Isaiah 32 - De Beebaa Dabu

De nohoanga hodooligi o de heohi

¹ Tilo, dahi hodooligi e dagi naa i de heohi, gai dagi o de henua e dagi naa i de hagamodu heohi.

² Gai dahi ma dahi e bei naa de mommee e buibui ai dangada i de ssau de madangi, gai e bei denga saalingaa vai i de vao, e bei de malu i lalo dahi hadu laumalie i de henua e deai manu e ssomo ai.

³ Gai ganomada o dangada e gidee laa gu dee pono donu, dalinga o dangada e langona laa e hagallongo naa donu.

⁴ Gai maanadu a tangada e moolau ono lodo e donu ange naa, tangada e lau dono alelo e tala ana muna ga tonu ange dangada aagena.

⁵ Gai tangada lodo senga e dee hagabinga bolo se dangada maolunga, gai tangada e daahanga ina dangada e dee hagadubu.

⁶ Go hiidinga tangada lodo senga e basa senga, ono lodo e hagasaele de hai de baubau; ana hegau e dee bei lodo o de Maadua, ia e hagadele muna hhadu i dagodo o Tagi Maolunga; ia e dee haangai ange gilaadeu e hiikai, ma tee hagaunu ange gilaadeu e hieunu.

⁷ Haingaa mee a tangada vaivai dagodo e baubau, ia e hadu age denga hagatau baubau e daa ai gi maakau de gau hagaau aloha i ana muna hhadu, e dee galemu donu tangidangi a de gau hagaau aloha e heohi.

⁸ Aagai tangada abodonu e hai denga hagatau abodonu; gai ia e duudagi de abodonu.

Denga haahine o Jerusalem

⁹ Goodou denga haahine e duadonu laa, hiihidi age hagalaangona agu muna; goodou denga haahine e nnoho paba laa, nnoho mai hagalaangona agu muna!

¹⁰ E dahi ange naa donu huu ngadau ma hanu mee, gai goodou e nnoho paba naa e bolebole naa; i hiidinga gu deai donu grape e hagihagi, gai gu deai hogi se hagihagi o denga huamanu ange laa.

¹¹ Goodou denga haahine duadonu e bolebole naa; goodou denga damaa hine nnoho paba e maatagu naa! Goodou e hagaui oodou malo, gai ga nnoa oodou ungaalodo i malo daladala.

¹² Hagailiilihia oodou hadahada i hiidinga o denga veelenga danuaa, ma denga grapevine hhua lagolago,

¹³ ma hiidinga o de henua o ogu dangada gu ssomo ai daladala ma manu duiduia — uaa, goodou tangi i hiidinga o hale alodahi oodou nogo malangilangi ai laa, aama hiidinga o de aduhale hagalongaa nei.

¹⁴ Denga hale danuaa e ngadi daakodo naa, de aduhale nogo hagalongaa laa e deai naa dangada iai; denga hale buibui makaga ma hale dagitilo e hai naa ga se vao, ga hano ai, gai se mommee e malangilangi ai denga donkey, ma de mommee e haangai ai denga hagabuulingaa ssiibi;

¹⁵ ga dae ai gi de hano iho o de Hagasaalunga o de Maadua i de mommee maolunga, gai de vao e hai naa ga se gelegele danuaa e ssomo ai manu, gai gelegele danuaa e ssomo ai manu e hai naa ga se lodo mee muimui.

¹⁶ Gai de hagamodu muna heohi e dagodo i de vao, gai de heohi e gidee naa i de mommee iai de gelegele danuaa.

¹⁷ De hagaodi o hegau o de heohi go de baba, gai de haigamaiana o de heohi go de daudonu ma de nnoho paba ga hano ai.

¹⁸ Ogu dangada e nnoho paba naa i olaadeu mommee, gai e dee manavasaa olaadeu lodo.

¹⁹ Gai ga too iho naa donu denga dibadibaa haisi ga oha lodo henua, gai de aduhale e oha ga odi,

²⁰ gai goodou e manuuia naa donu, i de doo gaogao denga saalingaa vai alodahi, ma de dugu oodou kaau ma oodou donkey gi hulo saele.