Isaiah 42 - De Beebaa Dabu

Tangada hai hegau o Tagi Maolunga

¹ Tilo, deenei dogu dangada hai hegau, go ia aagu e bale ange; go ia aagu gu hili, gai go ia oogu e malangilangi ai. Au gu hai dogu Hagasaalunga gi hano iho gi ono elunga; gai ia ga hagamodu ai muna o denga huaahenua i de heohi.

² Ia e dee oo be ue age dono leo, aabe e hai gi langona e dangada dono leo i honga denga haiava.

³ Ia e dee hhadi naa donu de aalege gu dai hadi laa, aabe diinei de wick gu dai made laa. Gai ia e hagamodu muna i de mee abodonu.

⁴ Ia e dee vasega naa donu aabe baageaa ono lodo, ga dae ai gi dana hagaduu gi makaga de hagamodu muna heohi i henua i lalo. Gai dangada e nnoho i tagudai e tali hagalodolodo go ana hainga.

⁵ Aanei muna a de Maadua, Tagi Maolunga e tala, go de ia ne hagadau ina de langi ga doha gi daha, gai go ia ne hoolaa henua i lalo ma mee alodahi ne loomai ai, ma de hai gi manavanava dangada e nnoho ai, ma de gaavange de manava o de mouli gi dangada i kilaa:

⁶ “Go au go Tagi Maolunga, au ne hagahi goe i de heohi, au e poo naa donu doo lima. Au e tilo adu goe, ma de hai goe gi se hagatoo donu hagaheloongoi ange gi dangada, gai gi se maalama ange gi denga huaahenua;

⁷ e hhuge ai ganomada o dangada e dee kide laa, ma de hagassao mai ai gilaadeu e nnoho i lo te hale pono ma lo te gohu.

⁸ Go au go Iahweh; deenei dogu ingoo! Au e dee gaavange naa donu dogu mahamaha gi dahi dangada gee, aabe e gaavange dogu tuhi gi denga diinonga.

⁹ Tilo, mee gu i mua gu hai ma gu lava, iainei gai au e tala mee hoou gu dai hai; au e tala adu mee nei gi goodou i mua de hai.”

Daahili duuhia Tagi Maolunga

¹⁰ Daahili ange gi Tagi Maolunga i taahili hoou, duuhia ia i henua i lalo alodahi, go goodou e loiho gi tai, ma mee alodahi i ono lodo, goodou denga mommee i tagudai, ma mee alodahi e mouli i kilaa.

¹¹ Lodo henua ma ono aduhale gi daahili, gai denga aduhale vaaligiligi o de gau Kedar e nnoho ai gi malangilangi. Dangada o Sela gi daahili i delaadeu lodo danuaa, gilaadeu gi hevaalogi i ulu denga mounga.

¹² Gilaadeu gi hagamahamaha ina Tagi Maolunga, ma de tala dono tuhi i mommee i tagudai.

¹³ Tagi Maolunga e humai naa bei taane dau i de hebagi, ia e bei naa taane hebagi e hagammahi laa ia; ia e oo i de masavaa o de hebagi, ma de hagadee kii ono hagadaumee.

¹⁴ Gu daulooloa dogu noho ga dee muu; au ne hagapuni dogu ngudu ma de golomagi ogu lodo. Aagai iainei au gu bei dagodo o de hine gu dai haanau, au e dangi, au e mahi bodo ma de gonogono.

¹⁵ Au e ulu iho naa denga mounga ma duuduu, ma de hai gi mmae manu ssomo alodahi; au e hai naa denga saalingaa vai gi ni modu, ma de hai gi maamasa mommee iai vai.

¹⁶ Au e dagi naa gilaadeu e dee kide i dahi haiava alaadeu tigi iloo, ma de dagi gilaadeu i denga dao haiava olaadeu tigi hulo ai; au e sui naa de gohu gi se maalama i olaadeu mada i mua, ma de hai denga mommee haduhadua gi ssoe. Aanei agu mee e hai ange gi gilaadeu, gai e dee tili naa donu gilaadeu.

¹⁷ Dangada e hagadonusia denga diinonga ma de hai ange gi denga diinonga laagau ma diinonga baalanga, “Go goodou omaadeu maadua,” e aahe dua naa ma de dookaa.

Israel e dee kide ma de longoduli

¹⁸ “Goodou de gau longoduli, nnoho mai hagalaangona; goodou de gau dee kide, kalo ange diiloo!

¹⁹ Goai e dee gide, e dee go dogu dangada hai hegau? Gai goai e longoduli bei tangada hagailoo aagu ne hai gi hano? Goai e dee gide bei tangada gu vvae mai gi de au, ma tee gide bei tangada hai hegau o Tagi Maolunga?

²⁰ Gu lagolago au mee gu gidee, aagai koe e dee anga ange aagena; luoo dalinga e maahuge, aagai koe e dee langona.”

²¹ Tagi Maolunga ne malangilangi i de hai ana hainga gi maolunga ma de mahamaha, i hiidinga ia e heohi.

²² Aagai de huaadangada nei gu gaiaadia ma de haia gi de mahi olaadeu goloa; gilaadeu alodahi gu nnoho i lodo haonga ma de pono ange i lodo hale pono. Gilaadeu gu gaiaadia olaadeu goloa, gai e deai donu se dangada e hagaola ina gilaadeu; gilaadeu gu bei goloa e maua i de hebagi, gai e deai donu se dangada e hagadaba, “Hagaahea mai gilaadeu!”

²³ Goai i oodou daha e hagalaangona muna nei, aabe noho e hagalaangona i laangi e loomai?

²⁴ Goai ne gaavange Jacob bei goloa e maua i de hebagi, ma de dugu ange Israel gi de gau gaiaa? E aha, e dee go Tagi Maolunga, de ia odaadeu gu haisala ange laa aagena? Go hiidinga gilaadeu tee llodo e daudali i ono haiava, gilaadeu tee llodo e hagallongo ange gi ana hainga.

²⁵ Deelaa ai, ia ne gaamai gi de ia de hagaduasala i de kona dono lili, ma de hebagi laumalie. Gai ne duuli luoono baasi i de ahi ula, aagai ia tee donu ange aagena; de ahi ne dudu ia, aagai gilaadeu tee maanadu dagodo o mee laa.