadeu e bei donu denga lau manu mmasa, e dudu laa ga odi i de ahi. Gilaadeu e dee maua i de hagaola gilaadeu mai i de ula o de ahi mmahi. De ahi nei e dee se maga ahi e hagamahanahana ai, gai e dee se ahi e noho tangada i ono gaogao.

¹⁵ Gai de gau bee nei, go gilaadeu nogo hai hegau madali goe, ma de hulo saele madali goe mai i doo gauligi, gilaadeu alodahi e duudagi donu de hulo gee i de haiava, gai e deai donu se gilaadeu e maua i de hagaola goe.