Isaiah 29 - De Beebaa Dabu

E vakaa naa Jerusalem

¹ E vakaa naa goe, Ariel, Ariel, de aduhale o David nogo noho ai! Goodou e hai oodou daonga i ngadau alodahi i denga masavaa gu hagailonga.

² Aagai au e gaamai naa dahi hai ngadaa gi Ariel, dangada iai e tangi naa ma de hinangalosaa; gai au e hai naa de aduhale laa gi bei Ariel.

³ Au e duuli naa luu baasi de aduhale alodahi; au e duuli naa luoo baasi i denga hale dagitilo ma de hagatuu denga mee oha e hebagi adu ai gi de goe.

⁴ Gai koe e baguu naa gi honga de gelegele, ma de dagodo i lo te gelegele ga basa ai. Doo leo e basa age naa i lo te gelegele oou gu dagodo ai laa, au muna e musumusu e loage naa i lodo gelegele.

⁵ Aagai oo hagadaumee soa e bei naa mama o de gelegele, gai de gau daa dangada e loomai nei bei gili grain e ilihia laa ga gaavee gee. Gai e daa hagalele naa donu huu,

⁶ gai Tagi o denga hagabuulinga hebagi e humai naa bei de hatuli ma de ngalungalue o de henua ma de leo mmahi, madali denga ssio ma de madangi aama de ahi e dudu ai mee alodahi.

⁷ Gai dangada soa o denga huaadangada alodahi e hebagi ange laa gi Ariel, ma de hebagi ange gi de aduhale ga oha ono hale buibui makaga ga duuli luu baasi, e bei naa donu dagodo o dahi midi, ma dahi midi hagaago ange i de boo —

⁸ bei tangada saalohia e midi ange laa bolo ia e noho ma e gaimee, aagai ga alahage huu ia, gai ia goi saalohia donu huu; aabe go tangada hieunu e midi laa bolo ia e noho ma e unu; aagai ia e hieunu dono huu i dono alahage, tigi helui donu dono hieunu. Gai e bei ai hogi dagodo o hagabuulinga soa o denga huaahenua alodahi e hebagi ange laa gi de mounga go Zion.

⁹ Goodou gi llele mouli, ma de ssenga ange, haia gi dee kide goodou ma tee gidee; goodou gi ssenga, aagai e dee ssenga i denga uvaini; goodou gi ssee saele, aagai e dee ssenga i mee mmahi.

¹⁰ Tagi Maolunga gu hai goodou gi bei tangada seni magau: ia gu haoli oodou ganomada (bei denga pelaabisi), ia gu haoli oodou biho (bei dangada e daalaa mee e loomai).

¹¹ Gai adu gi goodou, de midi hagaago ange nei e bei donu muna e sisi laa i lo te beebaa mulo gu hagamakaga laa. Gai noo dahi e gaavange gi tangada e maua i de dau, ga hai ange, “Aude haihaia, daulia de beebaa nei,” gai ia e hai ange naa, “Au e dee maua, i hiidinga gu hagamakaga.”

¹² Gai noo de beebaa nei e gaavange gi dahi dangada e dee iloo de dau, ga hai ange, “Daulia de beebaa nei,” gai ia e hai adu naa, “Au e dee iloo i de dau.”

¹³ Gai e hagadaba de Ia Aamua: “De huaadangada nei e hagapaa mai gi de au i olaadeu ngudu, ma de hagadubu donu huu au i alaadeu muna e tala, aagai olaadeu lodo e mmao gee donu i de au. Alaadeu hai daumaha mai gi de au, e daudali i dahulinga ne ago mai i daho dangada.

¹⁴ Deenei ai, au e ahe ange naa e hai gi llele mouli de gau nei, i mee hagalele mouli lagolago; gai de iloo mee o de gau iloo mee e dee maaleva naa, gai de heiangi o de gau heiangi e lilo naa hogi.”

¹⁵ E vakaa naa gilaadeu e hagammahi laa e hagammuni alaadeu hagatau i Tagi Maolunga, gilaadeu e hai alaadeu hegau i lo te gohu, ma de hagataba, “Goai naa donu e gidee gidaadeu? Gai goai naa donu e iloo?”

¹⁶ Goodou e llui gee denga mee, goodou e hai tangada hai gumedi gi bei dagodo o bela pigi! Gai e maua e mee ne hai i luu lima o tangada hai gumedi i de hagadaba, “E dee go ia donu ne haia nei au”? Gai e maua e de gumedi hadu i de hagadaba i tangada ne haia ia, “Ia e deai donu ana mee e iloo”?

¹⁷ E aha, e dee se masavaa bodobodo naa donu huu, gai Lebanon gu se gelegele danuaa, gai de gelegele danuaa laa e hai naa ga bei dagodo o lodo mee muimui?

¹⁸ De laangi laa gai de gau longoduli e langona naa muna i lo te beebaa mulo laa, gai gilaadeu e dee kide ma de nnoho i lo te gohu e aala naa olaadeu ganomada ga gidee.

¹⁹ Gai de gau daudonu e aahe ange naa ga malangilangi i Tagi Maolunga; de gau hagaau aloha e malangilangi naa i de Ia Dabu o Israel.

²⁰ Tangada e vaivai haia dangada e lilo naa donu, gai de gau doo mee e dee maaleva naa hogi, gai dangada alodahi e maanadu de hai de baubau e daa naa gi maakau —

²¹ gilaadeu e hagabuu ange ssala gi tangada i alaadeu muna, ma de hai gi dee sula de hagamodu muna soe i de haitoga o de aduhale, gai alaadeu muna hhadu e hai gi dee heohi de hagamodu muna o tangada heohi.

²² Deenei ai, Tagi Maolunga ne hagaola ina laa Abraham, e hagadaba i dagodo o dangada o Jacob: “Jacob e dee ahe ange naa donu ga dogaa, gai luoono mada e dee mada tea naa donu i dono dogaa.

²³ Gai ga gidee naa huu e gilaadeu alaadeu dama, go gilaadeu aagu ne hai i olaadeu magavaa, gai gilaadeu ga hagadabu dogu ingoo; gilaadeu e tala naa bolo de Ia Dabu o Jacob e dabu, gai gilaadeu e maatagu naa i de Maadua o Israel.

²⁴ Dangada gu haisala laa e aahe ange naa ga tonu ange; gilaadeu e nnanu laa e hagallongo naa agu agoago.”