Isaiah 33 - De Beebaa Dabu

De hai ngadaa ma talodalo i de bale

¹ E vakaa naa goe, de ia e oohaa denga henua, gai tigi ai donu dangada ne oohaa ina goe! E vakaa naa goe, tangada e dee hai hegau i de mee abodonu, gai tigi ai donu dangada ne hagasengalia goe! De masavaa naa huu aau e tuu ai de oha gai koe e oohaa naa donu hogi; de masavaa naa huu aau e tuu ai de hagasenga dangada, gai koe e hagasengalia naa donu hogi.

² Tagi Maolunga, koe gi abodonu mai gi gimaadeu; gimaadeu e tali adu donu huu goe. Go koe omaadeu mmahi i daiao alodahi, ma demaadeu hagaola i de masavaa omaadeu e hai ngadaa ai.

³ Doo leo mmahi e hai ga saavini dangada ga hulo; denga huaahenua e mavaevae saele i doo hidi age.

⁴ Denga huaahenua, oodou goloa ne hai gi de mahi, gu odi i de gai a denga itebuubuu gauligi; gai dangada e hai gi de mahi naa mee nei bei hegau a denga hagabuulingaa itebuubuu.

⁵ Tagi Maolunga gu hagaamua, go hiidinga ia e noho i de mommee maolunga; ia e hhao naa Zion i de hagamodu soe ma de mee heohi.

⁶ Gai ia e hai naa go doo dagelo makaga i de laangi laa, ma de hagaola laumalie, ma de heiangi, aama de iloo mee. De madagu i Tagi Maolunga se mee hagamogomogo mmao.

⁷ Tilo, alaadeu daane mmahi e oo naa ga tangi i honga denga haiava, gai de gau sui e haia ga nnoho paba dangada e tangi see naa.

⁸ Denga haiava nnui gu ngadi daakodo, gu deai dangada e hulo saele i honga denga haiava. Gai de hagatoo donu hagaheloongoi gu maoha, denga aduhale gu hagangadi mee ina; gai gu deai donu se hagadubu o dangada.

⁹ De henua gu hagaaloha ono dagodo ma de ngadi dagodo, Lebanon gu dogaa gai gu mmae; Sharon gu bei dagodo o de vao, gai Bashan ma Carmel gu bei denga manu ssomo gu malili laa olaadeu lau.

¹⁰ E hagadaba Tagi Maolunga, “Iainei gai au ga hidi age nei; iainei gai au e hagaamua naa; iainei gai au e hai naa ga maolunga.

¹¹ Goodou ne hai tama i denga ngadi gili grain, gai ne haanau denga lau manu mmasa; gai de madangi i oodou manava e dudu naa goodou bei de ahi.

¹² De huaadangada e dudu naa ga bei lehu, ma de dudu i de ahi, bei manu daladala gu duuduu laa.”

¹³ Goodou dangada i mommee mmao, hagalaangona dagodo o agu mee gu hai; goodou e nnoho i mommee e paa mai, goodou gi tonu ange gi dagodo o ogu mahi!

¹⁴ De gau haisala i Zion gu maatagu mmao; dangada e dee hai lodo o de Maadua gu bolebole: “Goai de gidaadeu e maua i de noho madali de ahi e duungia laa mee? Gai goai de gidaadeu e maua i de noho i de mommee iai de ahi e ula laa ga hano ai?”

¹⁵ Tangada e seesee i de heohi, ma de tala de muna abodonu, gai e kino i goloa e maua i de hai gi de mahi, gai ia e dee kave mee ngadi gaavange hagasenga, gai se dangada e dee hagalaangona denga hagatau e daa ai dangada gi maakau, aama tee tilo denga dahulinga baubau —

¹⁶ deenei tangada e nnoho i mommee maolunga, gai dono mommee mmuni go lodo hadu o de mounga. Gai ana gai e gaavange naa gi de ia, gai e deai donu se odi ana vai.

¹⁷ Gai koe e gidee naa de mahamaha o de hodooligi, ma de tilo de ngaadonga o de henua i de mommee mmao.

¹⁸ Koe ne manadua de mee hagamaatagu gu hai i mua, ⌊ga hagadaba,⌋ “I hee iai tangada dau? I hee iai tangada hagahidi sseene? I hee iai tangada e daulia denga hale dagitilo?”

¹⁹ Gai koe e dee gidee ange naa donu gilaadeu e vaivai haia dangada, ma dangada pasa i muna oou e dee donu ange laa aagena, alaadeu muna e pasa ai e deai e tonu ange aagena.

²⁰ Galo ange diiloo Zion, de aduhale o adaadeu daonga gu hagailonga; koe e gidee naa Jerusalem, de mommee iai de baba, gai se hale malo e dee hagangalue; ono laagau hagamakaga e dee dada age naa donu, gai ono daula e dee moomodu hogi.

²¹ Aagai go kilaa iai Tagi Maolunga taadeu Ia Maolunga. De mommee laa e bei dahi mommee iai leevaa nnui ma saalingaa vai. Gai e deai donu se vaga iai hoe e hulo ai, e deai hogi vaga mmahi e dele i kilaa.

²² Gai Tagi Maolunga go demaadeu ia hagamodu muna, Tagi Maolunga go demaadeu ia hai hainga, Tagi Maolunga go demaadeu hodooligi; gai go ia e hagaola ina gimaadeu.

²³ Denga uga o saiolo gu daudau age, de bou e dee hagamakaga, gai ssaiolo tigi hagaduu e doha. Gai denga goloa lagolago ne maua i de hebagi e duha naa; tangada balagelage e kave naa hogi goloa aana ne gaiaa.

²⁴ Gai e deai naa donu se dangada e noho i kilaa e hagadaba, “Au gu magi;” gai ia e degi ange naa gi haisala o dangada e nnoho i kilaa.