Isaiah 46 - De Beebaa Dabu

Denga diinonga o Babylon

¹ Bel gu ino gi lalo, Nebo gu duuduli; olaadeu diinonga e hagauda i honga manu dolodolo ma manu haangai. Gai mee nei e kave saele ma de hagauda ma e hagadaemaha ai denga manu.

² Gilaadeu e ino gi lalo ma de duuduli alodahi; gu dee maua i de hagaola de mee alaadeu e hagauda laa, gilaadeu e noonoodia hogi ga gaavee gee gi dahi henua gee.

³ Dangada o Jacob, goodou hagalaangona agu muna, goodou dangada alodahi o Israel e doe, go goodou aagu ne hagauda mai i de masavaa oodou ne hagadili, ma de saabai goodou mai i de masavaa oodou ne haanau ai;

⁴ Go au donu de ia e diiloo adu goe, go au ne haia goe ma de saabai goe; ga dae ai loo gi de masavaa oou e madumaatua ai ma de sinaa doo biho, go au e balea adu goe ma de hagaola goe.

⁵ Goai oodou e hagataba bolo e bei ogu dagodo, gai goai oodou e hagahedae ange au aagena, ma de hagataba bolo gimaadeu e dagodo daudahi?

⁶ Hanu dangada e llingi denga goolo i lodo alaadeu beagi, ga hagahidi denga selevaa i honga denga mee hagahidi, ga hagao ange dahi labagau o denga goolo gi haia dahi maadua; gai gilaadeu ga ino ga daumaha ange aagena.

⁷ Gilaadeu e hagauda delaadeu diinonga ma de saabai i honga olaadeu eu; ga kave ga hagaduu i dono mommee gi duu ai, gai e dee maua donu i de ngalue gee i dono duulanga. Gai ga dalodalo ange naa donu dahi dangada aagena, aagai e dee basa ange donu, aabe maua i de hagaola tangada mai i ono hai ngadaa.

⁸ Goodou manadua ma de hagasaele de mee nei, gai hagamaanadu i de mee nei, goodou de gau baubau.

⁹ Manadua mee ne hai madagidagi; go au donu de Maadua, e deai ange donu; go au donu de Maadua, e deai ange donu e bei ogu dagodo.

¹⁰ Mai i taamada age gai au ne tala gi iloo mee e hai i de hagaodi, gai madagidagi loo, gai au ne tala mee tigi tae mai. Au e hagadaba, “Agu hagatau e dee haisala donu, gai au e hagassula naa donu mee alodahi oogu e lodo ai.”

¹¹ Au e hagahi naa dahi manu lele alasala mai i dua, se daane mai i dahi henua mmao, gai ia ga hagasula ina dagu hagatau. Gai be ni aha naa huu aagu gu tala, gai au e hai naa donu gi bei; gai be ni aha naa huu aagu gu hagatau, gai au e hai naa donu.

¹² Goodou de gau makaga oodou lodo, nnoho mai hagalaangona agu muna; go goodou e mmao gee i de mee heohi:

¹³ au e hai gi baa mai dogu heohi, gai e dee mmao donu; gai dagu hagaola mai e dee mmule donu. Au e hai dagu hagaola gi dagodo i Zion, gai dogu mahamaha i Israel.