Isaiah 34 - De Beebaa Dabu

De hagaduasala o denga huaahenua

¹ Denga huaahenua, goodou hagapaa mai hagalaangona; denga huaadangada, nnoho mai hagalaangona! De henua ma mee alodahi i ono elunga gi hagalaangona, go henua i lalo ma mee alodahi iai.

² Tagi Maolunga gu lili i denga huaahenua alodahi, ma de bole mmao i olaadeu hagabuulinga hebagi. Ia e hai naa gi daia gilaadeu gi odi i de maakau; ia e hai naa gi daia gilaadeu gi maakau.

³ Gai olaadeu dangada gu daia laa ma gu maakau gu daakodo saele, gai angaanga o alaadeu dangada maakau e pilo naa, gai honga denga mounga e hoohonu naa i olaadeu dodo.

⁴ Denga heduu alodahi i lo te langi e llilo naa, gai de langi e hhedu naa bei de beebaa mulo; denga hagabuulingaa heduu alodahi e too iho naa, bei denga lau manu mmae o de grapevine, ma lau manu mmae o de fig.

⁵ Dagu gadilaasa gu hebagi i de langi, gai tilo, e hano iho naa e hagaduasala Edom, ma dangada aagu gu hagamodu e daa gi maakau.

⁶ De gadilaasa a Tagi Maolunga gu honu i todo, ma de baalau i denga kiliisi — go dodo o denga ssiibi ma guudi, ma kiliisi o denga ssiibi daane. Go hiidinga Tagi Maolunga gu hai dahi sigidaumaha i Bozrah, gai e soa ne daa ga maakau i Edom.

⁷ Denga kaau aada e maakau naa madali gilaadeu, denga kaau gauligi madali denga kaau mmahi; delaadeu henua gu honu i todo, gai de gelegele gu hilo ma kiliisi.

⁸ Go hiidinga Tagi Maolunga e dahi ana laangi e sui ange ai alaadeu hegau, gai se ngadau e sui ange ai alaadeu hegau i hiidinga o Zion.

⁹ Denga saalingaa vai o Edom e hai naa ga ni mommee iai tar, gai de gelegele e hai naa ga se maga ahi ula; de henua alodahi e hai naa ga se mommee iai tar.

¹⁰ Gai de ahi laa e ula naa i de boo ma de laangi, dono useahi e buu naa donu huu ga hano ai. Gai de mommee laa e ngadi dagodo naa i denga atangada e loomai; e deai naa hogi dangada e seesee i kilaa ga hano ai e dee ngado mai.

¹¹ De owl e loomai naa ga nnoho i kilaa; de owl laumalie ma de raven e nnoho naa hogi i kilaa. Gai de Maadua e dagi naa de uga haide i honga de henua, go de uga e haide ai de hellumi, ma de uga e haide ai de ngadi dagodo o de mommee laa.

¹² Ono gau aamua gu deai se mommee alaadeu e hagaingoo ange go de nohoanga hodooligi, gai ono dagi alodahi e llilo naa.

¹³ Denga manu daladala e ssomo naa i lodo hale danuaa, gai manu dabeo ma manu duiduia i lodo hale buibui makaga. Gai de mommee laa e hai naa gi se mommee niio denga jackal, aama de mommee nnoho o denga owl.

¹⁴ Denga manu lodo henua e nnoho naa i kilaa madali denga hyena, denga guudi de vao e hagadau koo naa hogi i olaadeu magavaa, de manu hagamaatagu o de boo e gidee naa dono mommee hagamabu i kilaa.

¹⁵ De owl e hai naa dono hoohanga i kilaa ga dugu ai ana ngago, ia e hai naa gi masae ana ngago, ma de tilo ange ana dama i lalo luoono bakau; gai e hanu naa hogi falcon e nnoho i kilaa, de manu nei ma dono soa.

¹⁶ Huugea age de beebaa a Tagi Maolunga, mage daulia: E deai naa donu se manu nei e dee maleva, de manu nei ma dono soa, go hiidinga ia gu lava donu i de tala muna nei, gai dono Hagasaalunga gu hagabuni mai gilaadeu.

¹⁷ Ia e vaevae ange naa olaadeu mommee i de dada, ia ne haide olaadeu mommee ga vaevae ange gi gilaadeu. Gai gilaadeu ga henua ai ga hano ai; olaadeu atangada alodahi e nnoho naa i kilaa.